Salmow 122 - An Sowter 1997 2023

SALM 122. Laetatus sum.

¹ Lowen en vy pan lavarsons dhymm : Gwren ni mos bys yn chi an Arloedh.

² Agan treys a sev a-berth y'th porthow : A Yerusalem.

³ Yerusalem yw drehevys avel sita : yw kelmys fast war-barth.

⁴ Ha bys dhodho yth yskynn an loethow, loethow an Arloedh : dustuni dhe Ysrael, dhe wodhvos gras dhe Hanow an Arloedh.

⁵ Rag ena y feu gorrys tronys breus : tronys chi Davydh.

⁶ Pysewgh kres a-barth Yerusalem : re sewenno an re a'th kar.

⁷ Re bo kres a-ji dhe'th fosow : ha diagha y'th lysyow.

⁸ A-barth ow breder ha'm kowetha : my a lever, Bedhes kres ynnos jy.

⁹ A-barth chi an Arloedh agan Duw : my a hwila dader dhiso jy.