Lukéstar 7 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ O vakeribé kána kerdó sas mamúi e narodóste, geló ándi Dis Kafernaum.

² Siné jek askéri, jüzbaši isí, siné‐da les jek slúga, ov‐da nasfaló dži ko meribé, o Ísus‐da dukhál e askerjéske.

³ Odovká, o askéri, kána šunél, bičhalél e phurén katár o Džutné te džan mamúi e Isúste, molínel‐pes léske, ta t’aavél te sastjarél pe slugás.

⁴ Alé paš léste, molínenas‐pes léske, phendé: Lačó murš isí, ta te kerés léske adavká.

⁵ Sóske déxel o Džutnipé; kerjardjás aménge jek kangerí.

⁶ Geló léntsa o Ísus. E kheréstar kána nána dur isí, bičhalél léske o jüzbaši dékes katár pe amalá, te phenél: Góspodi, ma‐xa xolí; nána sinjóm dósta lačó, ta te des ándo kher moŗó.

⁷ Me‐dani, dinjóm man godí kai nána sinjóm dósta lačó ta te džav paš túte‐da; amí sámo te phenés o aláv, kasástjol mi slúga.

⁸ Sóske me‐da sinjóm xîzmetkjári e thagaréskoro, thai isí mánde‐da askérja telál mánde; tha phenáv adalkéske: Dža, thai džal; odolkéske‐da: Éla, thai avél, thai me slugáske: Ker adavká, thai kerél.

⁹ Šunél o Ísus, čudínel‐pes, irínel‐pes ko naródos, kai palál léste džálas, phenél: Čačipé phenáv tuménge, asavká pakjoibé nan arakljóm ándi Israel‐da.

¹⁰ Ol‐da, kai bičhaldjás len o askéri, o jüzbaši, irisájle kheré, araklé e slugás sastó vestó, ka nasfaló sas.

¹¹ Nakló so nakló, geló o Ísus jekhé dizáte, kai vikínen la Náim, lésa‐da berabér gelé léskere amalá, thai but kalabalékji palál léste.

¹² Geló dži ándo vudará e Dizjákoro. Áke anén avrí jekhé mulés, o muló‐da isí pe daiákoro jekhoŗó, ói‐da jek phivlí; but džené andár i Dis lása jekhethané phirénas.

¹³ O Ísus kána dikhljás‐la, rahmáni uló dži láte, phenél láke: Má‐rov.

¹⁴ Aló pašpašé ko urdó, kerél e vastésa dži léste, e muléste, kai uprál o ódros (i phal) pašló sas. Térdile o manúš, odolká kai anénas les. Ov‐da vakerél: Ternéja, phenáv túke: Uští‐ta.

¹⁵ O muló‐da uxtinó, liljás te vakerél. O Ísus‐da del les pe daiáke.

¹⁶ Sáoŗe darán, e Devlés ašarén, phenén: Maškár aménde baró prorókos aló, thai o Del posjetínel po naródos.

¹⁷ Adžuká vakerén uprál léste sa ándo Džutnipé, thai turjál saŗoŗé thanénde.

¹⁸ E Ivanóskere amalá‐da vakerén léske uprál adalká.

¹⁹ Vikínel o Ivános doné amalén, bičhalél len e Isúske, ta te phenén: Tu‐li sinján odovká, kai kamavél, ili te žarás thai t’ arakhavás averés?

²⁰ Alé paš léste, phendé: Bičhaldjás amén o Ivános paš túte, phenél: Tu‐li sinján odovká, kai kamavél, ili te žarás thai t’arakhavás averés?

²¹ Amí o Ísus sastjarélas but manušén léngere nasfalipnástar, thai katár o phumbaló čhinipé, thai katár o górke dúxja, thai e koŗénge dikhibé délas.

²² Vakerél, phenél lénge: Džan‐ta, thai te phenén Ivanóske so šundjén, so dikhljén: O koŗé dikhén, o bangé, kai langénas, akaná phirén, o geralé sástjon, o kašuké šunén, o mulé pále uxtjén, e čoŗénge‐da propovjedínjovel o evangélje.

²³ Thai baxtaló odovká isí kai nána sŭblazínjovel mándar.

²⁴ Gelé‐peske o póslanni katár o Ivános. Amí o Ísus liljás te vakerél e narodóske uprál e Ivanóste. Ándo pústo than kána ikístiljen, so geljén ta te dikhén tumé? Jek kamísi kai lízdral ándi balvál?

²⁵ Amí so ikístiljen te dikhén? Jek urjavdó barvalé šexjéntsa? Áke siné edekí barvalé urjavdé, thai kolá lačés xan, pién, ándo kherá e thagaréngoro bešén.

