Luka 2 - Evanghelu pi dupi Luka 2013

Amëntara a Hristollu

¹ Aceli xëli, Cezar August skôsi unë dekreti tas fëcja skërara a ômënjllu.

² Prota skërari ara faptë kënd Kuirini ara ma marrë tu Sirii.

³ Tuc nëxja tas s'i skëra pit bilokërrë a llor.

⁴ Shi Jozef, ci ara di Galilei, di kasabaja a Nazaret, nesi tu Judei, tu biloku a David, ci s'ja kjëma Betlehem, kë ara di kasa shi di fisja a David,

⁵ tas s'i skirë dadun ku Maria, ku susita a lluj, ci ara grau.

⁶ Kënd ara tu Betlehem i'j vini qërollu tas amintë,

⁷ shi amëntë fiçorru a je. O-vërrti tu kullpënj, shi u bëgë tu grazhd, kë tu han nu avja bëlok goll, ti nësh.

Pikurarjë shi ëngjëjë

⁸ Tu acell bilok ara ndoj pikurar ci tërcja nôptja pit aguri shi pështja kupia.

⁹ Un ëngjëll a Domnëlu i'j s'i funusi allor shi s'ja vërrtirë ku llunjina a Dumëxë. Ej s'ja spërarë mullt,

¹⁰ ma ëngjëllu llu xësi: “Nu v'ja spërac! Ja, us v'i dau unë sihariqi bunë, unë hërau mari ti tuc ômënjje:

¹¹ Azë, tu kasabaja a David amintë ti voj acell ci us v'i skapë, ci este Hristollu Domn.

¹² Nojma ti voj us hjibë aistë: us afllac un çilëman avërrtit tu kullpënj ci dôrmi tu grazhd.”

¹³ Dadun ku ëngjëllu vinërë shi mullc allc ëngjëj dit Cerl, ci allëvda Dumëxëllu ashë:

¹⁴ “Allëvdat s'hjibë Dumëxëllu nxjanë tu cerl, irini shi buniacë s'ajbë ômënjjë ci Ell j'ari tu inëmë.”

¹⁵ Kënd s'dëpërtarë ëngjëjë di nësh, shi s'turrarë tu cerl, pikurarjë xësërë un-di-allant: “S'nëxem tu Betlehem, s'vëdem ci ari unxitë, ku aca ci n'ari spusë Domnëlu.”

¹⁶ Ej di-unôrë nesërë shi ofllarë Maria ku Jozef, shi fiçorru a llor bëgat tu grazhd.

¹⁷ Kënd u vëxurë, spusërë aca ci ll'u ara xësë ti çilëman.

¹⁸ Tuc acej ci avxarë, arrëmasërë çudusic di aceli ci avxarë di pikurar.

¹⁹ Maria l'i vëgja shi l'i mintjua tuti aisti tu inëma a je.

²⁰ Dapoja pikurarjë s'turrarë, shi allëvdarë Dumëxë ti tuti ci vëxurë shi avxarë, ashë kum ll'u ara spusë.

²¹ Dupi optu xëli, kënd u fecërë synet, i'j bëgarë numa Jezus, numa ci avja xësë ëngjëllu ma ninti ci us gëdja tu pëndëku a mësa.

Jezus, çilëman tu tempull.

²² Kënd tërkure xëlëli ti pëstrera a llor tu tempull, pi dupi nomlu a Moisiu, Jozef shi Maria o-dusërë Jezus tu Jerusalem, tas o-punë dininti a Domnëlu,

²³ ashë kum esti skërati tu skërëturëli a Domnëlu: “Kathi protu fiçor us i'j s'i parada a Domnëlu,

²⁴ shi us fakë kurbani doj turtuj iti doj pëllungj njic.”

²⁵ Tu acell qëro, bëna tu Jeruzalem un om ku numa Simeon. Aist om ara mullt ndrept dininti a Dumëxë. Sëmtul Duh ara ku nës.

²⁶ Sëmtul Duh j'avja zdëvëlitë, kë nu us mura n'i vëxut Hristollu a Domnëlu.

