Lukéstar 11 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ Uló so uló molínelas‐pes jekhé thané, kerdí i mólba, jek amál phučél: Góspodi, sikljár‐ta amén, ta te molínas amén, sar sikljardjás pe amalén o Ivános‐da

² Phenél o Ísus: Kána molínen tumén, vakerén‐ta: Dáda‐be amaró, kai sinján tu ándo nébos, t’ovél sfjáto to aláv, t’ovél to thagaripé. T’ovél to kamibé hem ándo nébos hem ándi phuv.

³ De‐ta aménge séko diés amaró maŗó.

⁴ Prostín‐ta aménge amaré bezexá, sostár amé‐da prostínas saoŗénge, kai isí aménge dlŭžniki. Ma igál amén ándo iskušenipé, amí t’ikerés amén e džungalibnástar.

⁵ Thai phendjás lénge: Katár tuménde káske si jek amál, džal maškár i rat, phenél léske: De‐ta mánge, Sínko, trin maŗó;

⁶ Sóske aló mánge jek amál, e droméstar avél, nanái mánge so te xaljaráv les.

⁷ Ko isí andré vakerél: Butí ma‐de mánge, phanló isí o vudár, o čhavé miŗé ándo kéreveti isí, naští uxtjáv te dav túke.

⁸ Amí te čalavél kai čalavél o vudár, phenáv tuménge, sóske isí jek amál léskoro nanái ka‐uxtjél, amá sóske sîkîldínel, ka‐uxtjél, kití mangél odovká, les kadél.

⁹ Tuménge phenáv me‐da: Phučén‐ta, kadén tumén, róden‐ta, kaarakhjén, čalavén‐ta, kaphuterén tuménge.

¹⁰ Sóske ko phučél, léske kadén, (odovká polučínel), ko ródel, arakhjél, ko čalavél, léske kaphuterén.

¹¹ Te mangés maŗó te dadéstar, kadél‐li túke jek baŗ? Ili te mangés jekhé mačhés, sapés‐li kadél.

¹² Ili te mangés jek aŗó, jek karavdiní kadél‐li?

¹³ Tumé‐da, bilačé kai sinjén, te džanén, tumaré čhavénge armagánja te den, tumaró Dad ne‐li kabičhalél e Sfjatoné Duxós dáha evvél katár o nébos, odolkénge kai les mangén?

¹⁴ Jekhé dženéstar trádelas o Ísus jekhé bengés, odovká‐da laloŗó sas. Avrjál kána aló, o laloŗó liljás te vakerél, čudínel‐pes o naródos.

¹⁵ Amí isí džené, phenén: Čhivél e bengén, amí sar čhivél? Ne‐li avél léske zor katár o Belzevúlos, o thagár e bengéngoro?

¹⁶ Isí avér džené mangén léstar katár o nébos jek znákos.

¹⁷ Amá ov dikhél so si lénge ándi godí, phenél: Jek thagaripé kána isí les dúi thagár heláki ovél, jek kher kerdó kai isí uprál averé kherés, kaperél.

¹⁸ E Bengéske‐da kána kárig les uxtjél o Bengk, sar‐li k’oovél o thagaripé léskoro? Sostár tumé phenén e Belzevulóskere silátar bengén čhiváv.

¹⁹ Amí te čhiváv bengén e Belzevuléskere zorása, káskere zorása kerén čoká tumaré čhavé? Ol te sudínen tumén.

²⁰ Amá te čhiváv bengén e Devléskere anguštésa, thai e silása, hič te n’ovél aló tuménge o thagaripé e Devléskoro.

²¹ Jek zoraló manúš xaŗésa, kîlîčjása arakhjél po dvóros, lačipnása‐da ačhón so si so nanái léske.

²² Amí ta t’aavél léstar pó‐zoraló jek manúš, kačhinél les, so si so nanái, e xaŗésa, e čhurjása berabér sa kalél, averénge kadél odolká šéxja kai sas léske, e čhindé manušéske, edekí pakjoibé ándi zor léngeri.

²³ Ko nanái mántsa, odovká kárig mánde isí; thai ko mántsa nána kídel, odovká ándi balvál čhivél.

²⁴ O bišužó bengk kána íkljol katár o manúš, andé šuké thanéste sa phirél‐pes, ráhati rodindós. Amí ráhati nan’ arakhjél, phenél: Te džav‐mánge andé kheréste, kai íkljomas léstar.

²⁵ Avél, arakhjél les šulavdó, o kher šukár.

²⁶ Togái džal, avér eftén, léstar pó‐džungalé, bengén igálel, den andré, bešén. — Odolké manušéskoro háli, kití džungaló pó‐anglé sas, akaná duvár pó‐džungaló ovél.

²⁷ Phendjás; amí jek džuvlí isí maškár o naródos, vikínel, phenél: Baxtaló isí o peŗ, kai biandjás tut, thai i čučí, thud kai dinjás tut.

²⁸ Amí odovká phenél: Pó‐lačés te phenés: baxtalé odolká kai šunén o aláv e Devléskoro, thai kánden.

