Salmow 104 - An Sowter 1997 2023

SALM 104. Benedic, anima mea.

¹ Bennik an Arloedh, ow enev : A Arloedh ow Duw, pur veur osta; gwiskys osta gans enor ha splannder.

² Ty a omwisk yn golow kepar hag yn kweth : ha ty a dhisplet an nevow avel kroglenn.

³ Neb a worr kebrow y jambouryow y'n dowrow : hag a wra an kommol y jarett, hag a gerdh war eskelli an gwyns;

⁴ Ev a wra y eledh spyrysyon : ha'y venystrys tan ow flammya.

⁵ Ev a fondyas selyow an nor : ma na vens i disevys bynitha.

⁶ Ty a'n kwethas gans an downvor kepar ha gans gwisk : an dowrow a sevis a-ugh an menydhyow.

⁷ Orth dha geredh i a fias dhe'n fo : orth lev dha daran i a fyskas dhe-ves.

⁸ I a yskynnas dhe'n menydhyow, i a dhiyskynnas dhe'n nansow : dhe'n tyller a dharbarsys dhedha.

⁹ Ty re worras or na yllons treusi : na treylya arta dhe gudha an nor.

¹⁰ Ev a dhyllo fentynyow y'n nansow : resek a wrons yn mysk an menydhyow.

¹¹ I a re dowr dhe bub best a'n gwel : an asynes gwyls a derr aga syghes.

¹² Rybdha y trig ydhyn an nevow : ha kana yn mysk an skorrennow.

¹³ Ev a dhowrha an menydhyow dhiworth y jambourow : an nor yw lenwys a frut dha oberow.

¹⁴ Ev a wra dhe'n gwels tevi rag an gwarthek : ha losow rag gonisogeth den;

¹⁵ May tokko boes yn-mes a'n nor, ha gwin a heudhha kolonn den : hag olew dhe wul dh'y fas dewynnya, ha bara a grevha kolonn den.

¹⁶ Gwydh an Arloedh yw leun a sugen : kederwydh Lebanon a blansas ev;

¹⁷ May hwra an ydhyn aga neythow ynna : an meryw yw chi an hwibon.

¹⁸ An menydhyow ughel yw skovva dhe'n gever gwyls : ha'n meynegi ynwedh rag an konines.

¹⁹ Ev a ordenas an loer rag prysyow settys : ha'n howl a aswonn termyn y sedhes.

²⁰ Ty a wra tewlder, ha hi a vydh nos : may slynk a-derdro oll bestes an koes.

²¹ An lewyon yowynk a us war-lergh aga freydh : hag a hwila aga boes dhiworth Duw.

²² Pan dhrehav an howl, i a omguntell war-barth : ha growedha yn aga fowys.

²³ Den a yn-mes dh'y ober, ha dh'y lavur : bys y'n gorthugher.

²⁴ A Arloedh, ass yw lower dha wriansow : yn furneth ty a's gwrug, i oll; an nor yw leun a'th kreaturs.

²⁵ Ottena an keynvor meur hag efan : may ma kreaturs ow slynkya diniver, taklow bew byghan ha bras.

²⁶ Ena yth a an gorholyon, hag ena yma Lawethan : a formsys dhe wari ynno.

²⁷ Oll an re ma a'th worta : may rylli dhedha aga boes y'n prys gwiw.

²⁸ Ty a'n re dhedha hag i a'n kuntell : ty a iger dha leuv, ha lenwys yns i a dhader.

²⁹ Pan gudhydh dha fas, dyegrys yns i : pan gemmerydh aga anall i a verow, ha treylya arta dh'aga doust.

³⁰ Ty a dhyllo dha anall ha formys yns i : ha ty a nowydhha enep an nor.

³¹ Golewder an Arloedh a dhur bys vykken : an Arloedh a lowenha yn y wriansow.

³² Ev a vir orth an nor ha'n nor a gren : ev a dav an menydhyow hag i a veg.

³³ My a gan dhe'n Arloedh hedre vewiv : my a wormel ow Duw ha my hwath yn few.

³⁴ Bedhes ow freder plegadow dhodho : my a lowenha y'n Arloedh.

³⁵ Gas peghadoryon dhe vos kisys yn-mes a'n nor, ha na as an debeles dhe besya namoy : bennik an Arloedh, ow enev; gormelewgh an Arloedh.