Lukéstar 2 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ Amí odolké diesénde dinjás pokázos o Sultáni o Agóstos ta te géndjoven, kití isí naródos ándo them.

² Akaná adavká genipé nái‐anglé kerdjás les Kirínus, ó Váli ándo Valilékji Súria.

³ Sároŗe‐da džan, te géndjoven, séko manúš pe dizjáte.

⁴ O Jusúf‐da geló katár i Galiléa, e dizjátar Nazareth, ándo Džutnipé, ándi dis e Davidéskeri, kai vikínen la Bethlehem, sóske ov siné katár i família Dávid;

⁵ Ta te géndjol, e Mariása jekhethané, pe borjása, kai sas la čhavó ándo peŗ.

⁶ Uló so uló, phérdile o diés othé, kadél čhavés andé dünjás.

⁷ Thai biandjás muršé čhavés, e jektés látar, thai patjardjás les andé patavén, thai thodjás les ándo jemlíki, sóske nanái than ándi gostílnitsa.

⁸ Adalké theméste, turjál i dis, isí ovčárja, kai dikhén pe bakrén ratí.

⁹ Hékje okotár térdjilo mamúi lénde e gospódskoro Rasílnikos, thai thábilo turjál lénde e Devléskoro svétos, thai but daránile o ovčárja.

¹⁰ Phendjás lénge o rasílnikos: Má‐darán, áke anáv tuménge lačé noviná, baró lošanibé e narodóske, saoŗénge.

¹¹ Avdiés o Spasítelos tuménge biandó, Xrístos o Góspod, ándi dis e Davidéskeri.

¹² Áke kadáv tuménge o znákos: Karakhjén jekhé čhavés, andé patavén patjardó isí, thai pašló uprál pe dumés ándo jemlíki.

¹³ Thai andékhora e rasilnikósa berabér íkljon but avér Devléskere džené; ašardé e Devlés thai vakerdé:

¹⁴ Ašaribé e Devléske kai isí ándo vučé thaná, thai t’ovél o míros e manušénge ándi dünjáva, tha lačipé‐dani!

¹⁵ Nakló so nakló, garávdile‐tar o rasílniki, vakerdé o ovčárja‐da, tha xoratínen‐peske: Te džas ándi dis Béthlehem, ta te dikhás so uló othé, so phendjás aménge o Gospod.

¹⁶ Sígo sígo alé, t’araklé, e Mariása e Jusufés e čhavésa berabér, kai pašló sas ándo jemlíki.

¹⁷ Kána dikhlé, xoratindé odolká, so džanénas uprál e čhavés.

¹⁸ Šunindós, sároŗe čudindé‐pes, e ovčarjéngere vakeribnástar.

¹⁹ A María ikerdjás sa pe vogjáte, mislindós.

²⁰ O ovčárja‐da irisájle kheré, thai ašardé e Devlés thai falindé les, sostár dikhlé thai šundé sa, so phendjás lénge o rasílnikos.

²¹ Oxtoné dieséndar, kána trébe t’ovél čhindó o čhavó, vikindé les “Ísus”, o aláv kai dinjás, les o Gabriélos, kána pánda nána khábnjolas i María.

²² Akaná phérdile o diés ta t’ovél šuží i María, ándo Moiséskoro zakónos. Igaldé les ki stólitsa Jerusalím, ta te den les mamúi e Gospodéste.

²³ Sar isí pišimé ándo Gospodéskoro zakónos: Savó murš te perél nái‐anglé pe daiákere mindžátar, t’ovél e Devléskoro sfjáti.

²⁴ Ta te den e Devléske, po zakónos, doné gurgulitsén, ili doné terné gŭlŭbjén.

²⁵ Siné jek dženó Jerusaliméste, o Simeónos, ov‐da pakjanó thai devléskoro manúš sas, thai žarélas, tha nadeínelas‐pes e Devléste, tha t’aavél Israeléste, ov‐da pherdó sas sfjatoné Duxésa.

²⁶ O sfjáti Dúxos‐da phendjás léske, kai ov nanái te dikhél meribé, dži kai te na dikhljás e Xristós, kai kaavél katár o Del.

