Lukéstar 4 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ O Ísus pherdó sas, Sfjáti Dúxos, irisájlo katár o Jórdan, katár i len, thai igaldjás les o Dúxos jekhé pustoné thanéste.

² Saránda diés, saránda ratjá ašló othé, thai mangélas o bengk t’igálel les ándo bezexá. Odolké diesénde nána xálas, thai napalál bokhálilotar.

³ Phendjás léske o bengk: Te sinján tu o čhavó e Devléskoro, te phenés odolké baŗéske ta t’ovél maŗó.

⁴ Vakerdjás léske o Ísus: Pišimé isí: Nanái sámo maŗésa o manúš te parvarél pes, amí e Devléskere alavéntsa‐da.

⁵ Igaldjás les o bengk andé jekhé učé vešéste, andé dünjás so si so nanái, them, thagaripé, sa jekhé dakikáte sikavdjás les.

⁶ Thai phendjás léske: Túke, phenél o bengk, adiká vlástji kadáv, thai i sláva‐da, sóske ói miŗí isí, thai káske mangáva, léske aští dáva la.

⁷ Áke te poklonínes tut mamúi mánde, so si so nanái, sa t’ovél toŗó.

⁸ Vakerdjás léske o Ísus, thai phendjás: Pišimé isí: Ko Rai (Góspod) ko Del te poklonínes tut, les sámo te služínes.

⁹ Igaldjás les o bengk ándo Jerusalím, bešavdjás les uprál e kangerjáte, thai phendjás léske: Te sinján o čhavó e Devléskoro, te čhivés tut atár katár uprál,

¹⁰ Sóske isí pišimé: Thodjás pe rasilnikén ta t’arakhavén tut, ta te dikhén tut,

¹¹ Ta te uxtjavén tut pe vasténtsa, te na čalavés te piŗé jekhé baŗéste.

¹² Vakerdjás léske o Ísus: Pišimé‐da isí: Te na igalés e Devlés, te Gospodés, ándo bezexá.

¹³ Kána kerdó sas o iskušénje, garávdjilo o bengk.

¹⁴ Irisájlo o Ísus ándi zor e Duxóskeri, aló ándi Galiléa, thai ándo them sa šundjás‐pes o vakeribé uprál les.

¹⁵ E kangerjénde sikljardjás, thai sáŗoŗe ašardé les.

¹⁶ Aló ándi Nazareth, okotká kai bárilo sas, geló e kangerjáte, po ádeti, sabatoné, thai uxtjél ta te četínel, thai te dikhél ándo lil.

¹⁷ Diné les o ketápi Isaiáskoro, e rasilnikóskoro, ov‐da pinravdjás (phuterdjás) o ketápi, arakhljás o than káte pišimé isí:

¹⁸ O Dúxos e Gospodéskoro uprál mánde si. Bičhaldjás man o Del, ta te vakeráv e čoŗénge e Devléskoro aláv, makljás man‐dani, ta te makaváv o vogí okolkéngoro, kai siné pišmáni pe bezexéndar.

¹⁹ Ta te xaberladínav phuteripé e jesirjénge, ta te phenáv e koŗénge: Kadikhén, te phenáv‐da e zawaljénge: K’oovén phuterdé, sóske kaavél o diés e Devléskoro.

²⁰ Četinjás, phandljás o ketápi, dinjás les e slugáske, beštó si, sáoŗe‐da, so si so nanái manúš ándi kangerí, dikhén les ándo jakhá.

²¹ Liljás te vakerél lénge: Avdiés uló tuménge so pišimé si.

²² Sáoŗe kerdé šahidléki asál léske thai čudínen‐pes, o alavá léskere kai šunén, thai phendé: Nanái‐li adavká e Yusuféskoro čhavó?

²³ Ov‐da phendjás lénge: Hič te n’ovél, tumé mánge kaphenén: Ábe drabengeréja, sastjár tut sámo! Barí čípota kai kerdján Kapernaumóste, edekí baró váreso ker‐ta athé, te Dizjáte.

²⁴ Phendjás lénge: Čačés phenáv tuménge: Nanái Devléskoro rasílnikos t’ovél kabúli pe Dizjáte.

²⁵ Amí čačipnása phenáv tuménge: Eliáskere zamanjénde, kána phangló sas o nébos trin berš t’epkáš, t’ándo them so si manúš bokhálile, odolké zamanjéste but phivljá bešté ándi Ísrael:

²⁶ Amá katár lénde níkaske aló o Eliás, sámo e Sareptáke ándi Dis Sáida.

²⁷ T’ ándo them but džené geralé sas, e Eliseóskere zamanjéste, amí o Naaman kórkoŗo šužó uló, ov‐da katár i Súria.

²⁸ Sáoŗe‐da ándi kangerí kána šundé, rušlé ulé thai uprál léste xoljasájle.

²⁹ Uxtiné, tradiné les ándo agór, thai andé les uprál jekhé vučé thanéste, e Dizjáke ko agór, ta te peravén les athár.

³⁰ Ov‐dani nakló maškár lénde, garávdilo‐tar.

³¹ Geló na‐telé ándi Galileákeri Dis Kapernaum, kurké sikljarélas len.

³² Ol‐da čudínenas‐pes léskere sikljaribnáske, sóske o vakeripé léskoro zoraló sas.

³³ Ándi kangerí jek manúš sas, thai andré léste bišužó bengk bešélas, thai vikínelas:

³⁴ Te mukés man; so si mánge butí túsa? Ábe Ísus, Nazarenéja, ne‐li alján, ziáni te kerés man? Džanáv ková tu sinján, tu sinján e Devléskoro Sfjáto.

³⁵ Azarladínel les o Ísus, phenél: Ma váker, dža‐ta léstar. O Bengk‐da čhitjás les maškerál, geló léstar, na kerdjás les čípota.

³⁶ Sáoŗe‐da daránile, thai xoratínen‐peske: So si adavká, kai zor‐ilé, thai kudréti‐ilé, vakerél e bišužé duxénge, ta džan‐peske?

³⁷ Džal i xórata, than thanéste sáoŗe šundé ándo them.

³⁸ Uxtinó o Ísus andár i kangerí, geló Simonéskere kheréste. Thai i sasúj léskeri, e Simonéskeri, ulí láte barí tréska; molínen‐pes léske o džené, asál láke.

³⁹ Ov‐da térdilo uprál láte, phendjás e treskáke te mukél la. Mukljás! Uxtiní adiká andékhora, služínel lénge.

⁴⁰ O kham kána batindjás, káske isí amalá nasfalé, ráznja naborjámata, saŗoŗén‐da igaldé léske. Thovél adavká vastá lénge ko šeró, sastjarél len.

⁴¹ But dženéndar‐da ikístile avrí o bengá, vakerén: Tu sinján o čhavó e Devléskoro. Ov‐da azarladínel len, te na vakerén. Zerré džanén kai ov Xrístos isí.

⁴² Dísilo. Ikístilo, aló jekhé pustoné thanéste; amí o naródos ródel les, avén paš léste, na mukén les, na mangén te džal‐peske léndar dur.

⁴³ Vakerél lénge: Ta te džav, te vakeráv avré theménge uprál o thagaribé e Devléskoro. Áke o sebébi sostár bičhaldjás man o Del andé dünjás.

⁴⁴ Vakerélas‐da e kangerjénde ándi Galiléa.