Lukéstar 20 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ Jek diés, dúi diés, trin diés, ándi kangerí hem e narodós sikljarél, hem o evangélje četínel. Avén paš les o baré rašajá, thai o sikljardé e náiphurederéntsa berabér.

² Phenén léske: Vákjer aménge, savé silása kerés so kerés, ili ko dinjás tut i zor?

³ Ov‐da džewábi del: Me‐da tuméndar kaphučáv váreso, phenén‐ta mánge:

⁴ O bolibé e Ivanóskoro neli e Devléstar ili e manušéndar uló.

⁵ Akaná ol mislínen čoká‐čoká: Te phenás e Devléstar, ov kaphenél aménge: Sóske léske nána pakjániljen?

⁶ Amí te phenás e manušéndar, kárig amén kačhivél baŗá o naródos, sóske tvŭ́rdo pakjén kai o Ivános jek prorókos isí.

⁷ Čoká phenén e Isúske: Kátar ulí i síla léskeri amé nána džanás.

⁸ Vakerél o Ísus: Thai me‐dani, nána kavakeráv tuménge savé silátar keráv so keráv.

⁹ Liljás, phendjás e narodóske adiká paramísi. Siné jek čosámudžas, kerjardjás jekhé rezákeri bar, tsanínel rezengerén, džal‐peske them theméste but vréme.

¹⁰ Ándo vákti jekhé slugás bičhalél, ta t’anél léske katár i res drakhá. Amí o rezéngere e slugás hem marén hem bičhalén bidrakhéngoro.

¹¹ Pále bičhalél o čosámudžas jekhé slugás, pále les marén, aprasán, bidrakhéngoro bičhalén.

¹² Pále averés bičhalél; pále les čhinén, na‐avrí tráden.

¹³ Vakerél o čosámudžas: So te keráv? Me čhavés, me dukhanés kabičhaláv, te dikhén les, móšte ladžán.

¹⁴ Amí o rezéngere, kai ándi res butjarén, e čhavés kána dikhén, hem mislínen, hem xoratínen‐peske: Akavká isí o naslédnikos; anén‐ta te čhinás les, ta t’ovél o naslédstvo amaró.

¹⁵ Lilé, anglál e rezáte les tradindé, thai čhindé. Akaná so kakerél o čosámudžas asalké xizmetkjarénge?

¹⁶ Kaavél, kačhinél len, averénge kadél i rezákeri bar. O rašajá kána šundé, vakerdé: Te nan’ ovél.

¹⁷ Dikhél len adavká, phenél: Ábe so si pišimé: O baŗ kai kárig čhifté les o zidárja, uló o nái‐glavno baŗ ándo agór.

¹⁸ Uprál les savó kaperél, pes kadukhavél, o baŗ‐da uprál kas kaperél, les páram‐párčes kakerél.

¹⁹ O baré rašajá thai o sikljardé odolké orátar kerén, ta t’astarén les, sóske axáljoven, kai ov adiká parimísi kárig len vakerélas.

²⁰ Avén, dikhén, so phenél kánden, bičhalén dženén paš les, ol‐da kerén sar t’ovén lačé pakjané manúš, ta t’astarén les e vakeribnáste, ta te kerén te igalén les anglál e pristavjén thai anglál o Valí.

²¹ Phučén les: Ábe xódza‐ba, džanás kai tu lačés vakerés, thai lačés sikljarés, thai te na trašás e manušéndar, sámo o lačó drom e Devléskoro sikavés.

²² Lačés‐li vergía (páres) te das e kraléske, ili nanái lačés.

²³ Amá o Ísus axáljovel léngoro dúi‐mujalipé, phenél lénge: Sóske iskušínen man?

²⁴ Sikavén‐ta mánge jek lovó: Káskoro isí o óbrazos thai pišimáta? Vakerén léske: E Kraléskoro.

²⁵ Phenél: Čoká te den e Kraléske so isí e Kraléskoro, amí e Devléske so isí e Devléskoro.

²⁶ Ol‐da naští arakhjén hič so te vakerén kárig akavká anglál o naródos. Hem čudínen‐pes, hem taínen (láljon).

²⁷ Akaná alé paš les džené Sadukája, ol kai vakerén kai o Vŭskresénie nanái, izdruvínen léstar:

²⁸ Čoká: Abé xódža‐be, o Músas asál aménge pišindjás: Te merél dekéske o phral, thai te ulí léske jek ŗomní, thai o muló bičhavéngoro isí, trébe te lel o dživdó phral asalké ŗomnjá, ta te del čhavén pe mulé phraléske.

²⁹ Akaná siné éfta phralá. O pŭ́rvo liljás jekhé ŗomnjá, thai muló bičhavéngoro.

³⁰ O ftóro‐da prandendjás lása, ov‐da bičhavéngoro muló.

³¹ Liljás la o tréto. Čoká o éfta‐da, sa mulé, bičhavéngere.

³² Napalál i ŗomní‐da mulí.

³³ Akaná ándo Vŭskresénje, maškár odolké muršén kai isí, káskeri ŗomní k’oovél? Sóske sáoŗe liné la.

³⁴ Vakerél lénge o Ísus: O čhavé adalké dünjaskere prandénen, biáv kerén;

³⁵ Amí ko resél ándo avér dunjáva thai ándo Vŭskresénje (uštjaibé) (uxtjaibé) e muléndar, ov ni kaprandénel ni biáv nána kakerél.

³⁶ Sóske bimeripnáskoro k’oovél, k’oovél jek Devléskoro čhavó, sar ángelos, káto si o čhavó e Vŭskresenjéskoro (e uštjaibnáskoro).

³⁷ Akaná o mulé ka‐uxtjén; ne‐li sikavdjás akavká o Músas, paš o kaštá (o bur) kána sas, kána vikindjás e Gospodés čoká: O Del Ibrahiméskoro, thai o Del Izakéskoro, thai o Del Jakovéskoro.

³⁸ Sóske nána isí o Del e muléngoro, amí isí o Del e Dživdéngoro, kai sáoŗe léske dživén.

³⁹ Isí maškár e sikljardén džené kai léske vakerén: Xódza‐ba: Lačés vakerdján.

⁴⁰ Thai pó‐but nána katrómen, les te phučén.

⁴¹ Amá ov phenél lénge: Sar te phenén: Xrístos isí e Davidéskoro čhavó?

⁴² Thai odovká, o Davídos vakerélas ándo Psalméngoro ketápi: Phendjás o Rai me Rajéske (o Góspodos me Gospodjéske): Te bešés mánge ki désno rik,

⁴³ Dži ka te thováv te düšmanjén sar skémles asál te piŗénge.

⁴⁴ Vikínel les o Davídos: Góspodos. Sar t’ovél léskoro čhavó.

⁴⁵ Šunél o naródos, vakerél‐da o Ísus:

⁴⁶ Te našén e sikljardéndar, kai ol mangén baré šexjéntsa urjavdé te phirén, thai ándo fóros selámja (paravén) mangén, thai ándo nái‐anglalutné skamlédes te bešén, thai nái‐anglé ki xabnáskeri mása kána jek práznikos kerén.

⁴⁷ Ol kai o kherá thai o mangín e phivljéngere xan, amí othé kerén ta te molínen‐pes but e Devléske.

⁴⁸ Lénge pó‐baró k’oovél o nakázos (i džezáva).