Lukéstar 9 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ Togái vikínel pe amalén, e deš‐u‐donén, del lénge zor thai síla uprál e bengénde, saoŗénde, thai ta te našavén naborjámata.

² Bičhalél len, ta te propovedínen o thagaribé e Devléskoro, ta te sastjarén e nasfalén.

³ Amí phenél lénge: Ma len váreso e džabnáske, ni rovlí ma len, ni džéba, ni maŗó, thai te nan’ ovél tuménge dúi postín, jek resél.

⁴ Savó kher kadén andré, othé te bešén, othár ma džan.

⁵ Savó na posreštínel tumén, katár i Dis kána tumé ílkjon, čhivén‐ta i pošík tumaré piŗéndar, ta t’ovél akavká znákos kárig lénde.

⁶ Íkljon, džan, dis dizáte phirén, o vakeribé e Devléskoro propovedínen, athé othé e nasfalén sastjarén.

⁷ Akaná šunél o Heródos, o tetrárxos, sa odovká, so kerdjás o Ísus, thai nána džanél, so te mislínel, sóske adalká phenén kai ukístilo andár e mulénde o Ivános.

⁸ Odolká‐da phenén, kai o Eliás aló, okolká‐da phenén kai e purané prorokéndar jek uxtinó andár o mulé.

⁹ Phenél o Heródos: E Ivanós čhindjóm, am adavká ko isí, kai šunáv uprál les asalká? Mangé te dikhél les.

¹⁰ Irisájle o amalá, sa so kerdé phenén léske. Ov‐da lel len paš péste, džan kórkoŗe, duránjoven andé jekhé pustoné thanéste, kai vikínen les Bethsáida.

¹¹ O naródos kána džanél, palál léste džal, ov‐da posreštínel len, vakerél lénge uprál o thagaripé e Devléskoro, ko sastipé mangél, lez‐da sastjarél.

¹² Blevélilo. Alé paš les o deš‐u‐dúi, phenén: Bičhál‐ta e manušén ta te džan‐peske, te džan, ándi Dis t’ándo gav te róden t’arakhén lodibé, (kher), thai maŗó t’arakhén, sóske athé sinjám ándo pústo than.

¹³ Amí phenél lénge odovká: Den‐ta len te xan maŗó. Phenén: Aménge sámo panš maŗó isí thai dúi mačhé. Te džas‐li, te kinás xabé e kalabalekjéske?

¹⁴ Amí isí othé manúš panš xiljádes. Ov‐da phenél pe amalénge: Bešavén‐ta len po penínda manúš jekhethané.

¹⁵ Čoká kerén, bešavén len saoŗén.

¹⁶ Lel o panš maŗó, lel o dúi mačhó, dikhél n’ oopré, blagoslovínel, phagél, del pe amalénge, ta te den ol‐da e narodóske.

¹⁷ Sáoŗe‐da xan, čáljon. Kíden o kotorá, ašlé deš‐u‐dúi sevljá pherdé kotorá.

¹⁸ Uló so uló, stavisájlo kórkoŗo o Ísus, ov‐da molínelas‐pes e Devléske, o amalá‐da lésa kupáte. Phučél len: O naródos savó mislínel sinjóm me?

¹⁹ Ol‐da phenén léske: Adalká vakerén: Isí o Ivános, o Krestítelos; amí phenén‐dani kai sinján o Eliás, odolká‐da phenén kai sinján e purané prorokéndar jek — pále napálpale ukístiljan andár e mulénde.

²⁰ Phenél lénde: Amí tumé so phenén, ko sinjóm? O Símon, o Pétres, vakerél: Tu sinján o Xrístos katár o Del.

²¹ Amí phenél lénge: Má‐vakerén adavká níkaske.

²² Phenél‐dani: E Manušéskoro Čhavó but katerpínel, kaotfŭrgínen les o phuré, thai o rašajá, thai o pisárja, kamudárdjovel, ka‐uxtjél, e triné dieséntar.

²³ Saoŗénge‐da phenél: Te mángla dek manúš ta te džal palál mánde, so beijendínel, te mukél, te lel po trušúl, ta t’aavél palál mánde.

²⁴ Sóske savó mangél ta te ikerél po džiipé, les kanašavél; ko kanašavél asál mánge po džiipé, ka‐ikerél.

²⁵ So kazandínel o manúš, kána so si andé dünjás sa kazandínel, amí po džiipé našavél, thai čhivél?

²⁶ Savó kaladžál man, thai me alavá‐da, lez‐da kaladžál e Manušéskoro Čhavó, kána kaavél pe silása, ándo ašaribé e Dadéskoro léskoro, thai e angeléngoro

²⁷ Amá čačipé tuménge phenáv: Isí manúš, athé térdjon, nána meripé kadikhén, e Devléskoro thagaribé dži kai te dikhén.

²⁸ Nakló óxto diés, e Petrés liljás, thai e Jakovés, thai e Ivanós‐da, thai geló n’opré ándo veš, ta te molínel‐pes.

²⁹ Molínel‐pes. Amá o múi léskoro deijišledínel, o urjaibé‐da párnjol thai thábjol.

³⁰ Áke vakerénas lésa dúi džené. Ol‐da isí o Músas thai o Eliás.

³¹ Íkljon ándo ašaribé, e Isúskere meribnástar vakerén kai k’isponíndjovel Jerusaliméste.

