Salmow 105 - An Sowter 1997 2023

SALM 105. Confitemini Domino.

¹ Grassewgh dhe'n Arloedh, gelwewgh war y Hanow : derivewgh y wriansow yn mysk an poblow.

² Kenewgh dhodho, kenewgh gormola dhodho : kewsewgh a'y varthusyon oll.

³ Bostyewgh yn y Hanow sans : lowenhes kolonn an re a hwila an Arloedh.

⁴ Hwilewgh an Arloedh ha'y nerth : hwilewgh y fas pup-prys.

⁵ Perthewgh kov a'y varthusyon re wrug : y anethow, ha breusow y anow,

⁶ A has Abram y was : hwi vebyon Yakob a dhewisas.

⁷ Ev yw an Arloedh agan Duw : yma y vreusow yn oll an nor.

⁸ Ev a borthas kov a'y gevambos bynitha : an ger a worhemmynnis dhe vil henedh;

⁹ An kevambos a wrug gans Abraham : ha'n ti a dos dhe Ysak;

¹⁰ Ev a'n ros dhe Yakob avel ordenans : ha dhe Ysrael avel kevambos bys vykken;

¹¹ Ow leverel, Dhiso jy y rov tir Kanan : avel kevrenn dha ertach;

¹² Pan ens i hwath boghes aga niver : pur voghes, hag alyons y'n tir,

¹³ Ha pan ethons a unn genedhel dhe genedhel arall : a unn wlaskor dhe bobel arall,

¹⁴ Ny asas ev denvyth dhe wul kamm dhedha : yn tevri ev a geredhas myghternedh ragdha;

¹⁵ Na dochyewgh an re untys genev : ha na bystigewgh ow frofoesi.

¹⁶ Hag ev a elwis esow war an tir : ha terri pub lorgh a vara.

¹⁷ Ev a dhellos gour a-dheragdha : Yosef, neb a veu gwerthys yn kethwas;

¹⁸ Y dreys a bystigsons yn kargharow : y gonna a veu gorrys yn horn.

¹⁹ Bys y'n prys may teuth y er : lavar an Arloedh a'n provas.

²⁰ An myghtern a dhannvonas ha'y dhigelmi : rewler an poblow a'n delivras dhe wari.

²¹ Ev a'n gwrug arloedh y ji : ha rewler war oll y byth ev;

²² Dhe gelmi y bennsevigyon herwydh y vodh : ha dhe dhyski furneth dh'y henavogyon.

²³ Ena Ysrael a dheuth yn Ejyp : ha Yakob a drigas yn pow Ham.

²⁴ Hag ev a ynkressyas y bobel yn feur : ha'ga gul kreffa es aga eskerens.

²⁵ Ev a dreylyas aga holonn may kassens y bobel : ha dyghtya y wesyon yn fals.

²⁶ Ev a dhannvonas Moyses y was : hag Aron neb re dhewissa ev.

²⁷ I a dhiskwedhas y doknys yn aga mysk : ha marthusyon yn pow Ham.

²⁸ Ev a dhannvonas tewlder hag y tewlhas : hag i a settyas hwath erbynn y eryow.

²⁹ Ev a dreylyas aga dowrow yn goes : hag a ladhas aga fuskes.

³⁰ Aga thir a dhros yn-mes hesow a gwilkynyow : hwath yn chambouryow aga myghternedh.

³¹ Ev a gewsis, hag y teuth hesow a gelyon : ha gwibes yn oll aga oryon.

³² Ev a ros dhedha keser rag glaw : ha tan ow flammya yn aga thir.

³³ Hag ev a weskis aga gwinbrennyer ha'ga figbrennyer : ha terri an gwydh esa yn aga oryon.

³⁴ Ev a gewsis, hag y teuth hesow a lokustes, ha lokustes diaskell diniver : hag i a dhybris oll an losow yn aga thir, ha lenki frut aga dor.

³⁵ Hag ev a weskis pub kynsa-genys yn aga thir : an flour a oll aga nerth.

³⁶ Hag ev a's hembronkas yn-mes gans owr hag arghans : ha ny drebuchyas denvyth yn aga loethow.

³⁷ Ejyp a lowenhas pan ethons dhe-ves : rag own anedha a goedhsa warnedha.

³⁸ Ev a lesas kommolenn yn kudhans : ha tan dhe ri golow nosweyth.

³⁹ I a wovynnas, hag ev a dhros rynki : hag a's lenwis a vara nev.

⁴⁰ Ev a igoras an garrek, ha'n dowrow a dhewragas : avonyow a resas y'n syghtiryow.

⁴¹ Rag ev a borthas kov a'y ambos sans : hag a Abraham y was.

⁴² Hag ev a dhros y bobel yn-mes gans lowena : an re dhewisys gans garmow a lowender;

⁴³ Hag ev a ros dhedha tiryow an kenedhlow : hag i a eritas lavur an poblow;

⁴⁴ Rag may synsens y ordenansow : ha gwitha y laghys.