Luka 3 - Evanghelu pi dupi Luka 2013

Grera a Joan Petëxëtoru

¹ Tu cinspërxacëli di an, ci vësëjë ara Cezar Tiberi, kënd Ponc Pilat ara tu qevërria ali Judei, shi Erod ara tetrark ali Galilei, shi fratësu a lluj Filip, ara tetrark ali Iturei shi Trakonitidi, kënd Lisania ara tetrark ali Abileni,

² shi kapupreft ara Hanaj shi Kajafa, all Joan, hjijësu a Zaharia, i'j si dedi zborru a Dumëxë tu pustinjë.

³ Ell allëgë pit tuti bëlokërrë, di dali përc a rrëu Jordan, shi llu xëcja a ômënjllu tas s'i hërxja shi s'i pëtëxa, tas skëpa di amartii.

⁴ Tu kërcli a profetëllu Isaia ara skëratë: Unë boci s'avdi tu pustinjë: Fëcec etëmë kala ti Domnëlu, ndreptac kërrara a Lluj.

⁵ Tutë padja as s'i umpllë shi tuc muncjë as s'i apunë. Ndrëptac këjurrë strrëmbi shi ashtërrac, këjurrë ci v'i qedëkë.

⁶ Kathi om us u vjadë skëpara ci n'ari pëtërkutë Dumëxë.

⁷ Joan ll'u xëcja a tutëllor ci vënja ti pëtëxari lla nës: “Fëtac di nëpërtëkë, kaj v'i ari mvëcatë s'vi dëpërtac di nërrera a Dumëxë?

⁸ Spunec ishish kë hjic fapc pishmani ti amartiili ci avec faptë, shi nu xëcec ci hjim hjij d'ja Abraham. Mini us v'i xëk kë Dumëxëllu pôti s'i'j da hjij all Abraham shi di aisti shkëmbi.

⁹ Di tora pi ôrbëri esti bëgatë tëporra di rrëxëtinë. Cëdo ôrbëri ci nu faci ponj bunj, us'i tajë shi us'i ardë tu fok.”

¹⁰ Ômënjjë u tërbarë: “Kum s'fëcem dapoja?”

¹¹ Joan ll'u xësi: “Kaj ari dau tëmbër, as j'u da unë acëlluj ci nu ari. Shi acell ci ari ti mëkari, ashë s'fakë.”

¹² Vinërë t'i pëtëxari shi acej ci aduna taksëli, sh i'j xësërë: “Mvëcëtor, kum s'fëcem?”

¹³ Ell llu xësi: “Nu adunac ma mullt ci v'i si kaftë.”

¹⁴ Shi ndoj andarc u tërbarë: “Ma noj ci s'fëcem?” Joan ll'u xësi: “Nu i'j lloc a içvërruj cëva ku forcë shi ku psemati, ma kënëqësicvë ku përëllu a vost”.

¹⁵ Ômënjjë ashtëptja shi tuc mindua kë Joan ara Hristollu.

¹⁶ Astumsëna Joan ll'u xësi: “Mini ma v'i pëtex ku apë, ma, ma jini Un ma vërtos di mini, ci nu pot tas s'i'j zdëleg niki pëpucëli. Ell us s'vi pëtjaxë ku Sëmtul Duh shi ku fok.

¹⁷ Ell ari ndreptjaca tas parcë gërru di pajë. Gërru us o-dunë tu hëmbara a lluj, shi paja us u ardë tu foku ci nu us s'aplakë pote.”

¹⁸ Joan ll'u dëdja hëbara bunë a tutëllor shi ku mullti allti mvëcëturi.

¹⁹ Tetrarku Herod, Joan o-vja nxhuratë shi vërjitë ti sebepja ali Herodiati, mujerësa a fratësu a lluj, shi ti mullti rrutjec ci avja faptë.

²⁰ Ell feci shi unë rrutjacë: u hjipsi Joan tu hapsi.

Pëtëxara a Jezus

²¹ Kënd s'pëtëxarë mullc ômënj, s'pëtëxë shi Jezus, sh'kënd fëcja allëvdara s'i zhdikisi cerlu,

²² shi pisti nës s'apunë Sëmtul Duh ku prosupu a unuj pëllumbu. Astumsëna s'avxë unë boci di sus: “Tini esht Hjiju a njell, vrutu. Ku tini est kënëqësit”.

Rrëxëtinjli a Hristollu

²³ Kënd ahurhji llukërru a lluj Hristollu ara trexëc di anj. Ômënjjë u shtja kë ara ficor a Jozef. Jozef ara hjij a Elia,

²⁴ hjij a Matat, hjij a Levi, hjij a Melkiu, hjij a Janai, hjij a Jozef,

²⁵ hjij a Melkiu, hjij a Amos, hjij a Naum, hjij a Esliu, hjij a Nagai,

²⁶ hjij a Mahat, hjij a Matatis, hjij a Semeini, hjij a Joseku, hjij a Joda,

²⁷ hjij a Joananu, hjij a Resa, hjij a Zorobabel, hjij a Salatiel, hjij a Neri,

²⁸ hjij a Melkiu, hjij a Abiu, hjij a Kosam, hjij a Elmadam, hjij a Eri,

²⁹ hjij a Jozuei, hjij a Eliezeru, hjij a Jorim, hjij a Matat, hjij a Levi,

³⁰ hjij a Simeon, hjij a Juda, hjij a Jozef, hjij a Jonam, hjij a Eliakim,

³¹ hjij a Melea, hjij a Menai, hjij a Matat, hjij a Natam, hjij a David,

³² hjij a Jeseu, hjij a Jobed, hjij a Booz, hjij a Salai, hjij a Naason,

³³ hjij a Aminadabi, hjij a Admin, hjij a Arn, hjij a Estom, hjij a Fares, hjij a Juda,

³⁴ hjij a Jakob, hjij a Isak, hjij a Abraham, hjij a Tarai, hjij a Nahor,

³⁵ hjij a Seruk, hjij a Ragai, hjij a Falek, hjij a Eber, hjij a Salai,

³⁶ hjij a Kainam, hjij Arfaksad, hjij a Sem, hjij a Noeu, hjij a Lamek,

³⁷ hjij a Matusalai, hjij a Enok, hjij a Jaret, hjij a Maleleel, hjij a Kainam,

³⁸ hjij a Enou, hjij a Seti, hjij a Adam, hjij a Dumëxë.