Luka 22 - Evanghelu pi dupi Luka 2013

Komplotu ti Hristollu

¹ Ma s'apurqa jurtia a Pënjllu Fërë Ullôt, ci s'akjëma Pashti.

² Prefcjë shi skribënjjë këfta kum s'u bëga n'turmënë Jezus, tas u vëtëma, ma avja frikë di mileti.

³ Astumsëna Satan intrë lla Juda ci o-kjëma Iskarjot. Ell ara un di dojspërxaxëjë.

⁴ Aist nesi s'i ja di hëbari ku prefcjë sh ku asqerjë, kë kum us'u parada tu mënjli a llor, Hristollu.

⁵ Ej s'hërësirë mullt shi gëxurë tu unë minti s'i'j dëdja prax.

⁶ Ashë, Juda apurqë sh këfta qërollu tas u parada Jezus kënd nu avja ômënj.

Cina a Pashtëli

⁷ Kënd vini xua ali jurtii a Pënjllu Fërë Ullôt, kënd s'fëcja kurbani njellu a Pashtëli,

⁸ Jezus pëtërku Pjetru shi Gjon, sh ll'u xësi: “Fuxic sh fëcec etëmë cina tas mëkëm Pashtili.”

⁹ Ej u tërbarë: “Ju vre s'u fëcem etëmë?”

¹⁰ Jezus ll'u xësi: “Avxac, kënd s'intrac tu kasabai, us afllac un om ci ari unë shtambë ku apë. Ducecvë dupi nës pën lla kasa ju us intrë ell,

¹¹ sh xëcecij a domësu ali kasi: ‘Mvëcëtoru n'ari pëtërkutë s't'i tërbëm: ju esti dhoma ju putem s'mëkëm Pashtili ku dishepujë a njej?’

¹² Ell us v'i spunë unë dhomë mari, nxjanë, ci esti faptë etëmë. Ako ashtërracu cina.”

¹³ Ej nesërë, l'afllarë tuti kum ll'ovja xësë Jezus, sh u fecërë etëmë cina a Pashtili.

Cina a Jezus

¹⁴ Kënd vini qërollu, Jezus s'i apunë ti mëkari dadun ku dishepujë.

¹⁵ Ell ll'u xësi: “Kit am vrutë s'u mëk aist Pashti ku voj, ma ninti ali stërrxeri,

¹⁶ kë, ma v'i xëc, nu us mëk alltôrë di aist Pashti pënd s'i fakë aca tu kratu a Dumëxë.”

¹⁷ Dapoja llo kupa, feci allëvdara ti Dumëxë sh xësi: “Llocu shi përcacu aistë tuc voj.

¹⁸ Mini ma v'i xëk, kë di tora nu us bjeu më jin, pën kënd s'jinë kratu a Dumëxë.”

¹⁹ Dapoja llo pëna, xësi allëvdara, u frrëmsi pëna, ll'u dedi a dishepujllu sh xësi: “Aist esti trupu a njell, ci esti dat ti voj. Fëcecu aistë tas m'i aduqic anjia.”

²⁰ Ashë, dupi cinë, feci sh ku kupa di jin, sh xësi: “Aistë kupë esti besa aca naua, tu sënxëli a njell, ci us'i vjarsë ti voj.

²¹ Ma, ja, mëna a cëlluj ci ma m'i vindi, esti ku mini tu trapeze.

²² Hjiju a Omu, ma nexi ashë kum esti skiratë, ma kavaj di acell ci ma u vindi.”

²³ Astumsëna, ej ahurhjirë tas trabë un-allant, kë kaj pôti s'ara acell ci us'u fëcja aistë gjëji.

Kaj esti ma mari

²⁴ Namësa di dishepuj intrë un sherr, kë kaj di nësh us'i akjëma ma mari.

²⁵ Ma Jezus ll'u xësi: “Vësëjëllu a cëllor ci nu pistusest i'j urseshti ej, sh acej ci sënt pisti nësh, s'i akjamë ômënj ci fak sevapi.

