Luka 19 - Evanghelu pi dupi Luka 2013

Jezus shi Zakeu

¹ Jezus intrë tu Jeriko sh ma tërcja kala.

² Ako ara un om ku numa Zake. Ell ara di acej ci aduna xhelepja sh ara avut.

³ Zakeu ma s'çukutja tas vëdja kaj ara Jezus, ma ara shkurt sh nu putja tas u vëdja kë ara mullc ômënj.

⁴ Tiaca, ell tërku dininti, shi s'i alënë tu un hjik tas u vëdja, kë Jezus ma tërcja tu aca kali.

⁵ Kënd Jezus axhumsi ako, skullë oqjë sh i'j xësi: “Zake, dëpunë ntrôrë, kë azë voj tas stau tu kasa a ta.”

⁶ Zakeu dupunë ntrôrë shi s'hërësi, ci us ashtëptja Jezus lla kasa a lluj.

⁷ Tuc acej ci u vëxurë aistë gjëji, ahurhjirë tas xhudëkë: “Ju us nagë ôspi, lla un om nkërkat ku amartii.”

⁸ Zakeu ci stëtja pi çëçôri i'j xësi a Domnu: “Ja Domne, mini us ll'u dau acëllor ci nu ar, disa ali averi a mja, sh ma kë j'am llôtë a vërruj prax ku psemati, us j'u torr patur or ma mullt.”

⁹ Dapoja Jezus i'j xësi: “Azë vini skëpara tu aistë kasë, kë shi aist esti hjij all Abraham.

¹⁰ Hjiju a Omu ari vinitë tas i'j kaftë shi s'i'j skapë acej ci ara qëruc”.

Meselea ti xaci monedhëli

¹¹ Kënd ma o-vxa, Jezus ll'u spusi sh aistë meselei, pedhis kë ara aprôpja di Jerusalem, shi ej pistusja ci kratu a Dumëxë us vinia ntrôrë.

¹² Ell ll'u xësi: “Un domn nesi tu un bilok dëpërtos, tas s'i fëcja vësëjë sh dapoja us'i turra.

¹³ Adunë xaci di ysmeqarjë a lluj, ll'u dedi xaci monedhi sh ll'u xësi: ‘Bëgacili pi lluk pën kënd s'mi torr mini!’

¹⁴ Ômënjjë a shtëlluj biloku nu u vra, shi i'j pëtërkurë dënëpoj ndoj di nësh tas xëcja: ‘Nu vrem ci aist om s'i fakë vësëjë ti noj.’”

¹⁵ Kënd s'turrë, ara fapt vësëjë, sh këftë tas s'i'j aducja ysmeqarjë ci ll'ovja datë prax, tas vëdja kum l'avja bëgatë pi lluk.

¹⁶ Vini prota un sh i'j xësi: “Domne përëllu a tëll ari date xaci allti.”

¹⁷ Ell i'j xësi “Bravo, esht ysmeqar bun. Pedhis ci t'i spusesh ndrept ti tuti, us t'i fac mari tu xaci kasabai”.

¹⁸ Dapoja vini allant shi i'j xësi: “Domne, përëllu a tell ari datë cinci allti.”

¹⁹ Ell i'j xësi: “Sh tini us esht mari tu cinci kasabai!”

²⁰ Dapoja vini allant sh xësi: “Domne ja ju ôj përëllu a tëll. Mini o-vërtij tu unë shamei,

²¹ kë avjam frikë di tini, kë esht mullt sert. Tini jaj aca ci nu ôj datë, sh adunj aca ci nu ôj sëmënatë”.

²² Ell xësi: “Ysmeqar anapudh, mini us t'ja gudest ti zbôrrëli a tëli. Tini u shtjaj ci mini est sert, ci jau aca ci nu am datë, sh taj aca ci nu am sëmënatë?

²³ Dapoja, këce nu u bëgash tu bangë përëllu a njell, ci kënd s'mi turram s'u llôm ku tutë aca ci us'i avdëxa?”

