Hiburu 1 - Sari

Nyɔ yɔ yɛ li bee li nuuŋ lɛ kimfimɛ ki Ŋwani-i

¹ Tɛ mɛɛŋ lindɛɛri, Nyɔ yeti li bɛte taa bɛsɛŋ li bimfimu bi bɛntomfɔŋ bee li, li kiŋga ŋge bɛ lɛ dzé chichi chichi.

² Se nuuŋ le, li jo yi lɛ kimɛrisɛ yini-i, yi yɔ yɛ li bee li nuuŋ lɛ kimfimɛ ki Ŋwani-i. Ɛ Ŋwani wuni wu yi tsaa yɛ le gii nuuŋ kinjila li biee bichu-u. Ɛ nɛɛ wu wu Nyɔ tɛ̀ tɔŋ nshɛ bɛ biee bichu kɛti li tsáŋ yee li.

³ Kiŋ'wofu ki Nyɔ-ɔ bɛndi kɛɛ li yi yee li, se gbɛŋgi nuuŋ mbosɛ yi Nyɔ kibɛɛ. Ɛ wu wu feti kiboo bɛ nshɛ se nuuŋ lu. Se feti biee bini nuuŋ nɛɛ bɛ jɛ ye yi kɛmi buŋga. Tɛ̀ maaŋ kimaaŋ ki bibifi bisɛ-ɛŋ. Le maaŋ lɛ, se yɛɛ liboo shee lɛ kibɛnɛ ki kigɔŋɛ ki Nyɔ yi Bunɔŋa-a.

Ŋwanɛ Nyɔ ko wu yaa bɛnchindaa bɛ Nyɔ-ɔ

⁴ Fi se tuu fi nuuŋ le, Nyɔ tɛ̀ fɛ Ŋwani ko ŋge yaa bɛnchindaa bɛ Nyɔ-ɔ, nɛɛ si bukooŋ bu Nyɔ tɛ̀ nyɛ wu ko tɛ ŋge bu yaa bu bee.

⁵ Tɛ kii le wu koɔ ŋge kifɛ nchindaa wu Nyɔ wumu nuuŋ yɛ lu wu Nyɔ tɛ̀ saa yi teeŋ wu le, “Ŋwani kɛ, Kɛ le bɛŋ yani mi nteeɔ le ɛ mi baa wa, kɛ.” Wumu nuuŋ yɛ lu wu tɛ̀ saa wu tee kii wuu le, “Ŋgii ni nuuŋ tee. Ni nuuŋ Ŋwanɛŋ ni.”

⁶ Tɛ̀ gii nuuŋ mfi wu Nyɔ tɛ̀ nuuŋ le yi toŋ Ŋwani wu ŋkosi wuni li nshɛ yini, yi tɛ̀ tee le, “Bɛnchindaa bɛ Nyɔ-ɔ bɛchu kɛmi le be ni be guundi wu.”

⁷ Fiee fi Nyɔ tɛ̀ tee kii bɛnchindaa bee nuuŋ fini le, “Yi ti feti be be nuuŋ si mfiee, yi feti tɛ be be nuuŋ bɛniiŋ bee bɛ nimɛ-ɛ be nuuŋ si nimi chi wi-i.”

⁸ Le tuu to li Ŋwani-i, tee le, “Hooo Nyɔ, ɔ gii naa ɔ shee li kabara wa-a ɔ ni ɔ sɛki mfi kwi ma nsiŋ. Ntsɛ wu tsaaŋ gii naa ni nuuŋ kimbaaŋ ki bumfɔŋ bwo-o.

⁹ Ɔ kɔŋgisɔɔ nuuŋ fiee fi tsaaŋ, ɔ baanini fiee fi bifi. Nɛɛ lɛ, mi wu Nyɔ yi nuuŋ Nyɔ ya mi n'yɛɛkɔɔ wɛ, ɔ yaa kintutu ko, mi se mfwaɔ wɛ bɛ mbee yi bumfɔŋ bu kinɛɛtinɛ-ɛ.”

¹⁰ Yi se tuu yi ka yi tee li Ŋwani-i le, “Taa, ɛ wɛ wu tɛ̀ tɔŋ nshɛ fɛmbɛɛchɛ-ɛ, se biee bichu bi nuuŋ liboo nuuŋ mfɛru wu tsaŋ ya.

¹¹ Biee bini gii bi ma, ɛ wɛ kwaa ɔ gii ɔ ba lu. Bi gii bi doŋ si ndu.

¹² Ɔ gii ɔ baaŋ bi si kiŋkoŋ. Ɔ gii ɔ fiiki bi si ndu yi doŋ. Se nuuŋ le, ɔ gii ɔ ba ɔ ni ɔ nuuŋ nɛɛ si ɔ nuuŋ lɛ. Biya bio nuuŋ tɛ naa ma kɛ.”

¹³ Ɛ nchindaa wu Nyɔ wu la wu Nyɔ tɛ̀ saa yi tee li wuu le, “Shee lɛ kibɛnɛ keŋ ki kigɔŋɛ-ɛ, nsiiŋ gɛɛŋ bo mfi wu mi ŋgiiki bɛniiŋ bo bɛ mbani-i wɛ limfwe si kilaanda ki bikaa bio-o, Ɔ tɔmi bikaa bio li bee ni?”

¹⁴ Mɔɔ bɛchindaa bɛ Nyɔ-ɔ bani nuuŋ nɛɛ si fiana yi nindi li Nyɔ-ɔ, bɛ yi tundi be be deŋgi be fii bɛniiŋ bɛ gii be kɛmɛ kinsofu nɛɛ ni?