Luka 20 - Evanghelu pi dupi Luka 2013

Pëtëxara a Joan

¹ Unë xuë kënd Jezus mvëca ômënjjë tu tempull, sh llu spunia ti evanghelu, vinërë prefcjë, skribënjjë sh aushjë

² shi i'j xësërë: “Spunëni a nau ku ci forcë l'i fac aisti llukëri? Kaj c'ôri datë aistë fuqii?”

³ Sh Ell ll'u xësi a llor: “Us v'i treb sh mini a vau un zborr shi spunecinj.

⁴ Pëtëxara a Joan s'fëcja dit cerl ama di ômënj?”

⁵ Ej s'i minduirë sh xëcja un-ku-allant: “Ma s'xëcem ‘dit cerl’, us n'i xëkë: ‘Këce nu u pistusit acell?’”

⁶ “Ma s'xëcem ‘di ômënj’, miletja us n'i vatëmë ku shkëmbi, kë u shtja ci Joan ara preft”.

⁷ Tjaca i'j xësërë: “Nu u shtim di këtu vinia”

⁸ Sh Jezus ll'u xësi: “Sh mini nu v'i spun a vau, ku ci fuqii l'i fak aisti gjëji”.

Agurru ku auë sh domësu

⁹ Jezus ahurhji s'i'j spunë a ômënjllu aistë parabolë (meselei): “Un om sëmënë auë. L'i dedi tas l'i llukraxë llukërtorjë, sh fuxi tu un bilok dëparti ti mullc anj.

¹⁰ Kënd vini qërollu tas adunë auëli, pëtërku un ysmeqar lla llukërtor tas i'j dëdja partja a lluj, ma ej u bëturë shi u nqësirë ku mënjli gôlli.

¹¹ Dapoja pëtërku un ysmeqar allt. Sh acell u bëturë, s'i arrësërë ku nës, shi u nqësirë ku mënjli gôlli.

¹² Napoj pëtërku un allt, ma sh aist u pluguirë shi o-urrarë.

¹³ Sh nikuqirru a agërru xësi: ‘Ci s'fak? Us pëtrek hjiju a njell, acell vrutu, kë vëhj s'i arrushuniaxë di nës’.

¹⁴ Ma kënd u vëxurë hjijësu, llukërtorjë zburrarë un-ku-allant.: ‘Aist esti acell ci us l'i qërdhësjastë. S'u vëtëmëm sh ashë auëli us n'a rrëmënë a nau’.

¹⁵ Dapoja o-urrarë dit agur shi u vëtëmarë. Ci us ll'u fakë a llor domësu a agërru?

¹⁶ Ell us jinë, us i'j vatëmë acej llukërtor, shi us ll'u da agërru allëntor”. Kënd ovxarë aistë gjëji, ômënjjë xësërë: “Dëparti s'hjibë!”

¹⁷ Ma Jezus amënë oqjë kiti nësh sh xësi: “Ci vra s'xëkë aisti zbôrri di sëmtëli Skërëturi: ‘Shkëmba ci masturjë o-rrukarë nkllo, axhumsi ci s'feci shkëmba dit qoshi?’

¹⁸ Kajcëdo ci kadi pi aca shkëmbë, us'i fakë bukëc, sh ma kë shkëmba kadi pisti vërr, us'u vatëmë”.

¹⁹ Skribënjjë sh prefcje o-duqirë ci Jezus o-vja xësë aistë parabolë ti nësh, tjaca vra tas u bëga nturmënë tu aca ôrë, ma avja frikë di ômënj.

Taksa ti Çezar

²⁰ Ej ahurhjirë tas u bëga orë Jezus, tiaca i'j bëgarë dënëpoj spiunëjë, ci s'i stërrxja ka ômënj tinjisic. Aistë u fecërë tas o-këca tu llath tu vërr zborr, sh ashë s'u parada lla ômënjjë ali qevërrii.

