Lukéstar 24 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ Amí ko tasiá but javiné avén ko mímoras, thai makljésa drabá anén, kai gotvindé, thai lénsa berabér avén pánda džené.

² O baŗ‐da dikhén kai línilo sas katár o mímoras.

³ Den andré, e Isúskere trupós nan’arakhjén.

⁴ Ol‐da sar čudínen‐pes, hékje okotár avén paš len parné urjaibnása dúi džené muršá.

⁵ Ol‐da, o džuvljá, daránile, poklonínen o čekát ki phuv. Togái vakerén lénge o dúi džené: So róden tumé e dživdés maškár e mulénde?

⁶ Athé ov nanái, amí uxtinó. Šerén‐ta tumén (Den tumén godí) sar tumén vakerdjás, kána hénos ándi Galiléa sas.

⁷ Thai sar vakerdjás: E Manušéskoro Čhavó trébe te dénjovel ándo vastá e bezexéngoro, ta t’ovél buxljardó ko trusú, amí ko tréto diés ka‐uxtjél.

⁸ Den godí léskere alavá.

⁹ E mimorátar nakjén, pále džán, phenén sa adavká e deš‐u jek amalénge thai e averénge.

¹⁰ Čoká phenén lénge i María Magdalína, thai i Ivána thai i María, e Jakovéskeri Dai, thai avér džené‐da.

¹¹ Ol‐da mislínen kai isí xoxaibé, nána pakjén.

¹² Uxtjél o Pétres, prástal ko mímoras, téljol, džal andré, so te dikhél, o poxtán thai o diklé, othé ačhón, amí trúpos nanái, džal, našél othár, čudínel‐pes, so si adiká butí.

¹³ Odovká‐da diés gelé dúi katár lénde jekhé gavéste, o gav‐da isí Emáos, e dizjátar Jerusalím šovardés stádja dur kai isí.

¹⁴ Ol‐da e droméste sa xoratínen‐peske, so uló.

¹⁵ Hem džan hem xoratínen‐peske, phučén, vakerén; hékje okotár avél o Ísus paš len, léntsa kupáte phirél.

¹⁶ Amí léngere jakhá isí sar phandlé, nána pendžarén les.

¹⁷ Ov‐da vakerél lénge: So si adavká so tumé vakerén, thai xoratínen e droméste, thai bibáxtale díkhjoven?

¹⁸ Togái phenél léske jek murš maškár lénde, o aláv léskoro Kleopás kai isí, vakerél: Čačés‐li tu kórkoŗo, kai akaná e Dizjátar Jerusalím avés, so uló othé adalké diesénde nána džanés?

¹⁹ Phenél lénge odovká: Saví butí? Ol‐da vakerén léske: Abé ne‐li šundján? O Ísus o Nazarinéskoro, baró prorókos kai sas, alavéntsa, butjása‐da zoraló, mamúi e Devlés thai e manušén baró,

²⁰ Les bičhaldé amaré baré‐rašajá thai pópja, ko meribé, ta te búxljol uprál o trušú.

²¹ Amé‐dani amaré vogjáte mangásas, ta t’ovéí Odovká, Ková o Džutnipé kaphuterél; aml díta díta, avdiés isí véče trin diés kai odovká uló.

²² Amí isí džuvljá amaré daravdé amén, but javiné gelé ko mímoras,

²³ Nan’ arakhlé o trúpos léskoro, amí alé, phendé kai e angelén dikhlé, kolá vakerdé lénge kai Ov dživdó isí.

²⁴ Gelé džené améndar, ko mímoras džan, arakhlé sa čoká, sar o džuvljá‐da vakjerdé, amí Les nána dikhlé.

²⁵ Ov‐da vakerél lénge: Levavdálen‐be, gerálen‐be, ta te na pakjén sígo sa so vakerdé o prorókja.

²⁶ Ne‐li trebindjás ta te stradínel čoká o Xrístos, dži ka te resél ándo ašaribé léskoro?