²⁹ Kidisájle o naródos, o Ísus liljás te phenél: Adalké zamaniéskere manúš górke isí, jek znákos mangén, nána kapolučínen, k’oovél lénge sámo o znákos e prorokéskoro, e Jonáskoro.

³⁰ Sar‐če o Jónas jek znákos uló ko Ninevitídes, čoká k’oovél e Manušéskoro Čhavó ko manúš adalké zamaniéskere.

³¹ Lénge ka‐uxtjél i júžna králitsa, len kasudínel, ka‐osudínel‐dani, sostár ói alí e dünjáskoro andár o agór, e Solomonéskoro godiaveripé te šunél, amí athé Solomonéstar jek pó‐baró isí.

³² O Ninevitídes‐da ka‐uxtjén, len kasudínen, ka‐osudínen‐dani, sostár e Jonáskere propovedjéstar pišmáni ulé, amí athé Jonástar jek pó‐baró isí.

³³ Níko nána tharél e momeljá, thai pósle thovél la ándo garavdanó than, ili telál jek kutíja, amí thovél la uprál jek svéčnikos, ta te dikhén o svétos odolká kai avén.

³⁴ E trupóskoro svétos isí o jakhá. Sastó‐li isí to jak, čoká to trúpos‐da sa k’ovél ándo parnó, amí t’ovél bisastó to jak, o trúpos‐dani ándo kaló ka‐ačhól.

³⁵ Amí lačés te dikhés, o svétos kai túke andré isí, nanái‐li kalipé.

³⁶ Amí te isí o tsálo trúpos svétlo, te nanái baré jek kotór kaló andé léste, ka‐ačhól čoká sa ándo parnó, kasvetínel túke sar momelí.

³⁷ Vakerélas. Áke vikínel les jek rašái, maŗó ta te xal lésa jekhethané, mangél les. Ov‐da del andré o kher, bešél lésa, ta te xal.

³⁸ Dikhél o rašái, čudínel‐pes, sostár nána thovél‐pes o Ísus dži kai xal.

³⁹ Phenél lénge o Góspodos: Tumé rašajá, e khoréskoro agór, thai e čaréskoro agór, sa kosén, amí tuménge andré sa isí čoribé, sa bengipé isí.

⁴⁰ Ái tumé levavdé, ko kerdjás so andré isí, ne‐li kerdjás so avrjál isí‐dani?

⁴¹ Odolkéstar so si tuménge, e čoŗénge‐da te den, thai k’oovél tuménge sa šužó.

⁴² Bibáxt tuménge, rašajénge, sostár kerén ta thovén ondalékji uprál i mjátva, thai uprál o sedéfče thai upral sékakva drabá, thai nána dikhén o sudibé, thai o dexibé e Devléskoro. Sóske hem odovká, hem akavká trebínel te kerén.

⁴³ Bibáxt tuménge sostár mangén o nái‐šukár skémles ándi kangerí, thai te den tuménge selámi ándo fóros.

⁴⁴ Bibáxt tuménge, sikljardé, rašajá Farizéi, litsemértsi, sóske sinjén sar jek garavdó mímoras, nána díkhljovel, džan, nána džanén kai uprál les phirén.

⁴⁵ Jek zakónnikos vakerél léske: Ábe Baréja, adalká kána vakerés ne‐li amén‐da ladžavés?

⁴⁶ Phenél: Tuménge‐dáni, e zakonnikénge, bibáxt k’oovél, sostár ladavén e manušén továrja kai naští vŭ́zden, amí odolké tovarjén tumé e anguštjása‐da (e najésa) nána dokačínen.

⁴⁷ Bibáxt tuménge, kai kerén gróbnitsi e prorokénge. Odolkén mudardé tumaré dadá.

⁴⁸ Čačés tumé tumaré dadéngere butjénge lačés phenén, ol‐da len mudardé, amí tumé lénge mimorén kerén.

⁴⁹ Adavká isí o sebébi sóske čoká vakerél o godiaveribé e Devléskoro: Prorokén kabičhaláv lénge, thai rasilnikén, amí maškár len isí džené kai len kačhinén, kačhingjarén.

⁵⁰ Ta t’ovén mesúli akalké zamanjéskere manúš e ratéstar kai čhórdilo e prorokéndar, saoŗengeréndar, katár o načálos e dünjáskoro.

⁵¹ Katár o rat Aviléskoro, dži ko rat Zaxariáskoro kai mudardó sas maškár e oltarjáte thai e kangerjáte. Va, phenáv tuménge, sa adavká kaizmangél o Del katár odovká ródos.

⁵² Bibáxt tuménge, zakonnikénge, sostár liljén i klidí e džanibnáskeri. Hem tumé nána geljén andré, hem odolkén, kai kerénas andré ta te džan, nána mukljén.

⁵³ Phenélas čoká. O rašajá‐da lilé te kerén ta te zorljarén les vakeribnása, thai sa phučén les, tha but léstar manglé džewábja.

⁵⁴ Sa dikhén palál léste, amí čoká dikhén ta te šunén váreso léskere móstar, pále t’arakhjén doš andé léste.