Lukéstar 17 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ Pe amalénge phenél o Ísus: Mútlak k’oovén sŭbláznja, amí bibáxt odolkéske, kástar ovén.

² Léske pó‐lačés sas‐bi, te thovénas‐bi jek asjavéskoro baŗ léske turjál i men, ta te čhivén les ándo derjáv (denízi), amí te na sŭblaznínel oví jekhés katár adalké čhavén.

³ Dikhén‐ta tumén lačés. Te kerél túke bezexá to phral, ladžáv‐ta les, amí t’oovél pišmáni, prostín‐ta les.

⁴ Jekhé dieséste éfta drom túke besexá te kerél, amí éfta drom‐dani t’irínel‐pes túke, te phenél: pišmáni sinjóm, bašladín‐ta les.

⁵ Phenén o amalá e Gospodjéske: Te barjarés amaró pakjoibé.

⁶ Phenél o Góspodos: Te sas‐bi tuménge pakjoibé sar adavká kotoroŗó xardálos, aští vakerénas‐bi akalké černitsáke (dutjáke): uxtjáv tut, čhif tut othár, dža, thov tut ándo denízi, othé ta te bárjos, — kakerél so tumé mangen.

⁷ Jek slúga kána orínel túke ándi lavádja, ili e guruvén thai e bakrén kána čaravél asál túke, kaphenés‐li léske i butí kána svŭršindjás: Dža‐ta andékhora te bešés?

⁸ Amí kaphenés léske: Mo xabé te gotvínes, thai ti butí pó‐anglé te kerés, me‐dani, dži kai xaljóm, piljóm, mánge te služínes, pále napálpale tu‐da kaxás, kapiés.

⁹ Amí adalké slugáske koovél‐li blagodarimé o Gospodínos sóske odovká, o xizmekjáris, léskoro aláv dúi na kerdjás? Nanái.

¹⁰ Tumé‐dani čoká, tumarí butí kána isponindjén, trébe te phenén: Amé xizmetkjárja bilačé sinjám, sáde saví butí trébe te kerás, kerdjám.

¹¹ Uló so uló, džal o Ísus ándo drom ki Jerusalím. Nakjél‐da maškár o them e Samariténgoro, thai e Galilejéngoro.

¹² Sar del andé jekhé dizjáte, isí deš murs geralé, durál térdjon.

¹³ Akaná baré vikimása vikínen: Góspodi Ísus, prostín‐ta amén.

¹⁴ Ov kána len dikhél, vakerél: Džan‐ta, sikavén tumén e rašajénge. — Gelé kai gelé, hékje okotár e droméste sástjoven.

¹⁵ Amí isí dek dženó maškár len, sar po sastipé dikhél, irínel‐pes, baré vikimása e Devlés ašarél.

¹⁶ Perél pe móste léske ándo piŗé, blagodarínel‐pes. Ov‐da sas jek Samaritános.

¹⁷ Vakerél o Ísus: Ne‐li ulé o deš manúš sasté? Káte si o énja?

¹⁸ Amí nanái t’irínen‐pes, e Devlés ta t’ašarén, sáde adavká jabandžís aló.

¹⁹ Akalkéske‐da phenél: Uxtí, thai dža‐tuke. Sastjardjás tut to pakjoibé.

²⁰ O rašajá kána les phučén: O thagaribé e Devléskoro kána ka‐avél? Vakerél lénge: O thagaribé e Devléskoro kána avél, naští dikhén les.

²¹ Nána kaphenén: Áke athé isí, ili, díta, othé isí. Sóske isí o thagaribé e Devléskoro andré tumén.

²² Pe amalénge phenél: Kaavén o diés kána oví jek diés e Manušéskere Čhavéskoro tumé kamangén te dikhén, amí nána kadikhén.

²³ Kaphenén tuménge: Díta díta, othé, athé isí. Ma džan tumé palál len, ma džan tuménge.

²⁴ I mólnija, ne‐li jekhé agoréstar e nebéskere džal, dži e averé agoréste svetínel? Čoká k’ovél e Manušéskoro Čhavó.

²⁵ Amí pó‐anglé trébe te stradínel but, kačhíftjovel e manušéndar adalké zamanjéskere.

²⁶ Sar uló e Nojáskere zamanjéste, čoká k’ovél ándo zamáni kána e Manušéskoro Čhavó avél.

²⁷ Xalé, pilé, prandendé, dži ko diés kána dinjás o Nójas ándo beró (korábi) thai aló o baró paní, merén sáoŗe andé léste.

²⁸ Andé Lutjéskere zamanjéste‐dani; xalé, pilé, kindé, bikindé, kaštá thovén, kherá kerén.

²⁹ Amí katár o Sódomos kána ikístilo o Lúti, e nebéstar aló sar brišín jek jag na‐telé, saroŗén mardjás.

³⁰ Thai čoká k’oovél, kána e Manušéskoro Čhavó kaavél mamúi e manušén.

³¹ Odiká óra, ko isí uprál e kheréste, o šéxja‐da léskere andré ko kher, (andé kherés) nanái t’uxljél, adalká šéxja ta te lel. Ko isí ándi livádja, ov‐da nanái t’irínel pes.

³² Ma bisterén, ándi godí lačés t’ikerén so uló e Lutjéskere ŗomnjáke.

³³ Savó manúš kerél ta t’ ikerél po džiipé, adavká kanašavél, savó manúš kanašavél, ov‐da ka‐ikerél.

³⁴ Phenáv tuménge: Odiká rat k’oovén dúi jekhé kerevetjéste (sovjardjáte); jek kalínjovel, jek kaačhól.

³⁵ Dúi džuvljá kapišén aró; jek kalínjovel, jek kaačhól. K’oovén dúi murš ándi livádja; jek kalínjovel, jek kaačhól.

³⁶ Phenén léske o amalá: Amí káte k’oovél, Góspodi?

³⁷ Phenél lénge: Káte si o muló trúpos, othé‐da kakíden‐pes o órlja.