Luka 14 - Evanghelu pi dupi Luka 2013

Vindëkara a llënxëtu ku hidropizë

¹ Unë xuë Jezus nesi tas mëkë tu kasa a unuj di ma mërjë a farisenjllu, shi ej ma u bëga ôrë mullt.

² Qandra ku Jezus stëtja un om ci ara llënxut ku llëngôra ali hidropizi.

³ Jezus i'j tërbë dhaskalënjjë a nomlu a Moisiu, shi farisenjjë; “O-prôqë nomlu a Moisiu ci, pôti s'vindic sëmbëta ama nu?”

⁴ Ma ej nu grirë. Astumsëna Jezus bëgë mëna pi llënxëtu, u vindëkë shi o-llësë s'fugë.

⁵ Dapoja ll'u xësi a llor: “Kaj esti acell ci ma s'i'j këdja cilëmanu iti bou tu pus sëmbëta, nu us u skutja di-uôrë?”

⁶ Ej nu putja s'i'j turra xhuvapi.

Mvëcëtura ti ashtëptarja ôspëcjë

⁷ Jezus bëgë ôrë, kë kum acej ci ara akjëmac, alëxja bëlokërrë ma buni, sh llu spusi unë meselei.

⁸ “Kënd t'ja kjamë pi numtë, nu t'ja punë tu biloku ma bun sh alept, kë vëhj esti akjëmat vërr ma tinjësit di tini,

⁹ sh acell ci v'jari akjëmatë dojë, pôti s'jinë shi s'ic xëkë: ‘Allasëju aist bilok ashtëlluj’. Shi astumsëna, arrushënat us akac biloku ci esti tu fund.

¹⁰ Ma kënd s'tja kjamë, fux sh apunëti tu biloku di fund, ci kënd s'jinë acell ci t'jari akjëmatë sic xëkë: ‘Ôspi, hajdi ma sus!’ Shi ashë us esht tinjësit di tuc acej ci sënt tu trapezë ku tini.

¹¹ Kë acell ci o-nallcë sinia a lluj, us'i apunë, shi kaj o-punë sinia a lluj us hjibë tinjësit”

¹² Acëlluj ci ara akjëmat Jezus i'j xësi: “Kënd s'ashtjerr vërr prrënx, iti vërrë cinë, nu akjamë ôspëcjë a tëj, fracjë, kusurinjjë a tëj, iti gjitonëjë avuc, kë us'ic nagë mintja ci sh ej us t'ja kjamë shi ashë esht llat.

¹³ Ajumtra, kënd s'ashtjerr vërrë gostii, akjamë ômënjjë fukërenj, kurrusicjë, shqopënjjë shi orgjë.

¹⁴ Astumsëna us esht mullt hërësit kë ej nu us ajbë ku ci s'tu torrë, shi tini us jaj ruçënjli shi pulltera tu injjara a ndreptëllor”.

Meselea ti gostia mari

¹⁵ Un di akjëmacjë, ci l'avja avxatë tuti, i'j xësi a Jezus: “Hara di acell ci mëkë pëni tu kratu a Dumëxë!”

¹⁶ Ma Jezus i'j xësi: “Un om ashtërrë unë gostii mari, shi akjëmë mullc ômënj.

¹⁷ Kënd vini qërollu ali cini pëtërku ysmeqarru a lluj tas ll'u xëkë acëllor ci avja akjëmatë: ‘Hajdic kë tuti sënt etëmi.’

¹⁸ Ma tuc un dupi allant ahurhjirë tas afllë sebepi tas nu nëxja. Un di prota i'j xësi: ‘Am kupuratë unë bukatë di agur, shi prindi s'neg tas u ved. C'fak rixhai s'mi hërxesht!’

¹⁹ Un allt xësi: ‘Mini am kupuratë cinci pëjur di boj, shi us neg tas i'j ved kum llukraxë. C'fak rixhai s'mi hërxesht!’

²⁰ Un allt xësi: ‘Kit est surat, tiaca nu pot s'jin.’

²¹ Shi ashë ysmeqarru s'turrë shi i'j xësi a domësy ti tuti. Astumsëna domësu ali kasi s'nërri, shi i'j xësi a ysmeqarru a lluj: ‘Esh di-unarë pit këjur shi pit pëx ali kasabai sh adu aô tuc fukërenjjë, kurrusicjë, qorrjë shi shqopënjjë.’

²² Shi ysmeqarru i'j xësi: ‘Domne, fecum kum ni xësesh, ma ari ninga bilok.’

²³ Astumsëna domësu i'j xësi a ysmeqarru: ‘Esh nafôrë pit këjur shi pit rrux, shi jaj ômënjjë nunt ku force, tas s'i umpllë kasa a mja.’

²⁴ Mini ma v'i xëk: ‘Içvërr di acej ci ara akjëmac nu us mëkë di cina a mja’”.

S'nex dupi Jezus

²⁵ Jezus ma o'shtërra mullc ômënj, ma Ell s'turrë sh ll'u xësi:

²⁶ “Kaj jini dupi mini sh nu o-llasë diunë-parti tatësu sh mësa, mujera shi cilëmanjjë, fracjë shi surërrë shi bana a lluj, nu pôti s'hjibë dishepullu a njell.

²⁷ Kaj nu u ja kërucja a lluj tas jinë dupi mini, nu pôti s'hjibë dishepullu a njell.

²⁸ Kaj di voj, ci vra tas skôllë unë kasë, nu s'ja punë ma ninti s'fakë esapja, tas vjadë, ari ama nu ari prax kit s'u bitisjastë kasa?

²⁹ Ajumtra, ma l'ari amënatë themejurrë sh nu pôti s'u bitisjastë, acej ci u ved us ahurhjastë s'i arrëdë ku nës,

³⁰ shi us xëkë: ‘Aist om ahurhji tas skôllë kasa, ma nu fu xhoni s'u bitisjastë’.

³¹ Kaj vësëjë, kënd nqiseshti tas fakë polum ku un allt vësëjë, nu s'ja punë ma ninti tas s'i minduastë, a pôti ell ku xaci njijë di ish s'i'j fakë ballë acëlluj ci jini ku jinjic njijë?

³² Ma kë nu pôti, i'j pitreci ndoj ômënj di alluj, tas i'j kaftë irini, kënd allant esti ninga dëparti.

³³ Tiaca içvërr di voj nu pôti s'i fakë dishepullu a njell, ma kë nu strraxi mënë di avera ci ari”.

Sara ci qeri nostëmadha

³⁴ “Sara esti bunë, ma, ma u qëru nostëmadha, kum pôti s'u tôrrë dot?

³⁵ Nu faci më niki ti llok, niki ti kurpëi, ma gôllë ti arrukari. Kaj ari ureq, as avdë”.