Luka 1 - Evanghelu pi dupi Luka 2013

Intrare

¹ Mullc ômënj ar llôtë pisuprë tas spunë aceli ci sënt fapti ku noj,

² ashë kum ni l'ar adusë acej ci l'ar vëxutë ku oqjë a llor, sh ar futë pistusic tu zborr di prota,

³ sh'mini ci l'am vëxuti di aprôpja tuti di prota, nj'ari aspërutë lluk bun s'ti l'i skir ku sirai tënjësitu Teofil,

⁴ tas l'i kënosht gjini shi s'nu ti zbac di aceli ci aj mvëcatë.

Prespunera ti amëntara a Joan Pëtëxëtoru.

⁵ Tu acell qëro ci Herod ara vësëjë ali Judei, un preft ku numa Zakaria, di soja a Abiut, avja ti mujeri unë fjatë di soja a Aronu, ci o-kjëma Elisabeta.

⁶ Dojë ara mullt ndrepc dininti a Dumëxë, sh'bëna fërë amartii pi dupi tuti mvëcëturili a Domnëlu.

⁷ Nu avja çilëmanj, kë Elisabeta ara shterpë, sh'dojë ara aushac.

⁸ Kënd Zakaria fëcja llukurru ka preft dininti a Domnëlu, kënd ara radha ali kasa a lluj,

⁹ pi dupi zakoni, i'j gëxu shorta tas intrë tu ajodhimë tas ardë temjani.

¹⁰ Tu aist qëro tutë miletja i'j fëcja duvai a Dumëxë.

¹¹ A Zakaria i'j si funusi ëngjëllu a Dumëxë, ci stëtja di na-ndrapta al altar ali temjani.

¹² Kënd u vëxu Zakaria s'ja spërë shi o-këcë frika.

¹³ Ma ëngjëllu i'j xësi: “Nu t'i aspari, Zakaria, kë duvaja a ta esti avxatë, shi Elisabeta, mujera a ta us fakë un fiçor, shi tini us j'u bax numa Joan.

¹⁴ Us ti hërësesht mullt, sh'mullc ômënj us s'i hërësjastë ti amëntara a llui.

¹⁵ Ell us hjibë tinjisit dininti a Domnëlu, sh'nu us bja niki jin, niki cëva alltë, tas s'i mbjatë. Us hjibë umpllut ku Sëmtulu Duh, di tu pëndëku a mësa.

¹⁶ Mullc hjij d'ja Izrael us i'j tôrrë kiti Domnëlu, Dumëxëllu a llor.

¹⁷ Us jinë dininti a Domnëlu ku sufëlltu sh'fuqia a Elija, tas l'i tôrrë inëmli a përincëllu kiti evlatënj, sh'mintimarjë kiti mintimenj sh'ndrepc, tas fakë etëmë ti Domnëlu tuc ômënjjë.”

¹⁸ Zakaria i'j xësi a ëngjëllu: “Kum us u jau di hëbari aist lluk? Kë mini shi mujera a mja hjim aush.”

¹⁹ Ëngjëllu i'j xësi: “Mini est Gabriel, ci qindurest ningi Domnëlu, shi est pëtërkut tas zborr ku tini, shi si'c dau aistë hëbari bunë.

²⁰ Ja, tini us arrëmënj memec, shi nu us poc tas gresht pën tu xua ci us'i fakë aisti llukëri, kë nu aj pistusitë pi zbôrrëli a njeli, ci us'i fakë kënd s'jinë qërollu.”

²¹ Miletja ashtëptja nafôrë Zakaria, ma ara çudusic këce s'amënë ahtënt mullt tu tempull.

²² Kënd ishë ell nu pëtu tas grastë, sh ej o-duqirë ci avja vëxutë cëva nunt tu tempull. Ell fëcja ku nojma, shi nu gra dot.

²³ Kënd s'umpllurë xëlili ci fëcja yzmeti tu tempull, Zakaria s'turrë akasë.

²⁴ Elisabeta, mujera a llui, arrëmasi grau, shi ti cinci mesh stëtja askumtë sh'xëcja:

²⁵ “Domnëlu u feci ti mini, tas s'inj skôtë arrushënia ci avjam dininti a tutëllor.”

