Lukéstar 19 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ Geló kai geló, restó ándi Dis Jerixónos ándo úlitses džálas.

² Áke avél jek barvaló, o aláv léskoro Zaxéos, ov‐da jek čéribašis isí e gümrükdžidonéngoro.

³ Mangél te dikhél savó isí akavká Ísus, amá katár o but naródos naští dikhél, sóske ov tsíkno isí.

⁴ Togái prástal pó‐anglé, ukljél uprál jek kašt, ta te dikhél les, sostár othár nakjélas o Ísus.

⁵ Amí o Ísus kána resél odolké thanéste, dikhél pe jakhéntsa n’oopré. Hékje okotár e muršés dikhél, léske‐da vakerél: Sígo sígo t’uxljés ta te džav adiés paš tut kheré.

⁶ Uxljél o čéribašis, posreštínel les, lošanindós.

⁷ Dikhél o naródos, mŭrmŭrínel, vakerél: Amí adavká džal, bešél paš e bilačé manušén.

⁸ Amí avél o Zaxéos, vakerél e Gospodéske: Dikhés‐li, Góspodi, katár mo mangín thai me šéxja‐da epkáš e čoŗénge dav, thai xoxavdjóm‐li dékes, dav léske pále štar‐var pó‐but.

⁹ Vakerél léske o Ísus: Adiés lačipé uló adalké kheréske, sóske akavká‐da Ibrahiméskoro čhavó isí.

¹⁰ Sóske aló e Manušéskoro Čhavó, ta te ródel, thai ta te spasínel, so našavdó uló.

¹¹ Šunén les, ov‐da lénge jek paramísi vakerél, sóske paš‐pašé smé ándi Jerusalím, ol‐da mislínen kai kaavél oví akaná o thagaribé e Devléskoro.

¹² Jek baró tsidindjás ándo durutnó them, ta te lel jek thagaripé, pále napálpale ta te erínel pes.

¹³ Vikínel adavká dešén katár pe xizmetkjárja, lénge po deš fúnta del, thai phenél: Te paruvén dži kaí erínav‐man.

¹⁴ Amá o manúš kai pe Dizjáte bešén, nána déxen les (nefréti kerén les), bičhalén palál les rasilnikén, te phenén: Amé adalké muršés nána mangás, ta te tsarstvínel uprál amén.

¹⁵ Uló so uló, irisájlo, amí o thagaribé kána liljás. Togái vikinjarél pe xizmetkjarjén, kai lénge dinjás o lové, ta te džanél, kití páres séko murš e paruibnása liljás.

¹⁶ Aló jek xizmetkjári, phenél: Ábe Góspodi, katár ti fúnta ulé deš fúnta.

¹⁷ Léske phenél o Góspodos: Ái lačés isí, lačés kerdján; ándo xurdó lačó ulján, akaná deš dižjá ka‐ispravínes.

¹⁸ Aló o ftóro, phenél: Góspodi, katár ti fúnta ulé panš fúnta.

¹⁹ Phenél léske: Túke‐da k’oovén panš dizjá.

²⁰ Aló o tréto, phenél: Góspodi, áke isí ti fúnta, ikeráv la jekhé dikléste.

²¹ Tvŭ́rdo manúš kai sinján, tútar darániljom. Sóske mangés te les, so nána thodján, thai te kídes, so nána dinján ándi phuv.

²² Phenél léske: Katár te mos sudínav tut, geró kai sinján. Te džanésas kai sinjóm tvŭ́rdo manúš, thai te kídav so nána dinjóm ándi phuv, thai te lav so nána thodjóm,

²³ Sóstar nána dinján me páres ándi bánka? Čoká, kána aljómas, lixvása‐da aljómas‐bi.

²⁴ Odolkénge‐da kai pašé térdjon čoká vakerél: Léstar i fúnta‐da te len, odolkéske‐da te den, kai si léske o deš fúnta.

²⁵ Phenén léske: Ábe Góspodi, léske isí véče deš.

²⁶ Odovká phenél: Káske si lové, léske pó‐but kadén, káske nanái, léske oví xaŗí kai isí léske kalén.

²⁷ Amí akaná igálen‐ta me düšmanjén, odolkén kai nána mangénas ta t’ováv Góspodos uprál len, thai akaná anglál mánde te čhinén len.

²⁸ Čoká kána phendjás o Ísus, tsidinjás, geló n’oopré kárig Jerusalím.

²⁹ Geló kai geló, restó dži Bethfáge, thai Bethánia, paš‐pašé ki planína, kai vikínen la o zeitinjéskoro veš. Bičhalél pó‐anglé pe amaléndar doné muršén.

³⁰ Lénge‐da vakerél: Džan‐ta ándi dis kai mamúi tuménde isí, den‐ta andré, karakhjén jekhé xeroŗés, uprál les pánda níko nána beštó; les te phuterén, thai t’anén akatká.

³¹ Te vakerén, te phučéna tumén, sóske phuterén les, tumé te vakerén čoká: O Góspodos mangél léskeri slúžba.

³² Gelé kai gelé, e xeroŗés arakhlé, ov‐da térdjol, sar phendjás lénge o Ísus.

³³ Sar e xeroŗés phuterén, phenén o džené léngoro: E xeroŗés sóske phuterén?

³⁴ Ol‐da vakerén: O Góspodos mangél léskeri slúžba.

³⁵ Lilé, igaldé les e Isúske. Lilé, čhifté pe šexjén e xeroŗéske uprál e dumés, bešavén e Isús uprál les.

³⁶ Džal kai džal, ol‐da pe šéxja thai o urjaibé‐da e droméste buxljarén, ta te nakjél uprál len.

³⁷ Džal kai džal, avél e zeitinjéskere vešéske dži ko agór. O naródos e amaléntsa berabér liljás, ašardjás e Devlés baré vikimása, baré butjá kai dikhlé.

³⁸ Ašarén, vakerén: T’ovél ašardó, ov kai avél andé Raiéskere (Gospodjéskere) alavéste, ándo nébos lačipé, ándo vučipé ašaribé.

³⁹ Maškár e rašajénde isí džené, phenén: Abé Baréja, te nakazínes te amalén.

⁴⁰ Phenél: Oví te láljon adalká thai te taínen, pištínenas‐bi o baŗá.

⁴¹ Hem pášjovel, hem i Dis dikhél, lel, rovél dži la.

⁴² Vakerél‐da: Baré te džanésas‐bi ándo vákti, so te lačipnáske ovél, amí akaná tútar garavdó isí.

⁴³ Sóske k’aavél o tsíros, kána turjál túte o düšmánja jek xéndekos kaxranljarén, ta te zagradínen tut, ta t’ ovél túke pharipé agór agoréste.

⁴⁴ Kamarén tut právo ki phuv, baŗ uprál baŗés nána kamukhjén, sóske o tsíros nána džanésas, kána rodinjás tut o Del.

⁴⁵ Ándi kangerí geló, liljás, kamdžiása bičhaldjás na‐avrí e manušén kai andré bikindé thai kindé.

⁴⁶ Phendjás lénge: Pišimé isí: Mo kher, molibnáskoro kher isí, amí tumé katár les jek maribnáskoro kher kerdjén.

⁴⁷ Diés dieséske ándi kangerí sikljarélas. Amí o rašajá thai o baré sikljardé thai o baré maškár o naródos kerén tha the čhinén les.

⁴⁸ Amá hič nan’ arakhlé, so te kerén léske, sóske léske kándel o naródos ta te šunél les.