Lukéstar 12 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ Kidisájlo o naródos, but šel manúš, paš les, tesnínen‐pes, but kai isí. Ov‐da liljás te vakerél: Nái‐anglé t’arakhjén tumén katár i majá e rašajéngeri, kai isí o dúi‐mujalipé.

² Amí so si učhardó kaphutérdjovel, thai so si garavdó sa kapendžárdjovel.

³ Čoká ándo kaló (ándo tamló) so vakjerén, ándo parnó (ándo svétos) kašúndjol; so vakerén e kanénde ándi odája, uprál o kherá ka‐izvakerén.

⁴ Phenáv tuménge, me parnavénge (me amalénge), má‐darán odolkéndar, kai e trupós čhinén, amá pále pánda naští kerén hič.

⁵ Amí kasikaváv tuménge, kástar te trašán. T’ovél tumén okolkéstar traš, ov kai hem aští čhinél, hem pále ándo bengipé tumén čhivél. Va, odolkéstar t’ovél tumén traš.

⁶ Nanái‐ii biknén panšé vrabčjén doné lovéntsa? Amí ni jekhés nána bistrél o Del.

⁷ O balá‐dani te šeréste, sa géndjon, čoká ma trašán: but vrabčjéndar pó‐lačé sinjén.

⁸ Amí tumén phenáv: Ko man pendžarél anglál e manušén, odolkés kapendžarél e Manušéskoro Čhavó anglál e Devléskere angelén.

⁹ Amá ko man nána kapendžarél anglál e manušén, odolkés nána kapendžarél o Del anglál e Devléskere angelén.

¹⁰ Amí ko vakerél kárig e Manušéskere Čhavés, aští prostíndjovel léske, amí ko e Sfjatoné Duxés akušél, odolkéske naští prostíndjovel.

¹¹ Tumén ándi kangerí kána igálen, thai anglál e pristavjénde thai anglál e gradinačalnikénde, ma‐xan xolí so kavakerén, savó džewábi kadén.

¹² Sóske kasikavél tumén o Sfjáti Dúxos andékhora, so te phenén.

¹³ Phenél léske jek murš: Ábe Baréja, phen‐ta me phraléske, ta te ulavél mántsa savé lové, thai šéxja kai amaré dadéstar alé léske.

¹⁴ Phenél léske: Múrša‐ba, ko kerdjás man súdnikos ta te ulaváv asál túke?

¹⁵ Amí phenél e averénge: Dikhén‐ta: t’arakhjén tumén katár i žádnost, sostár níko nána dživél (traisarél) katár o barvalipé.

¹⁶ Vakerél, phenél lénge jek paramísi: Siné jek barvaló manúš, isí‐da léske jek livádja barvalí,

¹⁷ Kórkoŗo mislínel, phenél: So te keráv? Nanái mánge káte kídav o plódos.

¹⁸ Phenél: Akavká te keráv: Kaphagáv mo távanos, jek pó‐baró te keráv, othé so uló mánge me barvalipnása berabér sa kakídav.

¹⁹ Me duxéske kaphenáv: Duxéja‐mo, but mangín but beršénge isí túke, ma‐ker butí akaná, te xas, te piés, te lošánes.

²⁰ Amí phenél léske o Del: Levavdó kai sinján, adiká rat kalél tútar to vogí o Del, thai so kidinján káske k’oovél?

²¹ Čoká ovél kána dek dženó kídel‐peske mangín, amí katár o Del nanái barvaló.

²² Amá phenáv tuménge: Ma‐xan xolí asál tumaré džiipnáske, so kaxán, ni asál e trupóske, so ka‐urjavén.

²³ E xabnástar pó‐lačó isí o džiipé, e urjaibnástar pó‐lačó isí o trúpos.

²⁴ Dikhén‐ta e kargjén (garvanjén), nána čhivén o giv, nána kíden, nanái lénge ambári, távanos nanái, amí parvarél len o Del. Amí tumé e garvanjéndar kití var pó‐lačé sinjén?

²⁵ Ko aští kerél ta t’ovél jek kuní‐da pó‐vučó, mislindós naští kerél.

²⁶ Amí xaŗí xaŗí te naští kerés, so xas xolí ta te kerés so pó‐baró, thai pharó‐da isí?

²⁷ Dikhén‐ta e krinjén, (zambákja, luludjá) sar ovén thai bárjon; nána butjarén, nána motínen (nána khuvén). Amí phenáv tuménge: O Súliman (Sólomon), baró thai ašavdó kai sas, nána urjavdó sas sar asalké luludjáte.

²⁸ I čar‐da, avdiés kai bárjola ándi livádja, thai tasjá andé furnjá kačhívdjola, la‐da urjavél o Del, sar te na urjavél tumén, ábe bipakjanálen.

²⁹ Adžuká tumé‐da nanái te phučén: So‐li kaxás, so‐li kapiás; má‐uvén baribnása.

³⁰ Čoká kerén o gadžé, odovká‐da sa róden. Amí lačés džanél o Dad tumaró, kai mangén asalká.

