Luka 10 - Evanghelu pi dupi Luka 2013

Pёtёrku shaptixëc i doj dishepuj

¹ Dupi aisti llukёri, Jezus pёtёrku shaptixëx i doj allc. I'j pёtёrku dininti doj kiti doj tu kathi kasabai shi tu kathi bilok ju us nёxja ell ishish.

² Shi llu xёsi: “Gërru estan esti fapt mullt, ma ômënj t'i llukrari sёnt pucënj. Fëcecij rixhai a domёsu u agërru s'vi pёtrakё avau ti llukrari tu agërrë a-llor.

³ Fuxic, ja ma vi pёtrek ka njejë namësa di lluq.

⁴ Nu lloc içcëva ku voj, niki prax, niki trasti, niki pёpucё. Kala nu zburrac ku vёrr.

⁵ Tu kajcëdo kasё ci us intrac, ma ninti xëcec: ‘Irini sh buniacё s'ajbё tu aistё kasё!’

⁶ Ma kё vёrr ako esti hjij di irini, ruçënjli a vôsti us kadё pi nёs, ma kё nu esti, us'i tôrrё lla voj.

⁷ Qinduric tu aca kasё, mёkac shi bjec ci us vi bagё dininti, kё acell ci llukraxё ari ndrept tas s'i pulltjaxё. Nu tёrcec di lla unё kasё tu allantё.

⁸ Tu cёdo bilok ci us intrac shi us v'ja shtjaptё, mёkac ci us vi bagё dininti,

⁹ vindёkac llëndёcje ci sënt ako shi xëcec: ‘Kratu a Dumёxё esti ku voj.’

¹⁰ Ma kё intrac tu vёrrё kasabai shi nu us v'ja shtjaptё gjini, ishac tu padi sh xëcec:

¹¹ ‘Sh'pullbëra a biloku a vost, ci esti alёqitё pi çëçôrrё a nosti ma u skuturёm s'arrëmënё ku voj. Ma gollё s'u shtic kё kratu a Dumёxё esti aprôpja.’

¹² Mini us vi xëk, kё aca xuё Sodoma us o-jbё ma lëshôrё di aistё kasabai”.

Kavoj di aceli bilokёri ci nu sënt fapti pishmani

¹³ “Kavaj di tini Korazin! Kavij di tini Betsaidё! Ma s'ara fapti tu Tir shi tu Sidon aceli bunec ci s'fecërё lla voj, ej us ara fapc pishmani ku qёro. Us'i mvështja ku sac shi us'i apuna tu qёnushё.

¹⁴ Sh ku-tutё-aca, ti Tir shi Sidon us hjibё ma lёshôrё di voj tu xua ali ndreptjaci.

¹⁵ Ma tini, Kafarnaum, naka vëhj us t'i anallc pënd tu cerl? Tu katrani us kax.

¹⁶ Kaj vi askulltё avau, m'jari askulltatё anjia, shi kaj nu vi aprôqё avau, nu mi aprôqё niki anjia. Kaj nu mi aprôqё anjia, nu us aprôqё niki acell ci m'jari pёtёrkutё”.

Shaptixëc i dojё s'turrarё

¹⁷ Shaptixëc i doj dishepujё s'turrarё mullt hërёsic, shi i'j xësërё: “Jezus, shi djavujё s'apunarё di numa a ta.”

¹⁸ Jezus ll'u xësi: “U vëxuj Satan kёnd ma këdja di sus ka rrufei.

¹⁹ Ja, v'jam datё forcë tas kёllkac pisti nёpёrtic shi akrepënj, shi pisti fuqia a cёlluj ci nu v'i vra. Içvёrr nu us v'i fakё sёllbicё.

²⁰ Sh ku-tutё-aca, nu v'i hёrёsic kë s, i apunё sufëllcjë, ma hërёsicvё kë numëli a vôsti sёnt skërati ako nxjanё”.

Hëraua a Jezus

²¹ Tu acell qёro Jezus s'i umpllu ku hërau, di Sëmtulu Duh sh xёsi: “Ti efharitisest, o Dumёxё, Domn a cerlu shi ali dunei, kё l'aj askumtë aisti llukёri ti acej ci sent mintimenj, shi l'aj zdiviliti ti acej ci sёnt njic. Ashë, o Dumёxë, kё ashё aj vrutë tini.

