Lukéstar 23 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ Uxtjén sároŗe, anglál o Pilátos les igalén.

² Len te phenén thai te obvinínen les: Arakhljám adalkés, kai e narodós razvratínel, thai len phenél te nána den páres e kraléske, thai phenél‐da kai ov o Xrístos isí, thai jek thagár.

³ O Pilátos akaná phučél les: Tu‐li sinján o thagár e Džuténgoro? Ov‐da vakerél: Tu vakerés.

⁴ Togái o Pilátos vakerél e baré rašajénge thai e narodóske: Nan’arakháv dek doš adalké muršéske.

⁵ Ol‐da sa vakerén thai phenén: Ov e narodós džangadjás, ándo Džutnipé gav gavéste džal, sikljarél, katár i Galiléa dži kai resél adalké thanéste.

⁶ O Pilátos o aláv Galiléa kána šunél, phučél ne‐li isí odovká murš katár i Galiléa?

⁷ Kána axáljovel kai ov telál i vlástji e Herodóskeri isí, bičhalél les ko Heródos, ková odolká diés ándi Dis Jerusalím isí.

⁸ O Heródos kána e Isús dikhljás, but lošánilo, sóske but mangélas te dikhél les, thai but šundjás léstar, thai akaná isí léske godí ta te dikhél léstar jek čúdo.

⁹ Čoká but but phučél les. Amí odovká ótgovor (džewábi) nána del (anglál nána del).

¹⁰ Amí o rašajá thai o sikljardé sa térdjon pašé thai zoralés obvinínen.

¹¹ O Heródos‐da pe askerjéntsa asánile thai aprasandé les, urjavén les jek parní postín, pále bičhalén les paš o Pilátos.

¹² Odovká diés ulé amalá (parnavé) o Pilátos thai o Heródos, kai pó‐angle düšmánja sas (kai pó‐anglé siné maškár len jek düšmanlékji).

¹³ Akaná o Pilátos vikínel e baré rašajén thai e pristavjén e narodésa berabér, kidisájle.

¹⁴ Thai phenél lénge: Igaldjén mánge adalké muršés, thai phenén kai ov e narodós igalél kárig e kralés, amí díta, šundjóm thai phušljóm les anglál tumén, thai léske hič nan’ arakljóm so tumé les obvinínen.

¹⁵ O Heródos‐dani hič nan’arakhljás. Sóske díta bičhaldjóm tumén paš les, thai ov andé les hič nána dikhljás ta t’ovél sudimé te merél.

¹⁶ Áke kamarjaráv les, kamukháv les.

¹⁷ Akaná isí lénge adéti, jekhés ta te prostíne ko diés ko práznikos.

¹⁸ Amí sároŗe pištínen, phenén: Adalkés nána mangás, muk‐ta aménge e Barabás,

¹⁹ Ková sudimé sas, e zandanjáte te phándjol, sóske čingár thai manušfarí kerdjás ándi Dis.

²⁰ Vakerél pánda jéfkar lénge o Pilátos, mangél te phuterél e Isús.

²¹ Ol‐da sa vikínen: Te búxljovel uprál o trušú, te búxljovel uprál o trušú, (te raspinínen les) (te xačladínen les).

²² Ov‐da, o Pilátos ko tréto drom phenél lénge: Amí so bilačipé kerdjás? Hič nan’arakháv jek sebébi sóske te merél. Kamarjaráv les, kaphuteráv les.

²³ Amí baré vikimása mangén t’ovél raspinimé uprál o trušú, thai e baré rašajéngere vikimáta pó‐zoralé ulé.

²⁴ O Pilátos‐da les sudínel, sar mangljás o naródos.

²⁵ Phuterél‐da lénge odolkés, ková uló sudimé te phándjol e manušfarjéske thai e maribnáske, kas mangélas o naródos, amí del lénge e Isús, ta te kerén léske so mangén.

²⁶ Igalén les, gelé kai gelé. E droméste‐da astarén dékes, kai vikínen les Simónos o Kirénikos, ková katár i livádja avélas, léske‐da thovén uprál o phiké o trušú ta t’aanél les palál e Isús.

²⁷ But manúš‐da, muršá thai džuvljá, palál léste hem avén hem rovén, thai o vogí léngoro akhjarél.

²⁸ Irisájlo o Ísus, vakerél: Ái Raklále Jerusaliméskere, má‐roven dži mánde, amí rovén‐ta dži tuménde thai tumaré čhavénde.