²⁷ Akaná tradinjás les o Dúxos ándi kangerí. O dad‐da léskoro, e čhavéskoro, thai i dai, igaldé les andré, ta te kerén léske, so trebínel o adéti e zakonóskoro.

²⁸ Ov‐dani liljás les pe angaljáte, thai e Devlés ašardjás, vakerindós:

²⁹ Akaná tu kabičhalés te slugás, ai Gospodéja, lačipnása, sar vakerdján tu.

³⁰ Sostár dikhlé me jakhá to spasénje,

³¹ Kai hazîrladinján saroŗénge katár o naródos,

³² Tha the thábjol jek svétos, tha te sikljaré le gadžénge, ta t’ovél ašaribé e Izrailéskere narodóske.

³³ O dad‐da léskoro, thai i dai léskeri, čudínen‐pes so šunén uprál léste.

³⁴ Thai blagoslovindjás len o Simeónos, thai phendjás ki María, ki dai léskeri: Áke k’oovél adavká čhavó jek helakléki but manušénge ándo Ísrael, thai k’oovél adavká čhavó jek ikaméti but manušénge ándo Ísrael, thai o manúš but kamudarén‐pes uprál léste.

³⁵ Túke‐da kapharavél to vogí jek xaŗó, ta te díkhljovel so si so nanái ándo vogjá e manušéngoro.

³⁶ Siné jek poznaváčka, i Anna, e Phanueléskeri čhai, katár o Asera, but beršéngeri, thai e ŗomésa jekhethané sas katár o čhaipé isí eftá berš.

³⁷ Seksán‐u‐štaré beršéngeri phivlí sas. Sa ašlí e kangerjáte, i diés‐i‐rat služínelas e Devléske ándi mólba bokhalindós.

³⁸ Akaná dinjás andré, ašardjás e Gospodés, thai vakerdjás léstar saŗoŗénge kolá žarénas Jerusaliméste, ta t’aavél o Góspod.

³⁹ Sa kerdé šukár, po Gospodéskoro zakóni, irisájle ándi Galiléa, pe dizjáte Nazareth.

⁴⁰ Bárilo o čhavó, thai zorájlo thai andré léste o lačipé e Devléskoro.

⁴¹ O dad thai i dai séko berš gelé Jerusaliméste, ándo baró práznikos, ándo barjámi.

⁴² Kána o čhavó ašló deš‐u‐doné beršéngoro, gelé n’ opré dži Jerusalím, po adéti, ándo práznikos.

⁴³ Phérdile o diés, irisájle, amá o čho ašló Jerusaliméste, tha nána džanénas o dad léskoro, i dai léskeri.

⁴⁴ Mislínenas: hič te n’ovél ašló paš pe amalénde; gelé kai gelé jek tsálo diés, pále rodindé les maškár e endanjénde thai pe amalénde;

⁴⁵ Amá naští n’araklé les, pále irisájle Jerusaliméste thai ródenas les.

⁴⁶ Pále trin diés rodindé, ándi kangerí araklé, thai ov bešélas maškár e godjaverénde, kándelas lénge, thai phučélas léndar.

⁴⁷ So si manúš čudindé‐pes, kána šundé les, godjavér kai sas, thai čudindé‐pes uprál léskere otgovórja.

⁴⁸ Dikhlé, čudindé. I dai‐da léskeri vakerél léske: Mo čho, sóstar aménge kerdján ačuká? Áke to dad, ti dai, tut ródasas asféntsa.

⁴⁹ Odovká‐da phendjás lénge: Sar rodinján? Ne‐li džanén, trébe te keráv so kamél mo Dad?

⁵⁰ Ol‐da naští axálile, so vakerdjás lénge.

⁵¹ Geló léntsa na telé, ándi Nazareth, thai kándelas lénge. I dai‐da sa ikerélas pe vogjéste.

⁵² O Ísus‐dani bárilo‐tar ándi godí, phúrilo‐tar ándo berš, — lačipé mamúi e Devlés, thai anglál e manušénde.