²² Tuti nj'i sënt dati di Përintili a njell. Içvërr nu u kёnôshti Hjijёsu ka Përintili, shi içvërr nu u kёnôshti Përintili kum u kënôshti Hjijёsu a lluj, sh acell ci Hjiju vra tas si'j spunё”.

²³ Dapoja Jezus s'turrё kiti dishepuj sh ll'u xësi ahorja: “Hara di oqjё ci vёd aca ci vëdec voj!

²⁴ Us v'i xёk kё mullc profec sh vësëjë ar vrutё tas vjadё aca ci ma vëdec voj, ma nu l'i vёxurё dot; tas avdё ci ma avxac voj, ma nu l'i avxarё”.

Samaritanu bun

²⁵ Astumsëna un dhaskal a nomlu a Moisiu, si skullё tas u bagё tu provё Jezus sh i'j xësi: “Mvëcёtor, ci lipseshti s'fak tas hërёsest bana ningi Dumёxё?”

²⁶ Jezus i'j xёsi: “Ci si skirё tu nomlu a Moisiu? Ci kёnc tini ako?”

²⁷ Ell i'j xësi: “S, u vre Domnu, Dumёxёllu a tëll ku tutё inёma a ta, ku tut sufulltu a tёll, ku tutё putera a ta shi ku tutё mintja a ta, shi s'u vre allant ka kum vre sinia a ta.”

²⁸ Jezus i'j xësi: “U xësesh ndrept. Ashё fё, shi us bёnex.”

²⁹ Ma ell, pedhis ci vra s'i'j dëdja ndreptjacё a sinia a lluj, i'j xësi a Jezus: “Kaj esti allant?”

³⁰ Jezus j'u turrё: “Un om ma dupuna dit Jerusalem pënd di Jeriko sh gëxu tu mënjli a furёllu ci u zdupujarё, u bёturё, dapoja fuxirё shi o-llёsarё disa mort.

³¹ Ako ma tërcja un preft shi kёnd u vёxu, tërku pi alltё kali.

³² Ashё feci shi un levit, kёnd axhumsi tu acell bilok u vëxu sh tërku di alltё parti.

³³ Ma un Samaritan ci ma tërcja ako, s'i apurqё sh kёnd u vёxu, i'j vini rrёu ti nёs.

³⁴ Nesi aprôpja di nёs, j'amёnë untulem sh jin pisti plagё, shi j'u lëgё. Dapoja o-lёnё pi kallu a lluj, o-dusi tu un han shi i'j feci ysmeti.

³⁵ Allantё xuё skôsi doj dinar, i'j l'i dedi a domёsu a hanu sh i'j xёsi: ‘Fëj ysmeti alluj sh kёnd s'mi torr us ti pulltest ti tuti ci aj faptë ma mullt.’

³⁶ Kaj di aiç treje mintuesht tini kё s'feci ‘allant’ ti acell ci gëxu tu mënjli a furёllu?”

³⁷ Ell xёsi: “Acell ci s'i spusi dёrut” Jezus i'j xёsi: “Fux, fё shi tini ashё!”

Jezus nesi lla Marta shi lla Maria

³⁸ Kёnd tërcja kala Jezus intrё tu unё hôrё, ju unё mujeri ku numa Marta o-kjëmё tu kasa a je.

³⁹ Ija avja unё sor ku numa Mari, ci stëtu tu çëçôrrё a Jezus shi avxa zbôrrëli a lluj.

⁴⁰ Ma, Marta ara akëcatё ku mullti llukёri, tjaca vini lla Jezus shi i'j xësi: “Domne, a nu aj bёgatё ôrё kë sormja nj'i l'ari allёsatë tuti llukёrrё anjia? Xëj tas jinё s'nja xhutё.”

⁴¹ Ma Jezus j'u turrё: “Martё, Martё, tini esht stinahorsitё shi akёcatё ku mullti llukёri,

⁴² ma gôllё un lluk esti bun. Maria alepsi acell ma bunu, ci nu us i'j fugё xhaba”.