²⁹ Sóske kaavél o vréme (tsíros) kána kaphenén: Baxtalé t’ovén odolká, bičhavéngere kai ačhón, thai o peŗá kai nána biandé, thai o čučjá kai thud nána diné.

³⁰ Ka‐astarén, te phenén e planinénge (plainénge): Perén‐ta uprál amén, thai e goričkénge: Učharén‐ta amén.

³¹ Sóske čoká te kerén e zelenoné kaštéske, e šuké kaštéske so kamkerén?

³² Avér doné muršén bilačén igalén, lésa jekhethané ta te čhíndjoven.

³³ Ándo than kána alé, kaí vikínen les e trupéskoro šeró, buxljarén les uprál o trušú thai buxljarén‐da e doné bilačén lésa berabér, jek ki désno rik, thai jek ki lévo rik.

³⁴ Togái phenél o Ísus: Mo Dad, prostín‐ta lénge, sóske nána džanén so kerén. Ol‐da ulavén (sekonés jek kotór den katár) léskoro urjaibé, naprŭ́štŭkja čhivindós.

³⁵ Térdjol o naródos, dikhél. Léntsa‐da berabér isí o nái‐glavne manušá, hem térdjon, hem aprasán, vakerén: E averénge pomožindjás, akaná‐da te pomožínel péske‐da, o Xrístos kána isí, o dukhanó e Devléskoro.

³⁶ O askérja‐dani hem aprasán les, hem šutésa avén, anén léske te piél.

³⁷ Thai phenén: Te sinján o thagár e Džuténgoro, čoká an‐ta te pomožínes túke tu.

³⁸ Thai uprál les ko trušú isí pišimé jek lil pogrŭ́tski (balamanés), po‐latínski thai po‐evréiski: Adavká isí o thagár e Džuténgoro.

³⁹ Amí jek bilačó, lésa kai umblavdó isí, akušél les, vakerél: Te sinján tu o Xrístos, te pomožínes túke.

⁴⁰ Amí phenél o avér, thai ladžavél les: E Devléstar ne‐li trašás tu kai sinján sŭšto sudimé?

⁴¹ Amí amé právo sudimé sinjám, sóske amé polučindjám amarí nagráda amaré bezexénge, amá adavká murš hič nána kerdjás bilačó čípota.

⁴² Thai vakerél e Isúske: Rája, (Góspodi) te des tut man godí, kána sinján andé thagaribnáste tiŗé.

⁴³ Vakerél léske o Ísus: Čačés phenáv tut: Avdiés k’oovés mántsa ándo nébos.

⁴⁴ Isí saxáti šov, thai perél uprál e themés jek kalipé dži ko saxáti énja.

⁴⁵ O Kham‐da po svétos našavél, thai i perdé ándi kangerí maškerál pharavdí ulí.

⁴⁶ Thai o Ísus vikindjás zoralés, vakerdjás: Mo Dad, dav mo vogí ándo vastá teŗé. Thai phenél thai merél.

⁴⁷ Akaná dikhél so uló o askéri, ašarél e Devlés, vakerél‐da: Čačés adavká sas jek lačó manúš.

⁴⁸ Thai o naródos kai pašé térdjon, thai dikhén so uló, mardé o kolín thai irisájle.

⁴⁹ Akaná o amalá sáoŗe, thai o džuvljá‐da kai les igaldé katár i Galiléa, durál térdjon, dikhén.

⁵⁰ Díta díta, avél jek murš, o Júsef, jek baró, thai jek lačó pakjanó manúš isí.

⁵¹ Ov nána mangljás ta t’ovél so uló thai so ol kerdé. Katár i Arimotía isí, e Džuténgeri Dis, ov‐da o thagaribé e Devléskoro žarélas.

⁵² Avél, džal paš e Pilatóste, mangél e trupós e Isúskere.

⁵³ Katár o trušú teljarél les, patjarél les ándo poxtán, thovél les ándo jek mímoras e baŗéstar čalavdó, káte pánda nána thodé khánikas.

⁵⁴ O diés‐da isí o parastjuvín, kadísjovel o sábatos.

⁵⁵ Avén kai avén napalál odolká džuvljá kai lésa katár i Galiléa alé, dikhén o mímoras, tha the dikhén sar pašljardé e trupós.

⁵⁶ Džan kheré, makljésa drabá gotvínen, thai sabatoné po zakónos butí nána kerén.