²⁶ Ku voj nu prindi s'i fake ashë. Ajumtra, ma marrë di voj prindi s'i fakë ma njik, shi kapu a tutëllor si fakë ka ysmeqarru a llor.

²⁷ Kaj esti ma mari, acell ci esti tu trapezë ama acell ci faci ysmeti? A nu esti acell ci sta tu trapeze? Ma mini est namësa di voj ka acell ci faci ysmeti.

²⁸ Voj hjic acej ci avec stëtutë ku mini, tu tuti provili a njeli,

²⁹ sh mini ma v'i allas avau kratu, ashë kum nj'o-llësë anjia Përintili a njell,

³⁰ ci voj s'putec s'mëkac shi s'bjec tu trapeza a kratu a njell. Voj us stëtec pit fronurrë tas ll'u fëcec gjyqi a dojspërxaci di fisurrë a Izrael”.

Hristollu paraxësi aca ci Pjetru us'u fakë asha

³¹ “Simon, Simon, ja djavollu këftë s'v'i trakë tu cir ka gërru,

³² ma mini am faptë duvai tas nu t'i dëpërtex di pistusera a ta. Shi tini kënd s'ti torr, fëj ma vërrtosh fracjë a tej.”

³³ Pjetru i'j xësi: “Domne, mini est etum tas jin ku tini, tu hapsani sh tu môrti”.

³⁴ Ma Jezus j'u turrë: “Pjetër, mini us i'c xëk kë azë nu us ajbë këntatë ninga këkotu, ma ninti ci tini us m'i fac asha tre or, ci nu m'i kënosht.”

Prax, trastu shi jataganu

³⁵ Dapoja Jezus ll'u xësi: “Kënd v'i pëtërkuj fërë prax, fërë trast sh fërë pëpucë, v'i lipsja cëva?” Ej i'j xësërë: “Içcëva”

³⁶ Astumsëna Ell ll'u xësi: “Ma tora kaj ari prax, as l'i ja dinëpoj, shi acell ci ari trast. Kaj nu ari këcut as vindë palltollu a lluj shi s'kupërë un jatagan.

³⁷ Mini us v'i xëk kë, ku mini us'i fakë aca ci esti skërate tu sëmtili Skirëturi ci xëk: ‘S'bëgë tu unë radhë ku kriminelënjjë,’ shi darihënja, aca ci esti xësë ti mini ma si faci.”

³⁸ Ej i'j xësërë: “Domne, ja aô sënt doj jataganj”. Ell ll'u turrë: “Axhung”.

Tu Muntili a Masënjllu

³⁹ Jezus ishë sh nesi tu Muntili a Masënjllu, kum o-vja zënati, sh dishepujë nesërë dupi Nës.

⁴⁰ Kënd axhumsërë ako, ll'u xësi a dishepujllu: “Fëcecij duvai a Dumëxë tas nu këdec tu amartii”

⁴¹ Dapoja s'dëpërtë di nësh kit s'aminë unë shkëmbë, gëxu përdinc sh feci duvai ashë:

⁴² “Përinte, ma vre, dëpërtjaxu aistë kupë di mini. Sh ku-tutë-aca asi fakë ashë kum aj xësë tini, nu mini!”

⁴³ Dapoja i'j si funusi un ëngjëll dit cerl shi i'j dedi fuqii.

⁴⁴ Kënd o-këcë trumburara ali môrti, ell feci sh ma mullë duvai. Astumsëna sëdôra a lluj s'feci ka qikutë di sënxi ci këdja mpadi.

⁴⁵ Kënd si skullë, vini lla dishepuj sh j'afllë tu som di stinahori.

⁴⁶ Astumsëna ll'u xësi: “Këce ma durnjic? Skullacvë sh fëcec duvai tas nu këdec tu amartii”.

