Luka 6 - Evanghelu pi dupi Luka 2013

Jezus shi sëmbëta

¹ Unё xuё kënd Jezus tërcja namësa di un agur ku gërr, socjё a lluj arrupja gërr, u fërka ku mёnjli shi u mёka.

² Ndoj farisenj u tërbarё: “Këce fëcec aca ci nu prindi si fakё sёmbёta?”

³ Jezus ll'u xёsi: “A nu o-vec këntatё ci feci David kënd u llo fômja, ell shi acej ci ara ku nёs?

⁴ Kё kum intrё tu kasa a Dumёxё, llo pёni di uturjii, mёkё ishish, llu dedi shi acëllor ci ara ku nёs, pёni di aca ci lipsja s'mëka gôllë prefcjë?”

⁵ Dapoja llu xësi: “Hjiju a Omu esti domn ali sёmbёti.”

Omu ku mëna sёkatё

⁶ Unё alltё sëmbёtё Jezus intrё tu sinagogё shi ahurhji tas mvjacё ômënjjё. Ako ara un om ci o-vja mëna aca ndrapta sëkatё.

⁷ Skribёnjjё shi farisenjjё ma u vëdja ku kështigё Jezus, tas vёdja a us vëndëka sëmbëta, tas aflla un sёbepi tas s'u nxhura shi s'u parada.

⁸ Jezus u shtja ci mindua ej, tjaca i'j xësi a omu ku mёna uskatё: “Skollёti shi qindura aô namёsa!” Shi ell si skullё.

⁹ Dapoja ll'u xësi allor: “Us v'i treb: a esti ma gjini s'fac buniacё ama sёllbicё sёmbёta? S'u skaq unë banë, ama s'u shkuturresht aca?”.

¹⁰ Sh'kёnd ma i'j vëdja tuc acej ci ara afigёrra, i'j xësi a llënxёtu: “Tindu mёna”. Ell u timsi sh mëna i'j s'i vindёkё.

¹¹ Ma ej s'turbarё shi ahurhjirё s'zborrё un-ku-allant ci pot s'i'j fakё a Jezus.

Alёxera a dojspërxacëllu

¹² Aceli xëli Jezus nesi tu munti tas fëcja duvaja shi o-përi ku allёvdara Dumëxë.

¹³ Kёnd s'feci xuё ll'u gri a dishepujllu ningi nёs, alepsi dojspërxaci di nёsh shi j'a kjëmё apostuj.

¹⁴ Aiç ara: Simeon, ci i'j bёgё numa Pjetër, shi fratёsu a lluj Andrea, Jakob shi Gjon, Filip shi Bartolomeo,

¹⁵ Mateo shi Thoma, Jakob a Alfeu shi Simon ci s'a kjëma Zelltar,

¹⁶ Juda a Jakob shi Juda Iskarjot, ci u vëndu Hristollu.

Llukërrë a Hristollu shi ômënjjë

¹⁷ Jezus dupunë dadun ku nësh shi qinduri tu un bëlok zhdikis, ju ara mullc di dishepujë a lluj. Ako ara sh'mullc ômënj di tutë Judea, Jerusalem shi di marxëna a Tir shi a Sidon.

¹⁸ Avja vënitë tas avxa, shi s'i vindëka di llëngorrë a llor. Acej ci stërxja di sufulltu urrut, s'vindëka

¹⁹ sh, tuc s'çukutja tas bëga mëna pi nës, kë di Nës isha unë fuqii ci vindëka.

Hërësera shi stërxera

²⁰ Astumsëna Jezus skullë oqjë, vëxu kiti dishepuj sh'xësi: “Hara di voj ci hjic fukarenj kë a vôstë us hjibë kratu a Dumëxë!

²¹ Hara di voj ci us avec fômi kë us v'i fënëtic! Hara di voj ci tora pëllnxec kë us arrëdec!

²² Hara di voj ci ômënjjë nu us v'i vra us v'i aurrë, us v'i nxhurë shi us zbôrrë ti voj, di sebepja ci avec pistusitë lla Hjiju a Omu.

²³ Kënd s'jinë aca xuë, hërësicvë sh xhukac di hërau kë buniaca a vôstë us hjibe mari ako nxjanë Ashë ar faptë shi përincjë a llor ku profecje.

²⁴ Ma kavaj di voj ci hjic avuc, kë voj o-vec llôtë buniaca a vôstë tu aistë banë.

²⁵ Kavaj di voj ci tora o-vec pënduku plin, kë us avec fômi! Kavaj di voj ci tora arrëdec, kë us v'i sturnjupsic sh us pëllnxec.

²⁶ Kavaj di voj kënd tuc us grastë gjini ti voj, kë ashë ar faptë përincjë a-llor ku profecjë psematar!”

