Luka 24 - Evanghelu pi dupi Luka 2013

Injjara a Hristollu

¹ Sëmbëtë nu llukrarë pi dupi skirëturëli a Moisiu. Dumënëkë di dimjaca, mujerrë vinërë lla mirëmint ku untulemu ku njurizmë bunë ci avja faptë etëmë.

² Eli o'fllarë shkëmba a mirëmintu zhdikisë,

³ s'hjipsërë nunt, ma nu o-fllarë trupu a Hristollu.

⁴ Eli ara çudusiti di aistë gjëji sh di-unôrë s'i funusirë dininti a llor doj burbac mvëskuc ku stranji skëpërôsi.

⁵ Mujerrë l'i akëcë frika, sh gëxurë përdinc, ma burbacjë xësërë: “Ti ci u këftac jiu namësa di morc? Ell nu esti aô. Esti injjat.

⁶ Aduqicvë ci v'i xësi kënd ara tu Galilei,

⁷ kë Hjiju a Omu us'i vindja lla amartiosjë, us'i kurrfusja, sh dupi tre xëli us injja”

⁸ Eli l'aduqirë zbôrrëli a lluj,

⁹ sh kënd s'turrarë di lla mirëmint, ll'u spusërë a unspërxacëllu sh allëntor ti tuti ci avja vëxutë.

¹⁰ Ara Maria Magdalena, Joana, Maria, mësa a Jakob, shi allanti mujer, ci stëtja ku nësi. Eli i'j l'i spusërë aisti gjëji a apostullor,

¹¹ ma ej nu l'i pistusirë kë ll'o-spëra çudii aisti zbôrri.

¹² Sh ku-tutë-aca Pjetru s'i skullë sh nesi ntrôrë lla mirëmint. S'i apunë sh vëxu nunt. Ell vëxu gôllë stranjli shi s'turrë akasë mullt hërësit ti aca ci ara faptë.

Kala pën ti Emaus

¹³ Aca xuë doj di nësh ma fuxja tu unë hôrë ku numa Emaus, ci esti aprôpja unspërxaci di kilometri aprôpja di Jerusalem.

¹⁴ Ej ma zburra un-ku-allant ti tuti llukërrë ci ara fapti.

¹⁵ Kënd zburra un-ku-allant, Jezus s'i apurqë shi imnë dadun ku nësh,

¹⁶ ma ej, kë ci i'j qëdëka tas u kunushtja.

¹⁷ Ell ll'u xësi: “Ti ci ma zburrac un-ku-allant?” Ej qindurirë murzuic.

¹⁸ Astumsëna un di nësh, ci s'akjëma Kleopa, i'j xësi: “Gôllë tini esht un singur tu Jerusalem, ci nu u shti ci esti faptë ako aisti xëli?”

¹⁹ Ell tërbë: “Ci esti faptë?” Ej i'j spusërë: “Jezus di Nazaret, ara un profet mari ku llukëri sh ku zbôrri dininti a Dumëxë sh dininti a tuc ômënjllu,

²⁰ sh ma mërjë a prefcëllor shi a shtëlluj biloku, u dunuirë shi u kurrfusirë.

²¹ Noj pistusjam kë Ell us skëpa Izrael, ma s'i fecërë tre xëli ci sënt fapti aisti llukëri.

²² Ndau mujer di parea a nôstë n'i ar çudusitë. Eli ara azë dëmjaca lla mirëmint

²³ sh nu o-fllarë trupu a lluj ako. Eli vinërë sh n'i xësërë, kë ll'u sënt funusitë ëngjëj, ci ll'or xësë kë Ell esti jiu.

²⁴ Ndoj di acej ci ara ku noj, nesërë lla mirëmint shi o-fllarë ashë kum ll'o-vja xësë mujerrë, ma Ell nu u vixurë.”

²⁵ Astumsëna ell ll'u xësi: “Ômënj fërë minti sh fërë pistuseri, ci v'i ar xësë tuc profecjë!

²⁶ A nu lipsja ci Hristollu s'i sturnjupsja, s'l'i stërrxja aisti ci s'fecërë, sh dapoja s'intra tu tinjia a lluj.”