²⁴ Tiaca, ll'u xësi acëllor ci ara ako: “Llôcëju përëllu sh dëdecëju acëlluj ci ari xaci!”

²⁵ Ej i'j xësërë: “Domne, ma ell ari xaci monedhi.”

²⁶ Ell ll'u turrë: “Mini us v'i xëk kë acëlluj ci ari, us i'j s'i da sh ma mullt, ma acëlluj ci nu ari, us i'j s'i ja sh aca ci ari.

²⁷ Sh acej ci nu m'i vra mini s'mi fëcjam vësëjë, aducecij sh vëtëmacij aô dininti a mja!”

Jezus intrë tinjisit tu Jerusalem

²⁸ Kara l'i xësi aisti Jezus nqisi ndrept tu Jerusalem.

²⁹ Kënd s'i apurqë tu Betfage sh tu Betani, tu biloku ci s'i akjëma “Muntili a Masënllu”, pëtërku doj di dishepujë

³⁰ sh llu xësi: “Fuxic tu hôra qandra, sh kënd s'intrac us afllac lëgat un ghumarr, ci nu ari nkëlëkatë vërr pi nës. Zdëlëgacu sh aducecu.

³¹ Ma kë v'i ntrabë vërr ‘këce u zdëlëgac’ xëcecij ashë: ‘Domnu u vra’”.

³² Acej ci pëtërku Jezus, nesërë sh o-fllarë ashë kum ll'ovja xësë Ell.

³³ Kënd ma u zdëlëga ghumarru, domësu i'j tërbë: “Këce ma u zdëlëgac ghumarru?”

³⁴ Ej i'j xësërë: “Domnu u vra.”

³⁵ Ej o-dusërë ghumarru lla Jezus, j'amënarë pësuprë stranjli a llor sh Ell nkëlëkë pi nës.

³⁶ Kala ju tërcja, ômënjjë ashtërra stranjli a llor.

³⁷ Kënd s'i apurqë tu kala ci dupuna dit Muntëli a Masënllu, tuc dishepujë ahurhjirë tas allavdë Dumëxë, ku hërau sh ku bôci analltë, ti tuti bunecli ci avja vëxutë.

³⁸ Ej xëcja: “Llunjinësit s'hjibë vësëjë ci jini pi numa a Domnëlu! Irini tu cerl sh dhoksu Dumëxë anallt!”

³⁹ Ndoj di farisenjjë ci ara namësa di ômënj i'j xësërë a Jezus: “Mvëcëtor, xëllu a dishepujllu a tej tas këpsjastë.”

⁴⁰ Ma Jezus ll'u turrë: “Mini us v'i xëk ci, shi s'këpsjastë ej, shkëmbili us grastë.”

⁴¹ Kënd s'i apurqë tu kasabai shi u vëxu, Jezus pllëmsi ti nës,

⁴² sh xësi: “Ah, ma s'oduqesht sh tini azë di këtu jini irini! Ma aistë esti askumtë ti oqjë a tej.

⁴³ Ma jin xëlili kënd asmëjë a tëj us zhdikidë groq afigërra di tini, us t'ja vërrtjastë sh us t'i strringë di tuti përcli.

⁴⁴ Dapoja us t'i tindë mpadi acëja sh fumeja a ta, sh nu us allasë n'i amënatë pi tini shkëmbë pisti shkëmbë, kë tini nu o-duqish qërollu kënd Dumëxë vini tas t'i axhutë”.

Pëstrera a tempullu

⁴⁵ Kënd intrë tu tempull Jezus ahurhji s'i'j aurrë acej ci vindja ako.

⁴⁶ Sh ll'u xësi: “Sëmtili skërëturi xëk: Kasa a mja esti kasë ti fëceri duvai, ma voj o-vec faptë bilok di fur.”

⁴⁷ Jezus mvëca ômënjjë kathi xuë tu tempull. Prefcjë, skribënjjë sh ma marjë a ômënjllu vra s'u vëtëma,

⁴⁸ ma nu shtja ci s'fëcja, kë tuc ômënjjë s'hërësja kënd o-skullta.