Luka 4 - Evanghelu pi dupi Luka 2013

Hristollu u bëgarë tu prove

¹ Jezus, umpllut ku Sëmtul Duh s'turrë di Jordan shi Sëmtul Duh o-dusi tu pustinjë.

² Ako s'bëgë tu provë di djavollu ti paturxëx di xeli. Tuti aisti xëli nu mëkë cëva shi u llo fômja.

³ Djavollu i'j xësi: “Ma esht hjij d'ia Dumëxë, xëj ashtëje shkëmbi s'i fakë pëni.”

⁴ Ma Jezus j'u turrë: “Skërëturëli a Dumëxë xëk: Omu nu bëniaxë gôllë ku pëni.”

⁵ Dapoja djavollu o-nëllcë sus shi i'j spusi tuti kraturrë ali dunei,

⁶ shi i'j xësi: “Mini us s'i'c dau tutë fuqia pisti nësi, kë nj'esti datë anjia, shi mini pot s'ju dau a kuj s'voj.

⁷ Tuti us hjibë a tëli, ma s'kax përdinc tu xënuqi, dininti a mja.”

⁸ Shi Jezus i'j xësi: “Skërëturëli a Dumëxë n'i mvjacë: Allavdu Dumëxëllu a-tëll, sh'fë gôllë ashë kum t'i mvjacë Ell.”

⁹ Dapoja djavollu o-dusi tu Jerusalem, u bëgë tu bëloku ma anallt tu tempull sh i'j xësi: “Ma esht hjij d'ja Dumëxë, arsarë di aô,

¹⁰ kë skërëturëli a Dumëxë xëk: Us ursjastë ëngjëjë a lluj tas t'i vjagje,

¹¹ sh us t'i cënë tu mënjli a llor tas s'nu c'a kacë çëçorru mpadi pi shkëmbë.”

¹² Ma Jezus i'j s'i turrë: “Skërëturëli a Dumëxë xëk: ‘Nu u bagë tu provë Domnëlu, Dumëxëllu a-tëll’”.

¹³ Kënd vëxu ci nu axhumsi cëva, djavollu s'dëpërtë di nës ti nëskënd qëro.

Ahurhji mvëcëturëli tu Galilei

¹⁴ Jezus s'turrë tu Galilei ku fuqia a Sëmtul Duh, shi ti nës s'i zhdikisi zborru jucëdo.

¹⁵ Ell i'j mvëca ômënjjë pit sinagogi sh tuc o-llëvda.

Jezus nu o-purqarë tu Nazaret

¹⁶ Jezus nesi tu Nazaret, ako ju ara kërskut. Sëmbetë, pi dupi zakoni nesi tu bëserëkë. S'i skullë tas grastë

¹⁷ sh i'j dedërë defterja a profetu Isaia. Ell u zhdikisi dëfterja sh afllë biloku ju ara skeratë:

¹⁸ “Sufëlltu a Domnëlu esti pi mini, kë ell m'jari faptë ku untulem. Tas llu spun evanghelu a fukërënjllu. M'jari pëtërkutë tas llu spun acëllor ci sënt tu skllavërii, ci esti irini, shi s'llu torr acëllor ci nu ved, oqje, tas skap acej ci sënt tu skllavërii,

¹⁹ shi s'llu spun anu ali skëpari di Domnulu.”

²⁰ U nkisi dëfterja shi s'ja punë. Oqjë a tutëllor tu sinagogë vëdja kiti nës.

²¹ Jezus ahurhji s'llu xëkë: “Azë s'umpllu aca ci ara skëratë tu skërëturëli a Dumëxë, ashë kum u avxat ku ureqli a vôsti.”

²² Tuc xëcja zborri buni ti nës, s'hërësja mullt ti zbôrrëli mintimeni ci isha di gura a lluj sh'xëcja: “Nu esti aist fiçorru a Jozef?”

²³ Jezus ll'u xësi: “Voj fërë-di-alltë us xëcec: Jatur, vindëkë llëngôra a ta. Fë sh aô tu biloku a tëll aca ci avem avxatë kë aj faptë tu Kafarnaum.”