²⁷ Pims di Sëmtul Duh, ell vini tu tempull shi kënd përincjë o-dusërë Jezus njik, tas s'i fëcja aceli ci ara skërati tu nomlu a Moisiu,

²⁸ Simeon u llo Jezus mbracë, shi allëvdë Dumëxë ashë:

²⁹ “Tora o Dumëxë, allasu ysmeqarru a tëll tas fugë tu irini, pi dupi zborru a Tëll,

³⁰ kë ku oqjë a njej vëxuj skëpara a Ta,

³¹ ci tini u fëcesh etëmë tu oqjë ali tuti dunei,

³² llunjinë tas skapë miletja shi tinjii ti ômënjjë a tëj tu Izrael”.

³³ Tatësu shi mësa a Jezus ara mullt kënëqësic di tuti aceli ci s'i spunia ti nës.

³⁴ Dapoja Simeon i'j dedi ruçënjli sh'i'j xësi ali Marii, mësa a Jezus: “Ja, aist fiçor us'i fakë sëbepi t'i këderi shi t'i anëllcara a mullc ômënjllu tu Izrael, shi unë nojmë kondra,

³⁵ tas s'i zdëvëljastë mullti inëmi, ma acëa un këcut us t'u ncapë sufëlltu.”

³⁶ Ako tihjisi shi unë profeteshë, Ana, hjija a Fanuel di fisja a Asheru. Ija ara mujeri tërkutë. Avja bënatë shapti anj ku burbasu a je,

³⁷ shi ma nëpoj bënë ka vedu pën s'i feci optuxëc i patur di anj. Ija nu s'dëpërta di tempull, ma o-llëvda Dumëxë nôpti shi xuë, cënia presëni shi fëcja duvai.

³⁸ Pedhis ci tihjisi ako tu acell qëro, ahurhji shi ija tas allavdë Domnëlu, shi ll'u spunia ti çilëmanu acëllor ci ashtëptja skëpara a Jeruzalem.

S'turrarë tu Nazaret

³⁹ Kënd bitësirë llukërrë pi dupi nomlu a Domnulu, s'turrarë tu Galilei, tu kasabaja a llor, Nazaret.

⁴⁰ Fiçorru kërshtja sënëtos shi mintimen, shi aumbra a Domnëlu ara ku nës.

Jezus, çilëman tu tempull

⁴¹ Përincjë a Jezus, nëxja kathi an tu Jerusalem ti Pashti.

⁴² Kënd ell umpllu dojspërxaci di anj, nesërë napoj ako pi dupi zakoni.

⁴³ Dupi pashti ej nqësirë s'i tôrrë. Fiçorru Jezus arrëmasi tu Jerusalem, ma përincjë nu u llôrë di hëbari aistë gjëji.

⁴⁴ Allor ll'o-spëru kë fiçorru vinia ku socjë, shi imnarë tutë xua. Ma kënd ahurhjirë s'u kaftë pit kusërinj,

⁴⁵ nu o-fllarë, shi s'turrarë napoj tu Jerusalem tas u kaftë.

⁴⁶ Dupi tre xëli o-fllarë tu tempull. Stëtja mpadi ningi dhaskalënj, ci j'avxa sh i'j tërba.

⁴⁷ Tuc acej ci avxa s'çudusja ku zbôrrëli mintimeni ci xëcja.

⁴⁸ Kënd u vëxurë mësa i'j xësi: “Hjij, këce n'u fëcesh ashë? Mini shi tatëtu ma t'i këftam ku mari merak”

⁴⁹ Jezus ju turrë: “Këce ma m'i këftat? Nu u shtic voj kë lipseshti s'mi jau ku llukërrë a Përintëlu a njell?”

⁵⁰ Ma ej nu l'aduqirë zborrëli a lluj.

⁵¹ Dapoja nqësi dadun ku nësh, s'turrë tu Nazaret sh i'j avxa. Mësa a lluj l'i vëgja tuti aisti tu inëmë.

⁵² Shi Jezus kërshtja mintimen, bun, mushat, dininti a Dumëxë shi a ômënjllu.