Salmow 1 - An Sowter 1997 2023

SALM 1 Beatus vir, qui non abiit.

¹ Gwynnvys an gour na gerdh yn kusul an debeles, ha na sev yn fordh peghadoryon : ha na esedh yn esedhva an re a wra ges.

² Mes yma y dhelit yn lagha an Arloedh : hag yn y lagha y preder ev dydh ha nos.

³ Ev a vydh avel gwydhenn plynsys ryb goverow dowr, ow ri hy frut yn hy seson : ha ny wedher hy del; hag yn pup-tra a wra, ev a sewen.

⁴ Nyns yw yndellma an debeles : mes yth yns i avel kulyn a wra an gwyns y hwytha dhe-ves.

⁵ Rakhenna, ny sev an debeles y'n vreus : na peghadoryon yn kuntelles an re wiryon.

⁶ Rag an Arloedh a aswonn fordh an re wiryon : mes fordh an debeles a dhe goll.