Lukéstar 10 - E devléskoro sfjato lil e Ísus-Xristóskoro džiipé thai meribé e sfjatoné Lukéstar 1912 (Arlija Balka

¹ Uló so uló, naznačínel o Góspodos pánda eftávardeš, thai doné amalén, bičhalél anglál pes sjakoné dizjáte, sjakoné thanéste, káte mangél ov‐da te džal.

² Phenél lénge: I žétva barí isí, amí o žetvárja xaŗí. Molínen‐pes tumé, ta te bičhalél e žetvákoro Góspodos, ta t’aavén pe žetváte.

³ Džan‐ta, bičhaláv tumén sar bakrén ándo ruvá.

⁴ Má‐anén kisí, džéba mí‐anén, tjiraxá má‐anén, thai te na poklonínen níkaske andé droméste.

⁵ Andé jekhé kheréste kána den andré, phenén‐ta: Adalké kheréste selámi t’oovél.

⁶ Amí te isí e selamjákoro čhavó othé, to selámi kaačhól uprál les, amí te nanái othé, ka irínel paš tuménde.

⁷ Áčhon‐ta othé kheré, thai so si lénge xan‐ta, pién‐ta, sóske o butjákoro, léske‐da t’oovél e kirjákere páres. Ma‐džan kher kheréste.

⁸ Jekhé dizjáte kána den andré, thai tumén posreštínen, so den tuménge, te xan‐da;

⁹ E nasfalén‐da kai andré isí te sastjarén, lénge‐da te phenén: Tuménge aló o thagaribé e Devléskoro.

¹⁰ Amá jekhé dizjáte kána den andré thai o komšídes nána posreštínen tumén, džan‐ta andár o úlitzes thai te vikínen:

¹¹ Tumaré Dizjákeri pošík‐da kai lepínel, amaré urjaibnástar kosás; amí te džanén, avél o thagaripé e Devléskoro.

¹² Tuménge phenáv‐dani: Odolké dieséste e dizjáke Sodómos o háli lákoro, adalké dizjákere haléstar pó‐lačo k’oovél.

¹³ Čingár thai bibáxt túke, Korazáin, túke‐da bibáxt Bethsáida, sóske ándo Tíros, t’ándo Sidónos áko edekí barí butí ulí, pišmáni ulé sas‐bi, ándo than urjavdé t’ándo práhos.

¹⁴ Amí tuméndar pó‐lačes k’oovél e Sidonóske, thai e Tiróske kana ovén sudimé.

¹⁵ Tu‐da, ái Kafernáum, kai sinján edekí baró, dži ándo nébos to baribé, dži ándo thagaribé e bengéskoro kaperés.

¹⁶ Ko tumén šunél, man‐da šúnel thai kándel. Ko tumén aprasál, man‐da aprasál, ko man aprasál, odolkés‐da kai man bičhaldjás, aprasál.

¹⁷ Irínen‐pes o eftávardeš thai dúi manúš, lošánen, phenén: Góspodi! O bengá‐da ándo aláv toŗó amén kánden.

¹⁸ Phenél lénge: Sar o jîldîrîmi dikhljóm e bengés, e nebéstar perindós.

¹⁹ Áke dinjóm tumén zor, ta te phirén uprál e sapén, thai uprál e skorpionén, thai uprál e düšmanjéskeri síla; naští kerél tumén ziáni čípota.

²⁰ Má‐lošánen, kai tuménde kánden o bengá, amí te lošánen kai ándo nébos isí pišimé tumaré alavá.

²¹ Odiká óra lošánilo (lošasájlo) ándo Sfjáto Dúxos, phendjás: Ábe Bába, blagodarínav‐man túke, Góspodi (Rája) e nebóskoro thai e dünjáskoro, sóske e godiaveréndar adalká garadján, e tsiknénge sikadján. Va, Bába‐be, sostár adžuká manglján.

²² Sa adalká e Dadéstar mánge ulé, thai ko si o čhavó níko na džanél, sámo o Dad džanél, ko si o Dad sámo o Čhavó džanél, thai odovká‐da, káske kasikavél les o Čhavó.

²³ Irínel‐pes pe amalénge, phenél: Blagoslovimé thai baxtalé o jakhá kai dikhén so dikhén tumé.

²⁴ Sostár tuménge phenáv: But proróki thai but thagará mangénas te dikhén so tumé dikhén, amá nána dikhénas, thai mangénas te šunén so tumé šunén, amí nána šunénas.

²⁵ Áke uxtjél jek zakónnikos, iskušínel les, phenél: Ábe Učítel, so te keráv, ta t’oovél mánge o džiipé o biagoréskoro?

²⁶ Phenél léske odovká: Ándo zakónos so pišínen, sar četínes?

²⁷ Džewábi del adavká: Te dukhás te Devléske, (e Raiéske) sa vogjésa, sa dušása, sa silása, sa godjása, thai te dukhás te komšúske sar túkedani.

²⁸ Phenél: Lačés vakerdján: Čoká ker, ta t’ovés dživdó.

²⁹ Amí ov mangél te kerél pes čačó e vakeribnáste, e Isúske phenél: Mo komšís ko isí?

³⁰ Vakerél o Ísus: Siné kai siné jek manúš, geló Jerusaliméstar Jerixóste, perén čorá palál léste, nangjarén les, čhinén les, ačhavén les epkáš muló, džan‐peske.

³¹ Siné‐da jek rašái, džal adalké droméstar, dikhél les, e epkáš mulés, džal‐peske, nakjél.

³² Čoká jek diákonos, kána paš pašé isí adalké thanéste, dikhél les, ov‐da nakjél.

³³ Amí siné jek Samaritános, e džabnáste kai isí, avél paš les, dikhél les, merhaméti isí les dži léste;

³⁴ Paš les avél, phándel o dabá, andé lénde mol thai zeitíni čhórdel, uprál pe grastés thovél les, ándi kŭrčma igálel les, dikhél les.

³⁵ Tasjá ikálel dúi kotór lové del ko kŭrčmáris, phenél: Dikh‐ta les. Savé lovén pó‐but kaplatínes asál léske, me, phenél o Samaritános, kána irínav man, kadáv tut napálpale.

³⁶ Odolké trinéndar savó, mislínes, uló léske, e epkaš čhindéske nái‐lačó?

³⁷ Phenél: Odovká, kai sas les merhaméti dži léste. Phenél o Ísus: Dža‐ta, ker‐ta čoká.

³⁸ Nakló so nakló, avén jekhé dizjáte. Thai jek džuvlí, i Márta, posreštínel les pe kheréste.

³⁹ Isí‐da la jek phen, i María, ói‐da sa bešél ándo piŗé e Isúskoro, pe vakeribnáste šunél.

⁴⁰ Amí i Márta butjarní si thai vrénno, térdjol paš les, phenél: Góspodi, nána dikhés‐li me phenjá, ói kai mukél man, kórkoŗi te butjaráv? Phen‐ta láke ta te pomožínel man.

⁴¹ Phenél o Ísus: Martoŗíje Martíje, but des tut godí, thai butjarní sinján,

⁴² Amí sámo jek trébe te kerés. I María ándi butí o pó‐lačó kotór liljás, nána kalínjovel látar.