Lukéstar 5 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ O naródos kána geló sa palál les, te šunél e Devléskere alavá, térdilo sas paš o baró paní Genesareth.

² Dikhljás doné korabjén, pašé paš o paní, amá ikístile sas o mačhéngere katár lénde, pe katlé thovénas.

³ Geló paš jekhé korabjáte, e Simonéskere, phendjás léske, ta te mukél xaŗí katár i phuv, beštó‐da ándo korábi, othár sikljardjás e narodós.

⁴ Kerdó o vakeribé, phendjás Simonéske: Muk‐ta ándo xaripé, čhivén‐ta tumaré katlé, mačhén t’astarén.

⁵ Vakerdjás o Simónos: Abé Xulája (Góspodi)! amé tsálo rat butjarás, nána astardjám čípota, amí te mángsa, kateljaráv o katló.

⁶ Kerdé čoká. Hékje okotár nái‐but mačhén dolén, hemén ta te phágjol o katló‐da.

⁷ Vikínen pe amalén, kai siné e javré korabjénde ta t’aavén, te pomožínen len. Alé, pherén o korabjá, mačhén, hemén téljon telál o paní o korabjá‐da.

⁸ Dikhljás o Simónos, o Pétres, peló pe kočénde mamúi e Isúste, vakerél: Dža mándar, Góspodi, bezexéngoro manúš sinjóm.

⁹ Čoká phendjás, kai čudínel‐pes ov‐da, sáŗoŗe‐da, sostár edekí but mačhén dolénas.

¹⁰ O Jákov‐da, thai o Ivános, e Zebedejéskere čhavé, kai e Simonésa kupáte butí kerénas. Phendjás e Simonéske o Ísus: Ma‐dar, akalké dieséstar manušén kadolés.

¹¹ O korabjá tradiné ándi phuv, sa muklé, gelé palál léste.

¹² Uló so uló, kána siné ov jekhé dizjáte, aló léske jek geraló, dikhljás les, peló pe móste ándi phuv, molínelas‐pes léske, čoká: Góspodi, te mángsa, astí šužljarésa man.

¹³ Kerél pe vastésa, dokandínel les, thai phenél: Mangáv t’ovés šužó. Thai andékhora nakló léstar o ger.

¹⁴ Phenél léske o Ísus: Ma izváker dekáte, amí dža, sikáv tut e rašajéske, t’ovés šehadéti mamúi lénde, sar phenél e džuténgoro zakónos.

¹⁵ Amá buxljardjás‐pes ándo them i xórata, sa pó‐but, kídel‐pes but naródos, te šunél, kidisájle turjál les, nasfalipnástar te sástjon.

¹⁶ Adavká‐da geló jekhé pustoné thanéste, ta te molínel‐pes.

¹⁷ Nakló so nakló, jek diés bešélas, ko sikljaribé. Bešén pašé o Farizéi, thai o sikljardé katár e forénde ándi Galiléa, ándo Džutnipé, t’ándo Jerusalím; e Devléstar kuvéti sas léske, ta te sastjarél len.

¹⁸ Áke igálen jekhé muršés mamúi léste, odolké muršéste isí nasfalipé, i dámla; kerén te igálen les mamúi léste uprál jekhé kervetjéste, te thovén les anglál léste ki phuv.

¹⁹ Rodiné, nan’ araklé sar te anén les andré, sóske baró kalabaléki sas. Kerén, džan uprál o kher, teljarén les andrál, e kerevetjása berabér, maškár e narodóste, Isúske ko piŗé.

²⁰ Adavká, léngoro pakjaibé kána dikhljás, phendjás: Múrša‐ba, bašladínjoven te bezexá.

²¹ Mislínen o Farizéi thai o sikljardé: Savó si adavká, ne‐li akušél e Devlés, ne‐li o Del kórkoŗo aští mukéla o bezexá e manušéngoro?

²² Axáljol o Ísus, so mislínen, phenél: So mislínen tumaré godjáte?

²³ So si pó‐lesno te phenáv‐li: Prostíndjoven te bezexá, ili te phenáv: Uští, ta te phirés?

²⁴ Amí te džanés, kai isí mánge, (e Manušéskere Čhavéske) zor, andé dünjás te phuteráv e manušén katár o bezexá, uxtí, — phenél o Ísus e nasfaléske, — uxtí, le to kéreveti, džá‐tuke kheré.

²⁵ Vŭ́zdel‐pes andékhora o nasfaló, vŭzdinjás po kéreveti, geló‐peske pe kheréste, e Devlés ašarindós.

²⁶ Sáŗoŗe‐da čudínen‐pes, ašardé e Devlés, amá phérdile, traš, phenén: Baré šejlér avdiés dikhljám.

²⁷ Napalál ikístilo o Ísus, dikhljás jekhé gümrükdžís, o aláv léskoro Levi, bešélas ki gümrükxané. Phenél léske o Ísus: T’avés palál mánde.

²⁸ Ov‐da, o gümrükdžís sa mukhljás, uxtjél, džal palál léste.

²⁹ Kerél léske o Lévi baró xabé, gotvínel ándo kher, thai sas but džené gümrükdžídes othé, thai avér džené, bešté ki mása lésa berabér.

³⁰ Amá o Farizéi thai o sikljardé mŭrmŭrínen, phenén léskere amalénge: So xas, piés e gümrükdžidonéntsa, thai e bezexengeréntsa?

³¹ Odovká phenél: O sastó manúš na mangél drah, amá o nasfaló mangél.

³² Aljóm te vikínav odolkén kai si lénge bezexá, nanái te vikínav odolkén, e lačé manušén.

³³ Odolká phenén léske: E Ivanéskere amalá sóske but drom na xan, na pién, but molínen‐pes, thai čoká kerén e Farizejéngere amalá‐da, amá tumaré amalá, sa xan, pién.

³⁴ O Ísus phendjás lénge: Aští‐li bokhalé t’ačhalés e čhavén, kána bešéla léntsa o biavéskoro (o Džamutró).

³⁵ Amí kaavél o diés kána léndar kalínjovel o Džamutró, togái néka bokháljoven.

³⁶ Phendjás lénge jek paramísi, čoká: Nanái andé dünjás manúš edekí deniló, ta te lel nevó kotór than katár pe šéxja, ta te sivél les jekhé purané urjaibnáste, sóske te kerél adžuká, hem o nevó urjaibé phuterél, hem o nevó kotór e purané urjaibnáske na prépel.

³⁷ Thai jek dženó nána thovél neví mol andé purané šišénde, sóske te kerél adžuká, kapháŗjoven o šišé katár i mol, kačhórdjovel i mol, k’oovén o šiše phaglé.

³⁸ Amá trébe te thovél i neví mol andé nevé šišénde, thai čoká aští ikeréla hem i mol hem o šišé.

³⁹ Hem čoká nanái te piél puraní mol, thai pósle te mangél neví mol. Sóske phenél: I puraní pó‐lačí isí.