²⁷ Dapoja ell ll'u spusi ti tuti sëmtëli Skirëturi, ci xëcja ti nës, ahurhji di Moisiu pën lla tuc profecjë.

²⁸ Kënd s'apurqarë tu hôra ci ma nëxja, Hristollu tërku dininti, kanda vra tas fuxja,

²⁹ ma ej i'j fecërë rixhai sh i'j xësërë: “Stë ku noj, kë ma jini sjara, sh xua ma bitiseshti.” Astumsëna Ell nesi shi stëtu ku nësh.

³⁰ Kënd ara tu trapezë ku nësh, llo pëna, feci duvaja a ruçënjëllu, u frrëmsi sh ll'u dedi a llor.

³¹ Tu aist qëro, allor ll'u s'i zhdikisërë oqjë, sh u kënëskurë, ma Ell s'i dëpërtë di nësh.

³² Ej xësërë un-di-allant: “A nu n'i ardja inëma kënd n'i zburra kala sh kënd n'i spunia ti sëmtuli Skërëturi?”

³³ Di-unôrë s'i skullarë sh fuxirë tu Jerusalem, ju afllarë unspërxacëjë sh allanc, ci ma stëtja ku nësh dadun.

³⁴ Ej xëcja: “Hristollu esti injjat darihënja sh i'j esti spus a Simon.”

³⁵ Astumsëna doj dishepujë ll'u spusërë ci avja unxitë kala, shi kum ara fapt kënëskut kënd frrëmsi pëna.

Jezus vini dininti a dishepujllu

³⁶ Ej ma zburra ti aisti llukëri, kënd Jezus qinduri namësa di nësh sh ll'u xësi: “Irini s'hjibë ku voj!”

³⁷ Ej s'aspërarë sh minduirë kë ma vëdja un sufullt.

³⁸ Ma Ell ll'u xësi: “Këce avec frikë, sh këce hjic ka pi ndojla tu inëma a vôstë?

³⁹ Vëdec mënjli sh çëçôrrë a njeli. Est mini. Akëcacmë ku mëna sh us'u vëdec. Sufëlltu nu ari karrë shi ôsi kum m'i vëdec ci am mini.”

⁴⁰ Sh dupi aisti zbôrri ll'u spusi mënjli sh çëçôrrë.

⁴¹ Ma ej ninga nu pistusja di hërau shi s'çudusja. Hristollu ll'u xësi: “Avec cëva ti mëkari?”

⁴² Ej i'j dedërë unë bukatë di peshti kopt.

⁴³ Ell u llo, sh u mëkë dininti a llor.

⁴⁴ Astumsëna ll'u xësi: “Aisti zbôrri v'i am xësë kënd aram ninga ku voj. Tuti ci sënt skërati ti mini tu nomlu a Moisiu, tu Skërëturëli a profetëllu sh tu psalm, prindi s'i fakë.”

⁴⁵ Dapoja ll'u zhdikisi mintja tas aduqa sëmtuli Skërëturi

⁴⁶ sh xësi: “Tu sëmtuli Skërëturi s'i spuni: Hristollu prindi s'strragë shi s'injjaxë dupi tre xëli

⁴⁷ shi ti tuti kraturrë us'i spunë skëpara di amartiili a llor. Us ahurhjastë dit Jerusalem.

⁴⁸ Voj hjic shait ti aisti llukëri.

⁴⁹ Ja mini ma v'i pitrek zbôrru a Përintili a njell, tiaca stëtec aô tu kasabai pënd s'vi mvështec ku fuqia di sus.”

Jezus s'i skullë tu cerl

⁵⁰ Dapoja dadun ku nësh, nesi pën di Betani, skullë mënjli shi ll'u dedi ruçënjli.

⁵¹ Kënd ma dëdja ruçënjli, s'dëpërtë di nësh shi s'anëllcë sus tu cerl.

⁵² Ej ô-llëvdarë shi s'turrarë ku mari hërau tu Jerusalem,

⁵³ ju stëtja totëna tu tempull shi allëvda Dumëxë.