Lukéstar 21 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ Dikhél sar dikhél, o barvalé ándi lovéngeri kása po mangín den.

² Isí‐da dek phivlí čoŗí, ándi kása dúi páres čhivél.

³ Thai phenél o Ísus: Čačés phenáv tuménge, saroŗengeréndar pó‐but dinjás adiká čoŗí phivlí.

⁴ Sóske adalká barvalé katár po mangín ándi Devléskeri kása páres čhifté, amí adiká phivlí katár po čoŗipé, so si so nanái láke sa dinjás.

⁵ Isí džené othé, phenén: Amí savó šukaribé e kangerjáte, baré baŗéntsa thai armaganjéntsa šukarjardí kai isí. Phenél odovká:

⁶ Adalká, kai dikhén tumé akaná, kaavél jek diés kána baŗ uprál baŗés hič nána kaačhól, sa kaphágjol.

⁷ Phenén léske: Adavká kána k’oovél, savó znákos k’oovél, kána nakjél so kanakjél?

⁸ Phendjás lénge: Lačés te dikhén ta te na igálen tumén ándo iskušénje. Sóske but džené k’aavén ándo aláv moŗó, kamphenén: Me sinjóm, aló o sîras (rédos). Amí ma‐džan tumé palál len.

⁹ Kána maribé thai mudaribé šunén tumé, má‐darán, sóske trébe t’oovél čoká, amí pánda nan’ ovél o agór andékhora.

¹⁰ Amí jek naródos ka‐uxtjél kárig averé narodós.

¹¹ Athé othé k’oovél baró phuvjákoro kheldjoibé (lisdraibé), thai barí čúma, thai bokhalibé thai e Devléstar traš, thai baré znákja k’oovén.

¹² Amí pó‐anglé kamastarén tumén, kaperén palál tumén, katráden tumén anglál e kangerjénde, thai e zandanjáte (ki damía), mamúi e thagarén thai e pristavjén katsíden tumén, asál me alavéske.

¹³ Čoká k’oovél tuménge e šahidlekjéske.

¹⁴ Amí tumaré godjáte ma bisterén akavká: Nána trébe pó‐anglé te mislínen savó džewábi kadén.

¹⁵ Sóske mándar túke k’oovél múi thai godí, thai o düšmánja naští kavakjerén hič, thai hič nána kakerén kárig tumén.

¹⁶ O dad thai i dai, o phralá, o amalá‐da tumaré sáoŗe ka‐izmenínen tumén, isí paš tumén džené ka‐astárdjoven, kamudárdjoven.

¹⁷ Kakîidínen tuménge sáoŗe asál me alavéske.

¹⁸ Amá ni jek bal katár tumaró šeró nána kazagubínjovel.

¹⁹ Terpenjása t’ ikerén tumaré vogjá.

²⁰ Amí o askérja kána turjál Jerusalím tsíden, zagradínen la, te džanén kai adiká bibáxt dur nanái.

²¹ Togái ko isí ándo Džutnipé, ki planína te našél, ko isí maškerál t’ íkljol, amí ko isí e phuvjáte, te nána del andré.

²² Sóske odolké diesénde k’oovél barí Devléskeri xolí, ta t’isponíndjovel sa so pišimé isí.

²³ Amí bibáxt e khamljénge (khabnjénge) thai odolkénge kai e tsikné čhavénge čučí den, sóske uprál e themés čoribé, bibáxt thai xolí kaperél.

²⁴ E xaŗéste kaperén, sekoné theméste kabičháldjoven jesírja. O gadžé kamčhinén e Jerusalím, dži kai isponíndjovel sa so ka‐isponíndjovel.

²⁵ K’oovén togái znákja ándo kham, ándo čhorn, t’ándo čerxénja, thai ándo them maškár e narodóste čingár thai bibáxt, katár o panjá thai katár o denízi kai bašél.

²⁶ O manúš trašátar kašúkjoven, kána arakhavén so uprál e dünjás kaavél. Sóske kamkhéldjon i zor thai i síla e nebóstar.

²⁷ Togái k’aavél e Manušéskoro Čhavó ašaribnása silása‐da katár o óblakos.

²⁸ Amí akavká kána astarél ta t’ovél, te vŭ́zden tumaró šeró, te dikhén n’oopré, sóske nanái dur tumaró spasénje.

²⁹ Jek paramísi phenél lénge: Te dikhén i xelín, thai o kaštá, sa.

³⁰ I zéleno patrí kána sikavén, džanén kai o nilái pašé isí.

³¹ Tumé‐dani, kána dikhén sa akavká, te džanén kai o thagaribé e Devléskoro pašé isí.

³² Čačés tuménge phenáv: Nána kazanakjél adavká ródos, dži ka nan’ uló thai isponisájlo sa adavká.

³³ O nébos thai i phuv kanašáldjovel, amí mo aláv nána kanašáldjovel.

³⁴ Amí lačés te dikhén te nána kaphérdjon tumaré vogjá xabé, matipé thai o tasás (i mŭ́ka) e džiipnáskoro.

³⁵ Sóske kaperél sar jek fákos uprál saroŗén kai e dünjášte besén.

³⁶ Čoká trébe t’ovél tuménge sa muršipé thai te molínen‐tumén but, ta t’aští našéna adalké čumátar, thai tha the thérdjon mamúi e Manušéskere Čhavéste.

³⁷ Disé e kangerjáte‐da sikavélas, amí ratí íkljol avrí, andé zeitinjéskere vešéste ačhél.

³⁸ O naródos‐da but javiné uxtjél, e kangerjáte ta te šunén les.