Luka 5 - Evanghelu pi dupi Luka 2013

Prota adunari a dishepujllu

¹ Jezus ara ningi gjolu a Gjenesaret, sh'ômёnjjё s'pinxja ningi nës tas avxa zborru a Dumёxё.

² Ell vёxu dau varki tu marxëna di gjol, ma burbacjё avja dupunatё dit varkё shi ma lla rrjetëli.

³ Ell s'alënё tu unё di nёsi sh këftё tas s'i dёpërta di marxënё. Dapoja stёtu mpadi shi ahurhji tas mvjacё ômёnjjё di pi varkё.

⁴ Kёnd bitisi di greri, i'j xësi a Simon: “Fux ma dёparti sh aminё rrjetëli ti akëcari peshti.”

⁵ Simon i'j xёsi: “Mvëcëtor, hjim kurmac tutё nôptja sh nu avem akëcatё cëva, ma, ti hëtërja a zborru a tëll, us l'a mёnёm.”

⁶ Ashё fecёrё sh akëcarё ahtënt mullt peshti, kit ma s'dësёka rrjetëli.

⁷ Astumsёna, llu fecërё ku mёna acëllor ci ara tu allantё varkё tas vinja shi s'ja xhuta. Ej vinёrё, shi dali varki s'i umpllurё ahtёnt mullt kit ti pucёnё s'fundusja.

⁸ Kёnd u vëxu aistё gjeji, Simon Pjetri gëxu pi xënuqi dininti a Jezus shi xёsi: “O Domne, dёpërtjaxëti di mini, kё est om ku mullti amartii.”

⁹ Ell, sh tuc acej ci ara ku nёs, s'çudusirё di tutё acell peshti ci akёcarё.

¹⁰ Ako ara sh Jakob, sh Gjon, hjij dja Zebedeu ci ara kusurinj ku Simeon. Astumsёna Jezus i'j xësi a Simeon: “Nu t'ja spari, di tora us ti fac peshkatar ti ômënj.”

¹¹ Kёnd skosёrё varkili tu marxёnё ej l'allësarё tuti, shi fuxirё dupi Jezus.

Jezus vindëkё un llënxut ku lebrё

¹² Kёnd Jezus ara tu unë kasabai, vini un burbat ci ara umpllut ku lebrё. Kёnd vёxu Jezus, ell gëxu pёrdinc, shi i'j feci rixhai: “O Domne, ma s'vre tini poc tas s'mi pёstresht.”

¹³ Jezus timsi mёna, dedi pi nёs sh i'j xësi: “Voj. Pёstrjati!” Sh'lebra s'llё di-unôrё.

¹⁴ Jezus i'j xësi tas s'nu i'j spunё a içvёrruj, sh i'j xësi: “Duti lla preftu, sh fё unё kurbani ti vindёkara a ta, kum ari xësё Moisiu. Aistё as'hjibё ka dëshmii”.

¹⁵ Zborru ti Jezus s'llo di hëbari jucёdo, sh ômënjjё totëna sh'ma mullt s'aduna tas avxa sh tas s'i vindëka di llëngôrëli a llor.

¹⁶ Ma ell fuxi tu un bilok pust, sh allëvda Dumёxё.

Vindёkara a unuj ullogu

¹⁷ Unё xuё Jezus ma mvëca ômёnjjё sh ako ara ndoj farisenj sh dhaskalёnj a nomlu a Moisiu, ci avja vinitё di tuti hôrrё ali Galilei, di Judei shi di Jerusalem. Fuqia a Domnëlu ara ku Jezus tas vindёka.

¹⁸ Tu aist qëro ndoj burbac ma aducja tu unё barrelё un ullog. Ej ma s'çukutja tas su hjigё tu kasa ju ara Jezus, shi s'u bёga dininti a lluj,

¹⁹ ma nu shtja di këtu s'intrë, kë avja mullc ômënj. Dapoja s'alёnarё tu çatii, skosёrё qyramidhili sh o-punarё namёsa di kasё, dininti a Hristollu.

²⁰ Kёnd vëxu pistusera a llor, Jezus i'j xësi a ullogu: “Om, ci sёnt llati amartiili.”

²¹ Skribёnjjё sh farisenjjë ahurhjirё tas xhudёkё: “Kaj esti aist ci j'esi dininti a Dumёxё? Kaj allt di Dumёxё pôti s'lla amartiili?”

²² Jezus o-duqi mintja a llor sh xësi: “Këce mintuic ashё t'u inëma a vôstё?

²³ Ci esti ma lёshôrë s'xëc ‘c'i sënt llati amartiili’ ama ‘skôllё sh imnё’?

²⁴ Gjini, ma, tas u shtic ci Hjiju a Omu ari fuqii tas s'i lla amartiili tu aistё dunei,” i'j xësi a ullogu: “skollё, ja barrela sh fux akasё”.

²⁵ Ell si skullё di-unôrё, dininti a llor, llo barrela shi nesi akasё, sh tut allëvda Dumёxё.

²⁶ Tuc s'çudusirё, allёvdarё Dumёxё, sh ku frikё xësërё: “Azё avem vëxutё çudii.”

Akjёmara a Levi

²⁷ Dapoja Jezus ishё, vëxu un om ci aduna taksili ku numa Levi, ci stёtja apus tu trapeza a taksёllu shi i'j xësi: “Hajdi dupi mini.”

²⁸ Ell l'i allësё tuti, s'i skullё shi i'j nesi dënёpoj.

²⁹ Levi ashtërrё ti Jezus unё cinё mari tu kasa a lluj. Tu trapezё ku nёsh ara apunac mullc ômёnj di acej ci aduna taksili.

³⁰ Astumsëna farisenjjё shi skribënjjё xhuduka kondra a llor sh xëcja: “Këce mëkac shi bjec ku acej ci adunё taksëli shi ku acej ci fak amartii?”

³¹ Jezus ll'u turrё xhuvapi: “Nu sënt vërtoshjë acej ci ar nevoje ti jatërru, ma llëndëcjë.

³² Mini nu am vёnitё tas ndreg ndrepcjё, ma acej ci fak amartii, tas s'i tôrrё kiti Dumёxё.”

Presёnjli

³³ Astumsënё farisenjjë i'j xësërё a Jezus: “Dishepujё a Joan cёn presёni totёna shi allavdё Dumёxё. Ashё fak shi dishepujё a farisenjllu, ma a tёj mёkё sh bja”.

³⁴ Jezus ll'u xёsi: “A pôti s'cënё presёni krushqjё kënd garambollu esti ku nёsh?

³⁵ Ma us jinё qёrollu kënd us o-rrëqastё garambollu, shi astumsëna, tu aceli xёli, us cënё presёni.”

³⁶ Dapoja ll'u spusi unё meselei: “Içvërr nu tajë unё bukatё di stranj nou tas petёkё ku nёsë un stranj veq, kё bukata di stranj nou us'i dësikё, shi nu treci ku stranju veq.

³⁷ Içvërr nu aminё jin nou tu qeli veqi, kё jinu nou us dёsikё qela shi us'i vjarsë. Ashë sh qela us nagё qёrutё.

³⁸ Tjaca jinu nou, o-minё tu qeli nau.

³⁹ Içvërr nu vra s'bja jin dit qeli nau, kёnd ma ninti ari bjutё jin veq, kё xёci: ‘veqja esti ma bunё’”.