Wongeela Maatewos 1 - Waadaa Haarawa

Hidda Dhaloota Yesus Kristosii

¹ Fiixaa Daawiitiitii fi Abrahaamii ka ta'e hiddi dhaloota Yesus Kristosii kana,

² Abraahaam Yisihaaqiin, Yisihaaq Yaaqoobii, ni uumate, Yaaqoob Yihuda'aa fi obboleeyyan isaa ni uumate,

³ Yihudaan Fareesii fi Zaaraa dubarttii Ti'imaar jedhamttu irraa, Faarees Heerooniin, Heesiroon'llee Aaraminiin ni uumate,

⁴ Aaraamiin Aminaadaabiin, Aminaadaab Nahasooniin, Nahasoon'llee Salamooniin ni uumate,

⁵ Salamoon Boazin dubarttii Rahaab jedhamttu irraa ni uumate, Boazin Yoobeedin Ruut dubarttii jedhamttu irraa, Yoobeed Iseyin ni uumate.

⁶ Isey'llee nugusa Daawiitiin ni uumate. Nugufnni Daawit haadha worraa Uriiyaa ta turtte irraa Salamooniin ni uumate,

⁷ Salamoon Roobii'aamiin, Roobii'aamiin Abiiyaa, Abiiyaaniin Asaafiin ni uumate,

⁸ Asaaf Iyoosaafixiin ni uumate, Iyoosaafix Iyooraamiin, Iyooraamiin'llee Oziiyaaniin ni uumate,

⁹ Oziiyaan Eyooaataminiin, Yohaataam Akaazin, Akaazin'llee, Hisqiyaasiin ni uumate,

¹⁰ Hisqiyaas Minaasee, Minaaseen Amosin, Amosin'llee Yosiyaasiin ni uumate,

¹¹ Yosiyaas ummanni Israa'eelii gara biyya Baabiloonii booji'amanii bara deemanitti, Ekoniiyaanii fi obboleeyyan isaa ni uumate.

¹² Boojuu Baabilooniitiin duubatti Ekoniiyaas Salaati'eliin, Salaati'el Zarubaabeliin ni uumate,

¹³ Zarubaabel Abiyuudiin, Abiiyuud Eliyaaqimiin, Eliyaaqimiin Azoriin ni uumate,

¹⁴ Azor Zaadoqiin, Zaadoq Akimiin, Akiim Eliyudiin ni uumate,

¹⁵ Eliyud Ele'azaarin, Ele'azaar Maataaniin, Mataan Yaaqoobiin ni uumate,

¹⁶ Yaaqoob Masihii ka jedhame Yesusiin ta deette qaadhimataa Maariyamii ka ta'e, Yooseefiin ni uumate.

¹⁷ Eegaa Abrahaamiin irraa haga Daawiitii titti dhaloota kudha afur, Daawiitiin irraa haga boojuu Baabiloonii titti dhaloota kudha afur, boojuu Baabiloonii irraa haga Masihii titti dhaloota kudha afur.

Dhalachuu Yesus Kristosii

¹⁸ Yesus Kristos haalli itti dhalate akkana ture, haatii isaa Maariyaam Yooseefiif qaadhimamttee uduu jirttu, uduma inni isi'itti hin dhaqin, Hafuura Qulqullu'uun ulfoofttee ni argamitte.

¹⁹ Qaadhimaan isi'ii Yooseef'llee nama mishaa waan tureef, Maariyaamiin nama duranatti isii saaxilu'uuf hin barbaanne, kanaaf dhossa'aan isii dhiisu'uuniif ni barbaade.

²⁰ Garuu waan kana yaada'aa uduu jiru, maleeyikkaan Goofta'aa eebjju'uun isatti mulidhatee akkana ni jedheen, «Fiixaa Daawiitii yaa Yooseef! Qaadhimaan kee Maariyaam ka ulfooftte Hafuura Qulqullu'uun waan ta'eef, isii gara mana keetii fudhachu'uuf hin sodaatin.

²¹ Isiin'llee ilma dhiiraa ni deetti, inni ummata isaa cubbuu isaanii irraa waan isaan fayyisuuf, maqaa isaa Yesus ni jettaan.»

²² Kun marri'llee ka ta'e Gooftaan akkana jechu'uun karaa nabiyyichaatiin ka dubbate akka raawwatamuuf,

²³ «Kunoo, durbbi duudaan ni ulfooftti, ilma dhiiraa'llee ni deetti, maqaan isaa'llee ‹Amaanu'eel› jedhamee, ni waamama. Amaanu'eel jechuun'llee, Waaqinni nu'u woliin ni jira» jechu'u.

²⁴ Yooseef'llee hirribaa yeroo dammaqetti, akkaataa maleyikkaan Goofta'aa isa ajajeen qaadhimaa isaa Maariyaamiin gara mana isaa ni fudhateen.

²⁵ Haa ta'u malee, haga yeroo isiin ilma isi'ii deettee titti, isii bira hin geenne, maqaa isaa'llee Yesus jedhee ni waameen.