Luka 18 - Evanghelu pi dupi Luka 2013

Meselea ti mujera vedu shi dhiqigoru

¹ Dapoja Jezus ll'u spusi unë meselei, tas ll'u spunë ci lipseshti s'ij fakë duvai a Dumëxë totëna, ni agërshatë içvërrorë.

² Ell xësi “Tu unë kasabai ara un dhiqigor ci nu avja frikë di Dumëxë sh nu avja tinjii ti ômënj.

³ Tu aca kasabai ara sh unë mujeri fёrë burbat, ci nëxja lla nës shi i'j xëcja: ‘Dënj ndreptjaca dininti acëlluj ci esti kondra ku mini!’

⁴ Pucën qëro ell nu vra, ma dapoja, s'mindui: ‘Mini nu am frikë di Dumëxë, sh nu am tinjii ti ômënj,

⁵ ma, pedhis ci aistë mujeri ma nj'kadi pi zverkë, us j'u dau ndreptjaca, kë ajumtra ma vini totëna, us m'i fakë tas u qer tropu a njell.’”

⁶ Sh Jezus xësi: “Avxat kë ci xësi dhiqigoru ci nu esti ndrept.

⁷ Ma Dumëxë, nu us'u bagë ndreptjacë ti ma alepcje a lluj ci u kaft nôpti sh xuë. A us'i amënë tas ja xhutë?

⁸ Mini us v'i xëk kë Ell us'u bagë ntrôrë ndreptjaca. Ma kënd s'jinë Hjiju a Omu, a us afllë ninga pistuseri tu aistë dunei?”

Meselea ti fariseu sh omu ci aduna xhelepja

⁹ Acëllor ci u cënia sinia a llor ka ndrepc, shi s'arrëdja ku allanc, Jezus ll'u spusi aistë meselei:

¹⁰ “Doj ômënj nesërë tu tempull tas s'i'j fakë duvai a Dumëxë. Un ara farise, sh allant aduna xhelepja.

¹¹ Fariseu stëtja pi çiçôri, fëcja duvai sh xhuduka: ‘Dumëxë, mini t'i efharistisest ci nu est ka allanc ômënj, fur, munafik, burbat ci faci llath ku mujera, iti ka aist om ci adunë xhelepja.

¹² Mini cën presëni, dau-or tu stëmënë, sh dau unë tu xaci përc di aceli ci jau.’

¹³ Ma omu ci aduna xhelepja stëtja dëparti shi nu avja nakërrë tas skulla oqjë kiti cerl, agudja qeptu sh xëcja: ‘Dumëxë, s'ic jinë krimë ti mini ci am faptë amartii!’”

¹⁴ Mini us v'i xëk: “Aist om, nu fariseu, s'turrë akasë fapt ndrept di Dumëxë. Kë, acell ci allavdë sinia a lluj us'i apunë, sh kaj o-punë sinia a lluj, us'i anallcë”.

Jezus ll'u da rucënjli a cilëmanjllu

¹⁵ Ndoj ômënj aducja cilëmanjjë lla Jezus, ci ell s'bëga mëna pi nësh, ma kënd i'j vëxurë dishepujë nu vra s'ja llësa.

¹⁶ Astumsëna Jezus i'j llo cilëmanjjë aprôpja di nës, sh xësi: “Allësacij cilëmanjjë s'jinë lla mini, sh nu i'j turrac nëpoj, kë kratu a Dumëxë ll'u tukueshti acëllor ci sënt ka nësh.

¹⁷ Mini ma v'i xëk, kë acell ci nu o-prôqë kratu a Dumëxë ka un cilëman, nu us intrë tu nës”.

Omu avut

¹⁸ Un di ma marjë tu Judei u tërbë: “Mvëcëtor bun, ci prindi s'fak tas qërdhësest bana ti totëna?”

¹⁹ Jezus i'j xësi: “Këce i'nj xëc bun? Içvërr nu esti bun, gôllë Dumëxëllu.

²⁰ Tini l'i shti mvëcëturëli a Dumëxë. Nu fë amartii ku mujera, nu vatëmë, nu furë, nu xë psemati, tinjisja tatëtu sh mëta”.

²¹ Dapoja ell i'j xësi: “Tuti aisti l'am fapti di kënd aram nou.”

²² Kënd avxë aistë, Jezus i'j xësi: “Gôllë unë gjeji nu ôj faptë: vindili tuti ci aj, dëllu acëllor ci nu ar, shi us aj mulltë tu cerl. Dapoja hajdi dupi mini!”

²³ Ma kënd l'i avxë aisti, a lluj i'j s'asparsi sënxili, kë ara mullt avut.

²⁴ Jezus u vëxu kë ell s'murzui, tiacë xësi: “Kit zori esti ti acej ci ar mulltë averi tas intrë tu kratu a Dumëxë.”

²⁵ Esti ma efkulla s'trakë unë gamilë tu guva a aku, dipi s'intrë un avut tu kratu a Dumëxë.

²⁶ Acej ci ma avxa u tërbarë: “Ma dapoja, kaj us pôtë tas skapë?”

²⁷ Jezus ll'u turrë: “Aca ci esti mullt ku zori ti ômënjjë, s'faci efkulla di Dumëxë”.

²⁸ Astumsëna Pjetru i'j xësi: “Ja, noj l'allësëm tuti ci avjam sh vinum dupi tini”.

²⁹ Sh'Jezus i'j xësi: “Darihënja ma v'i xëk, kë içvërr di acej ci ar allësatë kasili sh mujerrë, frac sh fumejë ti sebepja a kratu a Dumëxë,

³⁰ nu us arrëmënë ni llôtë mullt tu aist qëro sh us hërësjastë bana tu allantë dunei”.

Jezus paraxësi murera sh'injjara a lluj napoj

³¹ Jezus j'adunë di-unë-parti dojspërxacëjë sh llu xësi: “Ma nëxem tu Jerusalem, sh tuti ci skërarë profecje ti Hjiju a Omu us'i fakë.

³² Ell us'u parada lla paganëjë, ci us'i arrëdë, us'u nxhurë, us'u skuqë,

³³ shi dupi bëteri us'u vatëmë, ma dupi tre xëli Ell us injjaxë.”

³⁴ Ej nu aduqirë cëva, kë aca ci ll'u xësi Jezus ara askumtë ti nësh sh nu aduqirë ci xësi.

Jezus vindëkë un orb

³⁵ Kënd Jezus ma s'i apurqa tu Jeriko, un orb stëtja marxëna di kali ku mëna tjasë sh këfta.

³⁶ Kënd avxë ci ma tërcja ndoj ômënj, tërbë ci ma s'fëcja.

³⁷ Ej i'j xësërë: “Ma treci Jezus di Nazaret”.

³⁸ Astumsëna ell gri ku bôci analltë: “Jezus, Hjij a David, sic jinë rrëu ti mini!”

³⁹ Acej ci tërcja dininti u ursirë tas këpsja, ma ell aurrë sh ma mullt: “Hjij a David, sic jinë krimë ti mini!”

⁴⁰ Jezus qinduri sh ll'u xësi s'ja ducja orbu. Kënd s'apurqë Ell u tërbë:

⁴¹ “Ci vre s'fak ti tini?” Orbu xësi: “Domne, voj tas ved napoj!”

⁴² Shi Jezus i'j xësi: “Vex napoj! Pistusera a ta t'i skëpë”.

⁴³ Alluj i'j s'i turrë di-unôrë vëdera, nesi dupi Jezus sh tut allëvda Dumëxë. Tuc acej ci u vëxurë, allëvdarë Dumëxë.