³¹ Amí nái‐anglé te róden, ta t’arakhjén o thagaripé e Devléskoro, thai pósle sa adavká kadéndjovel tuménge.

³² Má‐darán, tsíkni tŭ́lpa, sostár mangél tumaró Dad te del tumén jek thagaripé.

³³ Bikinén‐ta so si tuménge, den‐ta e čoŗénge páres. Kerén‐ta tuménge gonén kai nána phúrjon thai mangín ándo nébos kai nána našáldjovel, káte nána avén o čorá, káte nána izxáljol džuvénde.

³⁴ Káte si to mangín, othé‐da k’oovél to vogí.

³⁵ Patjarkjarén‐ta tumaré xerá, šéxja, tharénta o fenérja, ándo vastá‐da t’ikerén.

³⁶ T’ovén sar džené kai žarén dži kai avél e biavéstar o Džamutró, ta te phuterén léske andékhora o vudár, kána čalavél.

³⁷ Baxtalé odolká xizmetkjárja, kai len arakhjél o Góspodos ándo žaribé (ándo nebéti). Čačés phenáv tuménge, mamúi kaavél, kabešavél len, maŗó ta te xan, nakindós kaslužínel len.

³⁸ T’aavél‐da ándo dúito nebéti, ili t’aavél ándo tréto nebéti thai t’arakhjél len čoká, baxtalé t’ovén odolká xizmetkjárja.

³⁹ Amí te džanén: E kheréskoro šeró te džanélas‐bi kití saxáti k’aavél o čor, ne‐li kakerél nebéti, nána kamukjél e čorén, ta te phagjén thai andré te den?

⁴⁰ Tumé‐da čoká gotóvo t’ovén, sostár k’aavél e Manušéskoro Čhavó, kití saxáti nána džanés, odovká saxáti kaavél.

⁴¹ Phenél léske o Pétres: Góspodi, vakerés‐li aménge adavká, ili saoŗénge‐da?

⁴² Phenél: Ko isí o vérno thai o godiavér xizmetdžís, thovél les o Góspodos uprál pe familiáte, ta te del lénge maŗó te xan kána trebínel.

⁴³ Baxtaló odovká slúga, kai les čoká k’arakhjél o Góspodos kána avél.

⁴⁴ Čačés phenáv tuménge: Kalél, kathovél les načálnikos uprál saoŗengerénde.

⁴⁵ Amí te phenél odovká slúga pe godjáte: Nána avél o Góspodos, lel, mudarél e xizmetkjarjén thai e sluginjén, xal piél, mató ovél,

⁴⁶ Andékhora kaavél adalké slugáskoro Góspodos ándo bidžanló vréme, kalél les, kadél les nagráda maškár e bipakjanénde.

⁴⁷ Odovká slúga kai džanélas so mangélas o Góspodos, amí nána hazîrladínel, so mangél nána kerél, odovká but dabá kaxál.

⁴⁸ Amí te na džanélas‐bi, xaŗí dabá kadikhél. Káske but dénjovel, léstar but ka‐izmángljovel. Káske diné but, pó‐but kamangén léstar.

⁴⁹ Áke aljóm, jag te bičhaláv e dünjáske, ne‐li mangáv ta te thábjol?

⁵⁰ Trébe te bóldjovav pó‐anglé jekhé bolipnása; amí trašáv dži kai na isponíndjovel.

⁵¹ Mislínen tumé kai aljóm ta te dav lačipé thai míros e dünjáske? Phenáv tuménge: Nanái! Amí te dav maribé e dünjáske.

⁵² Sostár akaná jekhé kheréste nána k’ovén lačés panš džené jekhethané. Amí k’oovén o trin kárig e donénde, o dúi‐da kárig e trinénde.

⁵³ O dad kárig e čhavéste, o čhavó kárig e dadéste, i dai kárig e čhaiáte, i čhai kárig e daiáte, i sasúj kárig lákere čhavéskere ŗomnjáte, adiká‐da kárig láte.

⁵⁴ Phenél‐da e narodóske: Jek balúti kána dikhés andé nebéskere rigáte, káte uxtjél o kham, džanés, phenés: Kaperél o brišín. Thai perél.

⁵⁵ I balvál kána dikhés kai phúdel katár o júgos, džanés k’oovél tatipé. Thai ovél.

⁵⁶ Litsemértsos, so si so nanái e dünjáskere nebóste sa axáljoves, amí adavká zamáni nan’ axáljoves?

⁵⁷ Amí kórkoŗo, so lačó si, sóstar nána džanés te sudínes?

⁵⁸ E düšmanjésa berabér kána džas mamúi e thagarés, ker‐ta lésa jek kundráti, ta te na igalél tut anglál e hakemjéste, ov‐da bičhalél tut e pristavjéste, ov‐da bičhalél tut e zandanjáte.

⁵⁹ Phenáv túke: Athár nána k’ íkljos dži ka te platínes e lovéndar o nái‐tsikno kotór.