²⁴ Sh'ma nëpoj xësi. “Us v'i xëk ku tutë mintja, kë içvërr di profecje nu esti apurqat tu biloku a lluj.

²⁵ Ma, mini ma v'i xëk kë, tu qërollu a Elia avja mullti mujer fërë burbac tu Izrael, kënd cerlu ara nkis ti tre anj shi shasi mesh, kënd tu tutë dunea gëxu urfanja ti pëni.

²⁶ Shi ku-tutë-aca Elia nu ara pëtërkut lla içvërrë di nësi, ma gollë tu Sarepta, tu biloku a Sidon, lla unë mujeri vedu.

²⁷ Tu qërollu a profetu Elia avja mullc ômënj ku lebrozë tu Izrael, sh ku-tutë-aca içvërr di nësh nu s'pëstri, gollë un, Naman di Siria”.

²⁸ Tuc acej ci ara tu sinagogë, si umpllurë ku inati kënd avxarë aisti zbôrri.

²⁹ S'i skullarë, u skôsërë nafôrë di kasabai, shi o-dusërë tu mëjaua di munti, ju ara skullatë kasabaja a llor, tas o-mëna tu unë greminë.

³⁰ Ma Jezus tërku namësa di nësh shi s'dëpërtë.

Omu ci ara umpllut ku sufulltu urrut

³¹ Jezus nesi tu Kafarnaum, tu unë kasabai di Galilei, shi i'j mvëca ômënjjë sëmbëta.

³² Ej s'çudusirë di mvëcëtura a llui, kë gra ku mulltë forë.

³³ Tu sinagogë ara un om ci ara nkërkat ku sufulltu urrut a djavollu. Ell aurra ku bôci analltë:

³⁴ “Ci aj ku noj, Jezus di Nazaret? Aj vënitë tas n'i asparx? Mini u shtiu kaj esht: Tini esht Sëmtulu a Dumëxë.”

³⁵ Ma Jezus u vërji sh xësi: “Këpsja sh esh di nës!” Sufëlltu urrut u pëskëni omu namësa di mileti, sh ishë di nës ni faptë vërrë znjii.

³⁶ Tuc s'hërësirë shi xëcja un-di-allant: “Ci esti aist zborr? Ell u urseshti sufëlltu urrut ku forca shi ell esi.”

³⁷ Ti nës s'i zhdikisi zborru jucëdo, tu tuti bilokërrë.

Vindëkara a mullc ômënjllu

³⁸ Jezus si skullё, ishё di biserëkё (sinagogё) sh'nesi tu kasa a Simeon. Sôkërsa a Simeon ara llënxëtë ku hjevërrë tiaca i'j fecërё rixhai tas u vindëkё.

³⁹ Jezus s'aplëkё pisti nёsё, vërji hjevёrrё sh eli s'dëpёrtarё. Ija s'i skullё di-unôrё sh ahurhji tas ll'u fakё ysmeti.

⁴⁰ Tu skëpëtara a sôrrё, tuc acej ci avja ômënj llёndëc, j'aducja lla Jezus. Ell bёga mënjli pisti kathi di nёsh, sh i'j vindëka.

⁴¹ Di mullc di nёsh isha sufulltu urrut (demonjjë) sh aurra: “Tini esht hjij d'ia Dumёxё.” Ma Hristollu i'j vёrja, sh nu j'allёsa tas grastё, kё ej u shtja ci ell ara Hristollu.

Jezus greshti tu Judei

⁴² Kёnd apëri xua, Jezus ishё di kasabai, sh nesi ndrept tu un bёlok shkret. Mullc ômёnj nesërё tas u kaftё, sh kёnd o-fllarё, nu o-llёsa tas s'i dëpёrta di nёsh,

⁴³ Ma Jezus ll'u xёsi: “Lipseshti tas grest ti evanghelu a kratu a Dumёxё shi tu allti kasabai, kë ti aistё est pёtёrkut.”

⁴⁴ Sh gra pit tuti sinagogëli ali Judei.