Salmow 114 - An Sowter 1997 2023

SALM 114. In exitu Israel.

¹ Pan eth Ysrael mes a Ejyp : ha chi Yakob a-dhiworth pobel astranj aga yeth;

² Yuda o y sentri : hag Ysrael y vestrynsys.

³ An mor a welas henna, ha fia : Yordan a dreylyas war-dhelergh.

⁴ An menydhyow a derlemmis kepar ha hordhes : ha'n brennow kepar ha deves yowynk.

⁵ Pandr'a hwer dhis, A vor, ty dhe fia : ha ty, Yordan, dhe dreylya war-dhelergh?

⁶ Hwi venydhyow, dhe derlemmel kepar ha hordhes : ha hwi vrennow, kepar ha deves yowynk?

⁷ Kren, A dhor, a-dherag an Arloedh : a-dherag Duw Yakob;

⁸ Neb a dreylyas an garrek dhe lynn a dhowr : ha'n men flynt dhe fenten dowr.