²¹ Ej u tërbarë: “Mvëcëtor, noj u shtim kë tini gresht sh mvec gjini, kë nu t'i pinxi vërr, ma ll'u spunj a ômënjllu darihënja kala a Dumëxë.

²² A esti ndrept tas s'i'j pulltim a Çezar taksëli, ama nu?”

²³ Ma Jezus o-duqi ileja a llor shi ll'u xësi:

²⁴ “Spunecinj unë monedhë. Ci kap esti pi aistë monedhë?” Ej i'j xësërë: “A Çezar”.

²⁵ Jezus ll'u xësi: “Astumsëna dëdecij a Çezar, aca ci esti a Çezar, shi a Dumëxë, aca ci esti a Dumëxë”.

²⁶ Ashë ej nu pëturë tas o-kacë tu zborr dininti ali mileti, s'çudusirë ku zborru a lluj, sh këpsirë.

Injjara

²⁷ Vinërë lla Jezus ndoj saducenj. Aiç xëk kë nu ari injjari

²⁸ tjaca u tërbarë: “Mvëcëtor, Moisiu n'ari allësatë skiratë: Ma kë a unuj omu i'j môri fratësu, sh allasë dënëpoj mujera fërë fumejë, aist prindi s'i sôrë ku mujera vedu, tas allasë fumejë ti fratësu.

²⁹ Ara unorë shapti frac. Un di prota s'i sure sh'nu allësë cilëmanj,

³⁰ allant,

³¹ dapoja sh'allanc s'i surarë ku mujera a lluj, sh shaptëjë nu allësarë cilëmanj kënd murirë.

³² Tu fund muri sh mujera.

³³ Dupi injjari mujera a kuj us hjibë ija, pedhis ci shaptëjë o-vja ti mujeri?”

³⁴ Jezus ll'u xësi: “Ômënjjë a shtëje dunei s'i sôre shi s'mëritë,

³⁵ ma acej ci sënt bunj ti allantë banë, shi us axhungë s'injjaxë di mort, niki us'i sôrë, sh niki us'i mëritë.

³⁶ Ej nu pot s'môrë napoj, kë sënt ka ëngjëj, sh sënt hjij di'a Dumëxë, kë sënt hjij di injjari.

³⁷ Sh Moisiu ari spusë kë morrcjë us injjaxë kënd s'o-kjamë Domnu, Dumëxë all Abraham, Dumëxë a Isak sh Dumëxë a Jakob.

³⁸ Domnu nu esti Dumëxë a morcëllu, ma acëllor ci sënt jinj, kë tuc bëniaxë ti Dumëxë.”

³⁹ Astumsëna ndoj farisenj i'j xësërë: “Mvëcëtor, u xësesh mullt gjini”.

⁴⁰ Sh nu avja nakërrë tas u trabë më.

Hjij di'a David

⁴¹ Dapoja Jezus ll'u xësi: “Kum pot s'xëkë kë Hristollu esti hjij di'a David?

⁴² David ishish xësi tu skirëturëli a Psalmu: I'j xësi Domnu, a Domnëlu a njell: Stë di na ndrapta a mja,

⁴³ pën kënd s'i'j bag acej ci sënt kondra ku tini Sum çëçôrrë a tëli.

⁴⁴ Afu David o-kjamë ‘Domne’, kum pôti s'hjibë Ell hjiju a lluj?”

Jezus vërjeshti skribënjjë

⁴⁵ Kënd tutë miletja ma avxa, Jezus ll'u xësi a dishepujllu a lluj:

⁴⁶ “Vëgjacvë di skribënjjë, ci vra tas fakë peripato ku stranji llunx, shi arësest tas i'j tinjisjastë pit pëx, s'akacë bilokërrë buni pit sinagogi, sh bilokërrë tinjisiti pit jurtii.

⁴⁷ Ej arrëqest ci afllë pit kasëli a mujerëllu fërë burbac, sh fak duvai llunx, tas s'i'j vjadë allanc. Ashë ej us ja unë dunueri ma grau”.