Wongeela Maatewos 7 - Waadaa Haarawa

Kaanniin Irratti Murtteesuun Ka Hin Malle Ta'uu

¹ Itti aanssee'llee Yesus akkana ni jedhe, «Isin irratti akka hin murtteeffamnneef, eennuun irratti'llee hin murtteessinaa,

² murtima kaaniin irratti murteessitaniin isin irratti'llee ni murtteeffama, akkuma kana safarttuma ittiin safarttaniin isiniif'llee ni safarama.

³ Gudeelcha ija kee keessa jiru uduu hin argin, waayee maali'iitiif huuba ija obboleessa keetii keessa jiru laaltta?

⁴ Akkuma kana ija kee keessa gudeelchi uduu jiru, obboleessa keetiin, ‹mee huuba ija kee keessa jiru siif haa baasuu!› attamitti jettaan?

⁵ Ati fakkeessaa nana! Durssiitii gudeelcha ija kee keessa jiru baasi, saniin duubatti'llee, huuba ija obboleessa keetii keessa jiru baasu'uuf, qulqulleessitee ni argita.»

⁶ «Waan Qulqulluu ta'e sariiniif hin kenniinaa, dooqan keessan'llee booyyeewwan duranatti hin gatinaa, booyyeewwan dooqan teessan miila isaaniitiin ni dhidhiitaniin, sariin'llee deebi'anii isin ni ciniinan.»

Bu'aa Kadhanna'aa

⁷ «Kadhadhaa isinii kennama, barbaadaa ni argatan, balbala dhadhayaa isiniif banama,

⁸ ka kadhatu marrinuu ni fudhata, ka barbaadu'llee ni argata, balbala ka dhadhayuuf'llee ni banama.

⁹ Isin jiddu'uu finni isaa daabboo yoo kadhateen, dhagaa ka kennuuf eennu?

¹⁰ Qurxummii yoo kadhateen, bofa ni kennamaaf ree?

¹¹ Eegaa isin hamaaleyyii taatanii uduu jirttan, ijoollee teessaniif waan mishaa kennuu eega beekittan, eegasuu, ka samii jiru Abbaan keessan ammoo worra isa kadhataniif, attam caalichisee waan mishaa isaaniif hin kennine!»

¹² Eegaa waan namoonni akka isinii raawwatan barbaaddan maraa, isin'llee isaaniif akkuma kana raawwadha'aafii, barsiifnni seeraa fi nabiyyootaa'llee ka jedhan kanuma.

Waayee Balbala Dhipho'oo

¹³ «Balbala dhipho'oon aseenaa, gara badi'ii titti balballi aseensisu baldhaa, karaan'llee gudda'a. Namoonni garasi aseenan'llee baayi'eewwan.

¹⁴ Balballi gara jireennaa aseensisu garuu dhipho'oo, karaan'llee rakkisa'a» namoonni isa argatan'llee muraasota.

Mukinni Firii Isaatiin Ni Beekkama

¹⁵ «Kaldhoo hoola'aa uffatanii worra isinitti dhufan, keessa isaanii titti garuu akka yayyii buttu'uu kata'an, nabiyyoota dharaa irraa ufi eeggadhaa,

¹⁶ Isaan'llee ka beekitan firii hujii isaaniitiin. Ximirroo qore'ee irraa firii woyinni'ii, qoree shishiikkoo irraa'llee firiin harbbu'uu ni guuramaa ree?

¹⁷ Akkuma kana mukinni mishaan marrinuu firii mishaa ni daraara, mukinni badaan garuu firii badaa ni daraara.

¹⁸ Mukinni mishaan firii badaa daraaru'uuf hin dandda'u, mukinni badaan'llee firii mishaa daraaru'uuf hin danda'u.

¹⁹ Firii mishaa mukinni hin daraare marrinuu, muramee gara ibiddaa titti ni gatama.

²⁰ Kanaaf nabiyyoota dharaawwanii firii hujii isaaniitiinuu isaan ni beekittan.

²¹ Yaa Gooftaa! Yaa Gooftaa! ka naan jedhu marrinuu gara Mootummaa Sami'ii titti hin aseenu, gara Mootummaa Waaqaa titti ka aseenu, fedhii Abbaa kiyya ka samii jiruu ka raawwatu.»

²² Guyyaa murti'ii titti baayi'eewwan, yaa Gooftaa! yaa Gooftaa! Maqaa keetiin raaga hin dubbannee ree? Maqaa keetiin hafuurota jinni'ii hin baafnne ree? Maqaa keetiin'llee baasota baayi'ee hin taasfinnee ree? naan jedhan.

²³ «Ani'llee guyyaa sanitti ‹gonkumaa isin hin beeku! Isin hamaa raawwattoota ana irraa achi fagaadhaa!› isaaniin ni jedha.»

Fakkeenna Manniin Siidaa Dhagaa Yookiin Cirracha Irratti Ijaaramanii

²⁴ «Dubbii kiyya kana dhagayee hujii irra ka oolichuun marri, nama isaa hunddee dhaga'aa irratti ka ijaare, nama qaruutee ni fakkaata.

²⁵ Roobinni roobe, lolaan lola'e, bubbeen'llee bubbiseeti mana san ni dhiibeen, haa ta'u malee, manni hunddee dhaga'aa irratti waan ijaarameef hin jiginne.

²⁶ Dubbii kiyya kana dhagayee ka hujii irra hin oolichine garuu, nama mana isaa cirracha irratti ijaare gowwaa fakkaata.

²⁷ Roobnni roobe, lolaan'llee lola'e, bubbeen'llee bubbiseeti mana san ni dhiibeen, manni'llee bakkumatti ni kufe, kufaatiin isaa'llee ol aanaa ni ta'e.»

²⁸ Yesus wonittoota kanniin dubbatee yeroo xumuretti, ummanni barsiisa isaa ni maalaliffatan.

²⁹ Ka baaseffatan'llee inni akka barsiisota isaanii ka seeraa titti uduu hin ta'in, akka nama aangoo qabuu titti, isaan barsiisa waan tureef.