Salmow 111 - An Sowter 1997 2023

SALM 111. Confitebor tibi.

¹ My a ras dhe'n Arloedh a leun golonn : yn kowethas an re ewnhynsek hag y'n kuntelles.

² Meur yw oberow an Arloedh : hwilys gans oll an re a lowenha ynna.

³ Y ober yw leun a wordhyans hag enor : ha'y wiryonedh a dhur bys vykken.

⁴ Ev a wrug dh'y oberow marthys bos kovhes : grassyes ha truedhek yw an Arloedh.

⁵ Ev re ros sosten dhe'n re a'n own : ev a berth kov a'y gevambos bynitha.

⁶ Ev re dherivas orth y bobel galloes y wriansow : rag may rollo dhedha ertach an kenedhlow.

⁷ Gwriansow y dhiwleuv yw gwirder ha gwirvreus : oll y arghadowyow yw sur.

⁸ Fastyes yns i bys vykken ha bynnari : ha gwrys yn gwirder hag ewnder.

⁹ Ev re dhannvonas daspren dh'y bobel : ev re worhemmynnis y gevambos bynitha; sans hag ownys yw y Hanow.

¹⁰ Own an Arloedh yw an dalleth a furneth : yma skians da dhe oll an re a wra hemma; y wormola a dhur bys vykken.