³² Amí o Pétres, thai léskere amalá but lindralé ulé. Džangálile, o ašaribé e Isúskoro dikhlé, dikhén‐da e doné muršén, kai paš léste terdé sas.

³³ Adalká‐da, o dúi džené, kána mangén te džan‐peske, áke phenél e Isúske o Pétres: Abé Baréja, lačés t’ovás athé. Muk‐ta te kerás po trin katúna, túke jek katúna, e Musáske jek katúna, e Eliáske jek katúna. Amí na džanélas, so phenélas.

³⁴ Vakerélas. Hékje okotár avél jek óblakos, učhál del uprál lénde; diné ándo óblakos, daránile.

³⁵ Andár o óblakos jek sö́zi uló, phenél: Adavká isí mo čho mo dukhanó, šunén‐ta les.

³⁶ Hénos vakerélas i sö́zi, áke uló kórkoŗo o Ísus. Ol‐da táinen, na vakerén níkaske so dikhlé, odolké diesénde.

³⁷ Nakló jek diés, ov‐da e vešéstar uxljélas, áke avén but naródos mamúi léste.

³⁸ Thai siné maškár lénde jek manúš, pištínel: Ábe Baréja, mangáv tut te dikhés me raklés, sóske ov isí mo jekhoŗó.

³⁹ Isí‐da léske jek górko dúxos, sa čhivél les ándi phuv, tsídel les, léske‐da čhórdel i pjéna e móstar, sa čalavél les, hemén, nána mukél les.

⁴⁰ Me‐dani mangávas te amalén, ta te gonínen les, e duxós, ol‐da naští.

⁴¹ Phenél o Ísus: Bipakjanálen‐be! pánda kití vréme t’ováv paš tumén? An‐ta te čhavés athé.

⁴² Pášilo o čhavó, pašljakjarél les o bengk, čhivél les.

⁴³ Ladžavél o Ísus e bišužé bengés, sastjarél e čhavés, igálel les e dadéste.

⁴⁴ Sáoŗe‐da čudínen‐pes, kai dikhén i síla, thai i zor e Devléskeri; čudisájle. Amí phenél odovká pe amalénge: Ikerén‐ta adalká alavá tumaré vogjénde, sóske kanakjél so kanakjél, kaperél e Manušéskoro Čhavó e manušénge ándo vastá.

⁴⁵ Ol‐da nána axáljon so phenélas thai adalká alavá garavdé sas léndar, nána den pez godí dži lénde, thai trašán‐da, te phučén les.

⁴⁶ Thai den pez godí, savó t’oovél maškár lénde po‐baró.

⁴⁷ Axáljol o Ísus, lel jekhé čhavés, thovél paš len.

⁴⁸ Phenél: Savó adalké čhavés kalél thai kakerél kabúli ándo aláv moŗó, man‐da kabúli kerél, savó man kabúli kerél, lez‐da odovká kai man bičhaldjás, kabúli kerél. Sóske ko si nái‐tsikno maškár tuménde, odovká nái‐baró isí.

⁴⁹ Del ótgovor o Ivános, phenél: Abé Učítelo, dikhljám déke dženés, gonínelas e bengén ándo aláv toŗó, amé‐dani: Ma‐ker phendjám, sóske ov nanái améntsa kupáte.

⁵⁰ Phenél o Ísus: Má‐vakerén léske: Ma ker, sóske odovká kai nána džal kárig tuménde, tuméntsa džal.

⁵¹ Amí pášjon o diés kána ka‐ukljél ándo nébos, ov‐da kerél te džal Jerusaliméste.

⁵² Bičhalél rasilnikén anglál pes, džan, den ándi Dis e Samariténgeri, ta te buxljarén asál léske.

⁵³ Amí othé nána posreštínen les, sóske díkhjol, sar jek pŭ́tnikos kai Jerusaliméste džal.

⁵⁴ Dikhén o Jákov, thai o Ivános, phenén: Góspodi, mangés‐li te vikínas andár o nébos jag, te thabjarél len?

⁵⁵ Ladžavél len odovká, čoká: Savé duxéstar sinjén, nána džanén tumé.

⁵⁶ E Manušéskoro Čhavó nána aló e vogjén ta te čhinél, amí ta te ikerél. Ol‐da džan averé dizjáte.

⁵⁷ Čoká phirindós avél lénge dek dženó, phenél e Isúske; Káte tu džas, othé kadžáv me‐da.

⁵⁸ O Ísus phenél: I lisítsa isí láke xev, o čiriklé isí lénge nézdos, amí e manušéskere Čhavéske nanái ka te thovél po šeró.

⁵⁹ Averéske phenél: Taavés palál mánde. Phenél o dženó: Baréja‐be, muk man te džav pó‐anglé te parónav me dadés.

⁶⁰ O Ísus vakerél: Te parónen o mulé pe mulén: amí dža‐ta, propovedín‐ta o thagaripé e Devléskoro.

⁶¹ Avér phenél: Kaaváv palál túte amá pó‐anglé muk‐ta te vakeráv o Ač Devlésa odolkénge kai kheré isí.

⁶² Phenél o Ísus: Ko thovél po vas ko phagiardó, (ko sabáni,) thai pósle palál pes dikhél, odovká nána doresél e Devléskere thagaribnáste.