²⁶ Amí so ikístiljen te dikhén? Jek prorókosli? Phenáv tuménge: Va! thai e prorokéstar baredér isí adavká.

²⁷ Adavká isí koléstar isí pišimé: Áke bičhaláv me rasilnikós mamúi te móste, ková kaphuterél anglál túte o drom te džas.

²⁸ Sóske phenáv tuménge: Maškár odolkénde kai siné e džuvljéndar biandé, e Ivános‐Krestiteljéstar pó‐baró nanái. Amí ándo thagaribé e Devléskoro ková si pó‐tsikno, léstar pó‐baró isí.

²⁹ Šundé o naródos, sáŗoŗe, thai o gümrükdžídes: ašarén e Devlés, sóske siné bolavdé, ándo paní e Ivanóskere bolipnástar.

³⁰ Amá o Farizéji thai o zakónniki o nasiháti e Devléskoro aprasán, sóske nána siné léstar bolavdé ándo paní.

³¹ Phenél o Ísus: Káske te sravnínav o manúš akalké zamanjéskere? Sar káste isí?

³² Siné sar čhavé kai bešén ándi čaršíja, xoratínen‐pes, vakerén: Amé bašaldjám tuménge durulí, amí tumé nána kheldjén, amé bašaldjám žálno gilí, amí tumé nána runjén.

³³ Aló tuménge Ivános Krestítelos, ov‐da maŗó nána xálas, mol nána piélas, tumé‐da phenén: Isí léske bengk.

³⁴ Aló e Manušéskoro Čhavó, xal, piél, tumé‐da phenén: Áke aló jek manúš, maŗó xal, mol piél, amál isí e gümrukdžidonénge, thai e bezexéngerénge.

³⁵ Katár pe čhavé‐da pendžárdjovel o godiaveripé.

³⁶ Jek Farizéos mangljás les, ta te xal maŗó lésa. Del o Ísus ándo kher, bešél ta te xal maŗó.

³⁷ Áke jek džuvlí ándi Dis — lubní sas — kána džanél kai ov beštó si ki mása ándo kher e Farizejéskoro, anél jek moxtón pherdó sungalé maklésa.

³⁸ Térdili napalál, liljás te thovél léskere piŗé ándo ásfa, thai te kosél len pe baléntsa, thai čumídel léskere piŗé thai e sungalé maklésa makjél.

³⁹ O Farizéos, odovká kai les vikindjás ándo kher, kána dikhljás, kórkoŗo péske xoratínel, phenél: Odovká, te sas prorókos, hič te n’ovél džanélas‐bi saví si adiká džuvlí kai del uprál léste e vastésa; sóske lubní si.

⁴⁰ Amá o Ísus phenél léske: Ábe Simóno, an‐ta te phenáv túke váreso. Ov‐da: Góspodi, váker.

⁴¹ Siné jek zaimodávtsos, isí les‐da dúi dlŭzniki, o jek‐da panš šel páres čikaló sas léske, o avér dženó penínda (ili pédeset) páres isí te del les.

⁴² Amí nanái lénge, e donénge, so te den léske, ov‐da bašladinjás len e donén. E donéndar savó déxel les pó‐but?

⁴³ Phendjás o Simónos: Mislínav, dav man godí, káske pó‐but prostinjás, odovká pó‐but déxel les. Phendjás léske o Ísus: Lačés vakerdján.

⁴⁴ Irinjás‐pes ki džuvlí, phenél‐da e Simonéske: Dikhés‐li adalké džuvljá? Dinjóm andré te kheréste, nána dinján man paní te thováv me piŗén. Amí ói thodjás ándo ásfa, kosljás pe baléntsa‐da.

⁴⁵ Tu nána čumidinján man, amá ói sar dinjás ándo kher, sa čumídel me piŗé.

⁴⁶ Sungalé maklésa nána maklján mo šeró, ói‐da me piŗé sungalé maklésa sa makél.

⁴⁷ Thai phenáv túke: But bezexá láke prostíndjoven, sóske but dexinjás. Amí káske póxaŗí bašladínjovel, ov pó‐xaŗí‐da déxel.

⁴⁸ Phendjás láke: Prostíndjoven te bezexá.

⁴⁹ Amí odolká kai bešté sas jekhethané ki mása, lilé te phenén pe godjénde: Savó si adavká, kai o bezexá‐da prostínel?

⁵⁰ Ov‐da phendjás e džuvljáke: To pakjoibé spasindjás tut; dža‐ta lačipnása.