Luka 13 - Evanghelu pi dupi Luka 2013

Fëcecvë pishmani

¹ Tu aist qëro vinërë ndoj ômënj lla Jezus shi i'j spusërë ti galileasjë ci sënxëli a llor Pilat o-vja mëstëkat ku sënxëli di kurbani.

² Jezus i'j tërbë: “Kum mintuic kë galileasjë ci pëcarë aistë gjëji, ara nkërkac ma mullt ku amartii di galileasjë allanc?

³ Us v'i xëk ci, ma kë nu us v'i fëcec pishmani ti amartiili a vôsti, us u pëcac tuc ashë ka ej.

⁴ Ma ti acej optuspërxacëjë ci ll'u gëxu kulla a Siloam, sh i'j vëtëmë, v'i nexi mintja ci avja steps ma mullt di allanc ômënj, ci bëniaxë tu Jerusalem?

⁵ Nu! Us v'i xëk, ma kë nu v'i fëcec pishmani us pëcac tuc ka acej”.

Meselea a hjiku

⁶ Dapoja Jezus spusi aistë meselei: “Un ôm avja un pom di hjik sëmënat tu agërru a lluj. Vini tas kaftë hjici pi nës, ma nu afllë.

⁷ Astumsëna i'j xësi a baçevanu: ‘Am vënitë tre anj pja radhë tas jau hjici di aist pom, ma ninga nu am afllatë cëva. Taju! Këce s'a kacë biloku xhaba?’

⁸ Baçevanu ju turrë: ‘Domne, allasu sh aist an, tas i'j fak ysmeti, shi s'ja min kurpëji,

⁹ kë vëhj faci hjici anu ci jini. Ma kë nu faci, taju’”.

Jezus vindëkë sëmbëta

¹⁰ Unë sëmbëtë Jezus ma mvëca ômënjjë tu unë sinagogë.

¹¹ Ako ara shi unë mujeri, umpllutë di un sufullt ci o-vja cënutë optuspërxaci di anj kurrusitë. Ija nu putja tas stëtja ndrept.

¹² Jezus u vëxu, i'j gri shi i'j xësi: “Mujeri, esht skëpatë di llëngôra a ta”.

¹³ Kënd bëgë mëna pi nësë, ija s'i ndreptë shi ahurhji tas allavdë Dumëxë.

¹⁴ Ma marrë ali sinagogi s'i nërri ci Jezus vindëkë sëmbëta, tiaca ll'u xësi a ômënjllu: “Sënt shasi xëli ci omu pôti s'llukraxë. Aisti xëli ajdic tas v'i vindëkac, nu sëmbëta.”

¹⁵ Astumsëna Jezus ju turrë: “Psematar! Nu u zdelëgac kathi di voj bou shi gumarru dit grazhdi sëmbëta, shi o-ducec si'j dac apë?

¹⁶ Aistë mujeri ci esti hjijë di'a Abraham shi ci Satan ôri lëgate optuspërxaci di anj, nu prindi s'i zdëlagë di aisti hjarrë unë xuë ka kum esti sëmbëta?”

¹⁷ Kënd xësi aisti Jezus, tuc acej ci ara kondra ku nës, s'ja rrushunarë shi tuc ômënjjë s'hërësirë ti aisti llukëri buni ci fëcja Ell.

Meselea ku sëmica di sinap shi allôtu

¹⁸ Astumsëna Jezus xësi: “Ku kaj unxeshti kratu a Dumëxë? Kum pot s'vu spun?

¹⁹ Ell unxeshti ku sëmica di sinap ci un om u llo shi u sëmënë tu agur. Sëmica kërsku shi s'feci pom, shi pujë a cerlu fecërë kubajur pit dexli a lluj”

²⁰ Jezus xësi napoj: “Kum pot s'vu spun kratu a Dumëxë?

²¹ Ell unxeshti ku allôtu ci u llo unë mujeri, u mëstëkë ku tre masë di frinë, pën kënd vini tut allôtu.”

Usha strrimtë

²² Kala ti Jerusalem, Jezus tërku pit hor shi kasabai, shi mvëca ômënjjë.

²³ Un om u tërbë: “Domne, a sënt pucënj acej ci us'i skapë?” Astumsëna Jezus i'j xësi:

²⁴ “Çukuticvë s'intrac pit usha strrimtë, kë us v'i xëk, ci mullc us'i çukutjastë s'intrë, ma nu us pôtë.

²⁵ Ma kë domësu ali kasi esti skullat, shi ari nkisë usha, sh voj stëtec nafôrë, dëdec pi ushë sh xëcec: ‘Domne, zhdikidënë usha!’, ell us v'i xëkë: ‘Nu u shtiu di këtu vinic.’

²⁶ Astumsëna us ahurhjic s'xëcec: ‘Noj avem mëkatë sh avem bjutë ku tini, sh tini n'i aj mvëcatë tu padi’.

²⁷ Ma ell us v'i xëkë: ‘Nu u shtiu di këtu vinic. Dëpërtacvë di mini tuc voj ci fëcec llukëri anapudhi’.

²⁸ Ako us ajbë pllënxeri shi ômënj ci us strringë dincjë, kënd s'vëdec Abraham, Isak shi Jakob dadun ku profecjë allanc tu kratu a Dumëxë, sh avau us v'ja rrukë nafôrë.

²⁹ Dapoja us jinë di na ndrapta sh di na stënga, di sus, sh di hjima, shi us mëkë tu kratu a Dumëxë.

³⁰ Shi ja, apusjë us s'ja nallcë nxjanë shi acej ci sënt prota us hjibë tu fund”.

Kuja ti Jerusalem

³¹ Ndoj farisenj vinërë shi i'j xësërë a Jezus: “Dëpërtjaxëti di aô, kë Herod vra s'ti vatëme”.

³² Shi Jezus ll'u xësi: “Fuxic sh xëcecij acëje vulpi: ‘Ja, mini us aurr djavujë sh ma vinduk azë shi mëni. Dupi tre xëli us'u bitisest llukurru a njell.

³³ Shi ku-tutë-aca, azë, mëni sh pujmëni mini us trek tu kala a mja, kë nu esti tu ndreptjacë ci un profet s'i vatëmë nafôrë di Jerusalem’.

³⁴ Jerusalem, Jerusalem, tini ci vacinj profecje sh ku shkëmbi vacinj pëtërkucjë a Dumëxë! Kit or am vrutë tas s'ij adun evlatëjë a tëj, kum adunë klloçka pujë a je sum brace, ma voj nu vrat.

³⁵ Ja kasa a vôstë us arrëmënë shkretë. Mini us v'i xëk kë nu us m'i vëdec më pën s'xëcec: ‘S'ajbë rucënjli acell ci jini pi numa a Domnu’”.