Vrera ti acej ci nu ni vra

²⁷ “Ma mini us v'i xëk avau ci ma m'i avxac: Vrecij acej ci nu v'i vra, fëcecëllu allor bunec.

²⁸ Dëdec ruçënj ti acej ci v'i bllastёmё, shi fëcec duvai ti acej ci v'i sturnjupsest.

²⁹ Ma kë un v'agudeshti tu unё facё, torru shi allantë. Kajcёdo ci c'ja palltollu, nu u qedëkё tas sic'ja shi tunika.

³⁰ Dёj a kujcёdo ci c'kaftё cёva, shi nu j'u ja.

³¹ Fёcec ti allanc ashё kum u s'vrec tas s'fakë allanc ti voj.

³² Kё ma s'vrec gollё acej ci v'i vra, ci buniacё avec faptё? Shi acej ci fak amartii, i'j vra acej ci ll'u fak buniacё.

³³ Shi, ma kë, ll'u fëcec buniacё gollё acëllor ci v'i fak buniacё, ju esti vlera a vostё? Shi acej ci fak amartii, ashё fak.

³⁴ Ma kë, i'j dëdec borxhi, gollë acëllor ci mintuic tas v'i l'i tôrrё, ju esti buniaca a ta? Sh urrucje ll'u da borxhi acëllor ci us ll'u tôrrё aca ci j'ar llôtё.

³⁵ Voj ajumtra, vrecij acej ci nu v'i vra, fëcecëllu bunec allor, shi dёdec borxhi acëllor ci nu ashtëptac s'v'i l'i tôrrё. Ashё us lloc unё shpërblimi mari, shi us hjic hjij d'ja ma marrё Dumёxё, kё Ell esti bun ku urrucjё.

³⁶ S'v'i jinё rrёu ti ômënj, ashё kum esti shi Dumёxёllu a vost”.

Nu nxhurrac allant

³⁷ “Nu nxhurrac, shi Dumёxёllu nu us v'i sturnjupsjastё. Nu dunuic, shi Dumёxёllu nu us v'i dunuastё. Hёrxic, shi Dumёxёllu us vi hёrxjastё.

³⁸ Dёdec, shi Dumёxёllu us v'i da. Ell us bagё tu pôlla a vôstё unё dhorё bunё, skumpё, mulltё mushatё shi mari, kё ashё kum us i'j ngjësic allanc, ashё us v'i ngjësjastё shi avau Dumёxёllu”

³⁹ Jezus ll'u spusi napoj ku meselei: “Pôti un orb s'i'j spunё kala a unuj orbu? A nu us kadё dojё tu grôpё?

⁴⁰ Dishepullu nu esti ma mari di mvëcёtoru. Shi s'l'i mvjacё tuti, us hjibё ka mvëcëtoru a lluj.

⁴¹ Këce vëdec spica tu oqu a fratёtu a tёll, shi nu vex ôrbërrё tu oqu a tёll.

⁴² Kum poc s'i'j xëc a fratёtu: ‘frate allasёmi sic skot spica di oq’, tini ci nu vex ôrbёrrё tu oqu a tёll? Psematar! Skôti ma ninti ôrbёrrё di oqu a tёll, shi dapoja us vex gjini tas skoc spica di oqu a fratёtu”.

Ôrbёrrё s'kënôshti di ponj.

⁴³ “Nu ari ôrbёri bun ci da ponj urruc, shi niki ôrbёri puturxat ci da ponj bunj.

⁴⁴ Cëdo ôrbëri s'kënôshti di ponjjё a lluj. Içvёrr nu pôti s'adunё hjici di rrux, shi niki auё di rrux.

⁴⁵ Omu bun skôti buniaca di inёma a lluj bunё, shi omu sllab skôti sëllbica di inёma a lluj urrutё, kё ci ari inëma, scôti gura.”

Dali kasi

⁴⁶ “Këce i'nj gric ‘Domne, Domne’ sh nu fëcec ci v'i xëk mini?

⁴⁷ Us v'i spun ku kaj unxeshti acell ci jini lla mini shi l'i avdi sh l'i faci aceli ci xëk zbôrrëli a njeli.

⁴⁸ Ell unxeshti ku omu ci skullё unё kasё. Arrëmё mullt ahёnda, sh amënё themelia tu shkëmbë. Kёnd vini nёkara, rrёu vini ndrept kiti kasё, ma nu u zbёtu dot di bёlok, kë kasa ara faptё vёrrtôsё.

⁴⁹ Acell ci l'i avdi, ma nu l'i faci aceli ci xёk zbôrrёli a njeli, unxeshti ku un om, ci feci unё kasё tu llok, fërё themelii. Kёnd vini rrёu, kasa s'rrustunё di-unorё sh mulltё mari ara znjia ci feci”.