Salmow 10 - An Sowter 1997 2023

SALM 10. Ut quid, Domine?

¹ Prag, A Arloedh, y sevydh a-bell : prag yth omgelydh yn prysyow anken?

² An tebelwas yn y woeth a helgh an boghosek : bedhens i kechys gans an towlow a wrussons.

³ Rag an tebelwas a vost a vynnas y enev : ev a vennik an den yw kraf rag gwayn anewn ha dispresya an Arloedh.

⁴ An tebelwas yn y valghder ny'n hwila : oll y dybyansow yw, ‘Nyns eus Duw.’

⁵ Y fordhow a sewen pup-prys : yma dha vreusow a-vann yn-mes a'y wel; ev a hwyth orth y eskerens oll.

⁶ Ev re leveris yn y golonn, Ny drebuchyav : a unn henedh dhe'n nessa ny vydhav yn anken.

⁷ Y anow yw leun a vollethi ha falsuri hag arwask : yn-dann y daves yma dregynn hag anewnder.

⁸ Ev a esedh ow kontrewaytya y'n trevow : y'n kudhvaow ev a ladh an den diweres; y dhewlagas a aspi an anfeusik yn-dann gel.

⁹ Ev a gontrewayt y'n gudhva avel lew yn fow : ev a gontrewayt rag may talghenno an den boghosek.

¹⁰ Ev a dhalghenn an den boghosek : orth y denna yn y roes.

¹¹ Ev a blatt, ev a ombleg dhe'n dor : ha'n anfeusik a goedh yn y alloes.

¹² Ev a leveris yn y golonn, ‘Duw re ankovas : ev a gudh y fas, ha ny wel nevra.’

¹³ Sav, A Arloedh; A Dhuw, drehav dha leuv : na ankov an voghosogyon.

¹⁴ Prag y hwra an tebelwas dispresya Duw : ow leverel yn y golonn, ‘Ny wra ev attendya.’

¹⁵ Ty re'n gwelas, rag ty a wra vri a dhregynn ha poenvos, dh'y gemmeres y'th tiwleuv : an anfeusik a gemmynn y honan dhiso jy; ty yw gwereser an omdhivas.

¹⁶ Torr bregh an tebelwas ha'n drogoberer : hwither y sherewneth ma na vo kevys namoy.

¹⁷ An Arloedh yw Myghtern bys vykken ha bynnari : an kenedhlow res eth dhe goll yn-mes a'y dir ev.

¹⁸ Arloedh, ty re glewas desir an re uvel : ty a gennerth aga holonn, ty a wra dhe'th skovarn goslowes;

¹⁹ Dhe ri gwirvreus dhe'n omdhivas ha'n den arweskys : ma na wrello den a'n nor gorra own namoy.