Prespunera ti amëntara a Jezus

²⁶ Dupi shasi mesh ëngjëllu Gabriel s'pëtërku di Dumëxë tu unë kasabai di Galilei ku numa Nazaret,

²⁷ lla unë fjatë ci ara susitë ku un burbat ci s'a kjëma Jozef, di kasa a David. Fjata s'a kjëma Maria.

²⁸ Ëngjëllu nesi lla nësë shi i'j xësi: “Hërësjati, tinjësitë. Domnëlu esti ku tini.”

²⁹ Ija s'ja spërë di aisti zbôrri, sh'mintjua, ci vra s'xëkë aisti zbôrri.

³⁰ Ëngjëllu i'j xësi: “Nu t'ja spari Maria, kë esht alaptë di Dumëxë.

³¹ Ja, us arrëmënj grau, us fac un fiçor, shi us j'u bax numa Jezus.

³² Ell us hjibë mari, shi us s'ja kjamë Hjij a ma Marrë, shi Domnëlu Dumëxë us i'j da fronu a David, a përintëlu a llui.

³³ Ell us hjibë vësëjë tu kasa a Jakob totëna, shi kratu a lluj nu us qarë pote.”

³⁴ Ma Maria i'j xësi a ëngjëllu: “Kum us'i fakë aistë, kë mini nu am gëxutë ku burbat?”

³⁵ Ëngjëllu j'u turrë: “Sëmtul Duh us dëpunë pi tini, sh'fuqia a ma Marrë us t'ja mvërtjastë ku aumbra a lluj, tjaca Sëmtul ci us amintë us'a kjamë Hjij a Dumëxë.

³⁶ Ja, shi Elisabeta, kusurina a ta, ashtjaptë tas amintë un fiçor tora tu aushatuk, shi esti shasi mesh grau, aca ci ara shterpë.

³⁷ Di Dumëxë tuti pot si fakë.”

³⁸ Dapoja Maria xësi: “Mini est ysmeqara a Domnëlu. As'i fakë ashë kum i'nj xësesh”. Shi ëngjëllu s'dëpërtë di nësë.

Maria nesi lla Elisabeta.

³⁹ Aceli xëli, Maria si skullë sh'nesi tu un bëlok tu munti, tu unë kasabai ali Judei.

⁴⁰ Ija intrë tu kasa a Zakaria, shi s'i adunë ku Elisabeta.

⁴¹ Kënd avxë bocja ali Marii, ali Elisabeti j'arsëru çëlëmanu tu pënduk. Elisabeta s'umpllu ku Sëmtul Duh,

⁴² gri ku bôci analltë shi xësi: “Namësa di tuti mujerrë esht umpllutë ku ruçënj, sh'ku ruçënj esti umpllut shi çëlëmanu ci aj tu pënduku a tëll!

⁴³ Di këtu i'nj jini aistë bun-jacë ci mësa a Domnëlu a njell s'jinë lla mini?

⁴⁴ Ja, kënd axhumsi bôcja a tau lla ureqli a njeli, çëlëmanu arrsëru di hërau tu pëndëku a njell.

⁴⁵ Hara di aca ci ari pistusitë ci us'i fakë aca ci esti xësë di Domnëlu.”

⁴⁶ Maria xësi: “Tutë bana a mja u tinjisesht i Domnëlu,

⁴⁷ shi sufulltu a njell hërëseshti ti Dumëxë, Acell ci us m'i skapë anjia,

⁴⁸ kë ell amënë oqjë pi mini, ci m'ja punaj dininti a lluj, shi ja, tuc ômënjjë us m'ja kjamë tënjësitë.

⁴⁹ Tinjii mari ari datë ma Marrë ti mini. Sëmtul esti numa a lluj.

⁵⁰ Buniaca a lluj treci dit un bërr tu allant, ti acej ci ar frikë di Nës.