²⁷ Liljás, e Musástar dži ándo agór, e prorokéngere lilá thai ketápja saoŗén izjasínel lénge so pišimé isí turjál Les.

²⁸ Akaná e gavéste pášjon katár gelé, thai ov kerél te džal pó‐duredér.

²⁹ Amí ol nána mukjén les, phenén: Žar‐ta, t’ačhés améntsa, áke téljol o kham, kablevéljol. Džal andré, ta t’ačhól paš len.

³⁰ Uló so uló, beštó isí léntsa jekhethané ki mása, lel o maŗó, blagoslovínel, phagjél, lénge‐da del.

³¹ Hékje okotár phutérdjile o jakhá léngere, pendžarén les. Ov‐da našávdjilo léndar.

³² Thai xoratínen‐peske, phenén: Ne‐li thábilo amaró vogí andé ’ménge, e droméste kána vakérlas, améntsa, thai aménge o ketápja phutérlas?

³³ Uxtiné odiká óra, irisájle, gelé ki Dis Jerusalím, arakhlé e deš‐u jek dženén, ol‐da kidisájle e averéntsa berabér.

³⁴ Phenén: O Rai (Góspodos) čačés uxtinó, thai e Simonéske pes sikavdjás.

³⁵ Thai vakerén lénge jek po jek so uló e dromeste, sar les pendžardé, ov kána o maŗó phagjélas.

³⁶ Hénos vakerénas. Áke aló odovká, o Ísus, maškár len, phendjás: T’ovél tuméntsa o míros.

³⁷ Ol‐da daránile, but‐da trašán, mislínen kai dikhén jekhé čoxanés.

³⁸ Odovká phenél lénge: Sóstar darán čoká, saví godí isí tuménge andé vogjén?

³⁹ Dikhén — ta me vastá thai me piŗé, me sinjóm, te dokačínen man, te dikhén man, sóske jekhé čoxanéske nanái mas thai kokalé, sar mánge isí, te dikhén.

⁴⁰ Hem phenél, hem o vastá thai o piŗé sikavél.

⁴¹ Ol‐dani lošanibnástar naští pakjén, sa čudínen‐pes. Togái ov phenél: Isí‐li athé váreso te xav?

⁴² Ol‐da thovén anglál les avginésa pekó mačhó te xal.

⁴³ Liljás, anglál len xaljás.

⁴⁴ Thai phendjás lénge: Adalká isí o alavá kai tuménge phendjóm, kána hénos paš tuménde sinjómas, sóske trébe te phérdjovel (t’isponíndjovel) sa so isí mándar pišimé ándo ketápi thai ándo zakónos e Musáskoro, thai e prorokéngoro, thai e Psalméngoro.

⁴⁵ Togái phuterél lénge i godí, thai o ketápja axálile.

⁴⁶ Thai phenél lénge: Čoká čoká isí pišimé, čoká te stradínel o Xrístos, thai e muléndar t’uxtjél ándo tréto diés.

⁴⁷ Ta te propovedínen ándo aláv léskoro kai trébe t’ovén o manúš pišmáni, ta te prostíndjoven o bezexá, te phenén‐da adavká sekoné narodóske, thai e Dizjátar Jerusalím t’astarén‐da.

⁴⁸ Tumé‐da dikhljén, axáliljen.

⁴⁹ Áke kabičhaláv tuménge Odolkés kai dinjás po aláv mo Dad, ta te bičháldjovel. Tumé‐da t’áčhon ándi Dis Jerusalím, dži ka te téljol uprá l tumén e nebéstar síla.

⁵⁰ Thai len igalél, na‐avrí kárig Bethánia anél, vŭ́zdel o vastá, blagoslovínel len.

⁵¹ Uló so uló, hem blagoslovínel, hem léndar našáldjovel, kárig o nébos ukljél.

⁵² Ol‐da léske molínen‐pes, thai lošanibnása ándi Dis Jerusalím irínen‐pes;

⁵³ Ol‐da sa siné ándi kangerí, e Devlés falínen ašarindós ašarindós. (AVÉR NANÁI.)