Salmow 109 - An Sowter 1997 2023

SALM 109. Deus laudem.

¹ Na daw, A Dhuw ow gologhas : rag ganow an tebelwas ha'n ganow a falsuri yw igor er ow fynn.

² I re gewsis er ow fynn gans fals taves : i a omsettyas a-dro dhymm ynwedh gans geryow kas, hag omladh er ow fynn heb ken.

³ Yn attal a'm kerensa i a sev er ow fynn : mes my a omre dhe bysadow.

⁴ I re dylis dhymm dregynn rag da : ha kas rag kerensa.

⁵ Gorr tebelwas dhe vos router warnodho : ha seves kuhudhor orth y leuv dhyghow.

⁶ Pan y'n breusir, des ev yn-mes kablus : ha bedhes y bysadow treylys dhe begh.

⁷ Bedhes y dhydhyow boghes : ha kemmeres ken onan y soedh.

⁸ Bedhes y fleghes omdhivasow : ha'y wreg gwedhwes.

⁹ Bedhes y fleghes gwandrysi ha begyers : hwilens i alusen ynwedh pell dhiworth aga annedhow shyndys.

¹⁰ Dalghennes an okerer pup-tra eus ganso : ha pylles estrenyon askorr y lavur.

¹¹ Na vedhes neb a ystynno tregeredh dhodho : ha na vedhes neb a gemmerro truedh a'y fleghes omdhivas.

¹² Bedhes y linyeth diwreydhys : ha bedhes y hanow defendys dhe-ves y'n henedh a siw.

¹³ Bedhes kovadh kammweyth y dasow a-dherag an Arloedh : ha na vedhes pegh y vamm defendys dhe-ves.

¹⁴ Bedhens i prest a-dherag an Arloedh : rag may torro dhe-ves aga hovadh dhiworth an norvys;

¹⁵ Drefenn na borthas kov a wul tregeredh : mes ev a helghyas an truan ha'n boghosek, rag may lattha an re trogh aga holonn.

¹⁶ Ev a garas molleth, ha hi a dheu dhodho : ny vynnas bennath, ha hi yw pell dhiworto.

¹⁷ Ev a omwiskas gans molleth kepar ha gans kweth : sygeres hi yn y golodhyon avel dowr, hag avel oyl yn y eskern.

¹⁸ Bedhes hi kepar ha'n gwisk mayth omwisk ynno : ha kepar ha'n grogys a wisk a-dro dhodho pup-prys.

¹⁹ Hemm yw gober ow huhudhoryon dhiworth an Arloedh : ha'n re a gews erbynn ow enev.

²⁰ Mes gwra dhymm, A Arloedh, herwydh dha Hanow : drefenn bos dha dregeredh da, gwra ow delivra.

²¹ Rag truan ha boghosek ov vy : ha'm kolonn yw goliys a-bervedh ynnov.

²² Yth av dhe-ves avel skeus pan hirha : y'm shakir dhe-ves avel an lokust.

²³ Ow dewlin a wannha gans penys : ha'm kig a fyll a fowt blonek.

²⁴ My a dheuth ha bos skorn dhedha : pan y'm gwelsons, i a shakyas aga fenn.

²⁵ Gweres dhymm, A Arloedh ow Duw : salw vy herwydh dha dregeredh;

²⁶ May hwodhvons bos hemma dha leuv jy : hag y feu ty, A Arloedh, a'n gwrug.

²⁷ Mollethens i, mes ty bennik : pan sevons, perthens i meth; mes lowenhes dha was.

²⁸ Bedhes ow huhudhoryon gwiskys yn disenor : ha gwiskens i aga meth avel mantell.

²⁹ My a ras dhe'n Arloedh yn feur gans ow ganow : ha my a'n gormel yn mysk an routh.

³⁰ Rag ev a sev orth leuv dhyghow an den boghosek : dh'y sawya a'n re a helgh y enev.