Jezus u llôrë hapsi

⁴⁷ Kënd Jezus ma zburra, vinërë unë parei mari ku un di dojspërxacëjë, ci ll'u spunia kala. Aist ara Juda. Ell i'j s'apurqë a Jezus tas u bashë,

⁴⁸ ma Jezus i'j xësi: “Judë, ku bëshari ma u vinx Hjiju a Omu?”

⁴⁹ Kënd vëxurë ci ma s'fëcja, acej ci ara afigërra di nës, i'j xësërë: “Domne, s'i'j agudim ku jatagan?”

⁵⁰ Astumsëna un di nësh o-gudi ysmeqarru a ma marrë a prefcëllor, sh i'j tëjë ureqja ndraptë,

⁵¹ ma Jezus i'j xësi: “Allësacu ku ahtënt!” Dapoja o-këcë ku mëna ureqja a lluj sh u vindikë.

⁵² Jezus ll'u xësi a prefcëllor, asqerëllor sh aushëllor ci avja vinitë ti nës: “Avec vinitë tas m'i lloc ku jatagan sh ku lemi, kanda s'aram fur?

⁵³ Mini aram kathi xuë ku voj tu tempull, sh nu m'i akëcat, ma aistë esti sahatja a vôstë sh qërollu llaj.”

Pjetru u faci asha Jezus

⁵⁴ Dapoja o-këcarë, u llôrë Jezus sh o-dusërë lla kasa a ma marrë a prefcëllu, shi Pjetru nëxja dënëpoj di dëparti.

⁵⁵ Ako avja aprasë un fok namësa di oborr, ara apunac tuc dadun sh Pjetru ara namësa di nësh.

⁵⁶ Unë ysmeqarë u vëxu Pjetru apunat ningi fok, i'j mpëlltë oqjë sh xësi: “Sh aist om ara ku nës”.

⁵⁷ Ma Pjetru u feci asha sh xësi: “Mujeri, mini nu u kënost acell.”

⁵⁸ Pucën ma nëpoj, un allt u vëxu Pjetru sh xësi; “Sh tini esht un di nësh”. Ma Pjetru xësi: “Nu est, more om.”

⁵⁹ Dupi vërrë sati, sh un allt bëgë çëçôrrë: “Darihënja ci sh ell ara ku nës, kë esti galileas.”

⁶⁰ Ma Pjetru xësi: “Bre om, nu u shtiu ti ci ma zburrac”. Sh di-unôrë, ni bitisit zborru, këntë këkotu.

⁶¹ Astumsëna Jezus s'turrë sh vëxu Pjetru. Alluj i'j s'i aduqirë zbôrrëli a Jezus kënd i'j xësi: “Azë, ma ninti ci us këntë këkotu, tini us m'i fac asha tre or”.

⁶² Dapoja ishë nafôrë sh pllëmsi ku boci.

Hristollu u bëturë shi s'arrëdja ku nës.

⁶³ Ômënjjë ci u vëgja Jezus, s'arrëdja ku nës shi u bëtja.

⁶⁴ Ej i'j lëgarë oqjë sh u tërba: “Afllu kaj t'i agudi?”

⁶⁵ Shi u nxhura ku mullti allti zbôrri.

Hristollu dininti a sinedru

⁶⁶ Kënd s'feci xuë, s'i adunarë aushjë a ômënjllu, ma mërjë a prefcëllu, a skribënjllu, sh o-dusërë Hristollu lla konsullu a llor,

⁶⁷ sh i'j xësërë: “Ma esht Hristollu, spunëni”. Ma Hristollu ll'u xësi: “Shi s'v'i xëk nu us m'i pistusic,

⁶⁸ sh ma s'v'i treb nu us nj'u turrac,

⁶⁹ ma di tora Hjiju a Omu us'i apunë di na-ndrapta a Dumëxë mari”.

⁷⁰ Astumsëna tuc xësërë: “A esht tini Hjiju a Dumëxë?” Shi Hristollu ll'u xësi: “Voj ma u xëcec. Mini est”.

⁷¹ Sh ej xësërë: “Ci alltë provë n'i lipseshti? Ovxëm ishish di gura a lluj”.