⁵¹ Ari faptë llukëri mër ku mëna a lluj, ari amënatë hjima tuc acej ci allavdë mintja shi inëma a llor,

⁵² rrustunë ma vërrtoshjë dit fron, shi anëllcë acej ci sënt ma apunac.

⁵³ Acej ci nu ar pëni i'j umpllu cu bunec, shi avucjë i'j nqësi ku mënjli gôlli.

⁵⁴ Axhutë Izrael, yzmeqarru a lluj, shi adusi tu minti buniaca

⁵⁵ kum llu avja xësë a përincëllu a noshç, all Abraham shi tuc acej ci jin dupi nës totëna.”

⁵⁶ Maria stëtu tre mesh ku Elisabeta, dapoja s'turrë tu kasa e je.

Amëntara a Joan Pëtëxëtoru

⁵⁷ Vini qërollu ci Elisabeta amëntë fiçor.

⁵⁸ Ômënjjë sh'kusurinjjë a je avxarë kë Domnëlu ari faptë unë buniacë mari ti Elisabeta, sh'hërësirë dadun ku nësë.

⁵⁹ Dupi optu xëli vinërë tas u fakë syneti shi vra ta s'i'j bagë numa Zakaria, pi dupi numa a tatësu.

⁶⁰ Astumsëna mësa a lluj xësi: “Nu, ell us s'akjamë Joan.”

⁶¹ Ei i'j xësërë “Içvërr di kusurinjjë a voç nu s'ja kjamë ku aistë numë.”

⁶² Dapoja tërbarë tatësu ku nojmë, kë ci numë vra s'i'j bëga.

⁶³ Ell këftë unë skëndurë, shi pi nësë skërë: “Joan''esti numa a lluj.” Tuc hërësirë.

⁶⁴ Di-unorë a Zakaria i'j s'i zhdikisi gura, i'j s'i zdilëgë limba, shi ahurhji tas grastë, sh'allëvda Dumëxë.

⁶⁵ Tuc ômënjjë afigërra j'akëcë frika, shi jucëdo tu Judei spunia ti nësh.

⁶⁶ Acej ci l'i avxarë aisti zbôrri l'i cënurë tu inëmë shi xëserë: “Ci us'i fakë aist fiçor?” Shi mëna a Domnëlu ara ku nës.

Profecia a Zakaria

⁶⁷ Zakaria, tatësu a lluj, s'i umpllu ku Sëmtul Duh, shi feci aistë profecii:

⁶⁸ “Allëvdat s'hjibë Domnëlu, Dumëxëllu a Izrael, ci vini shi axhutë ômënjjë a lluj.

⁶⁹ Ell skullë ti noj korru ali skëpari tu kasa a David, ysmeqarru a lluj,

⁷⁰ ashë kum avja xësë ku gura a profetëlu a llui di etë;

⁷¹ skëpara di dushmanjjë a noç shi di mënjli acëllor ci nu n'i vra

⁷² ll'u dedi buniacë a përincëllu a noç t'i aduqeri sëmtul zbor ci avja lëgatë ku noj;

⁷³ ti zborru ci j'ari datë all Abraham, përintëlu a nost, tas s'ni allasë,

⁷⁴ ci kënd s'ni skapë di mënjli a dushmanëllu a noç s'llukrëm ti nës fërë frikë

⁷⁵ ta s'hjim sëmtul shi ndrepc dininti a Lluj tu tuti xëlili ali bana a nostë.

⁷⁶ Shi tini çilëman us esht profet a ma Analltu kë us trec dininti a Domnëlu, tas s'i'j fac etëmë kala a Lluj,

⁷⁷ tas s'i'j da a ômënjllu a Lluj kunushtjera ali skëpari ku hërxera a amartiilor a llor

⁷⁸ di inëma buna a Dumëxëllu a nost, di Nës us n'i jinë llunjina di sus

⁷⁹ ci skapërë pisti acej ci sta tu nôpti, sum aumbra ali morti shi s'ni adukë tu kala ali buniaci shi irini”.

⁸⁰ Fiçorru kërshtja, ku ruçënj tu sufullt shi stëtja pit pustinjë (errnjii) pën s'vinia xua tas s'isha dininti a Izrael.