Taatu Rutjiniji Pohuatasano 4 - Arabela

Booz camishacari Rut

¹ Na nuhuaji cuno tenacarijia, Boozri tiaca tohuateyaji quiaquiaari. Tii cajishiiri. Jiyacari quijiaca cuno pueyani, nojori jaara casaa sequenu paniquiaari puetunu pueya niishishocoriquianojanaa, nojoriiri tiaca tohuateyaji jiitiquiaari rerejonu, tii pocoojonura. Naa tii Booz cajishacaritij, jiyacari namitia tiuquiriquiaari Noemii shaajasano camajanaa. Boozri jiyacari naa na piirii: —Miji, niya quia cajishiijia. Niya cua tojishii. Noemii camaari nocua canujumaa. Cajishiiri.

² Jiyacaritij, Boozri tiacajinijinio diez jiyaniijianucua piiriijuhuaj. Nojori sequereeri cuaara cajitiuuria, nojori pocoojosanojiniji cuno pojori tojiniuriajuhuaj.

³ Na masu cajitiushacari, Boozri jiyacari naa coteeree Noemii cama sequenutej: —Cua tojiri. Quia cunatu Noemiini, quiari naataja tiuquiriohuacuaa Moab jiyajinijini, nojuajaari na noquiyaraja cuhuariquia niquitionu paniya na cumaneecara. Quiaari na shaajasano camajanaa cutara. Janiyari na cunanijia. Na camajanaa quia quiniuucua, quia jaara na masenu paniri, quia maserenoj.

⁴ Socua cua tojiri. Maninia quia niishiri cutara nio. Quiaa jaara masenutaniya cuno cuhuariquia, quiarijiaja quia masere nio pueya niquiaraja, niya quiniaa tiaca jiyaniijianuvua niquiaranio. Naa quia miiritij, shaajeno Elimeelec camajanaa quia quiniuucua. Quiaari seetanujuanaa na cuhuariquia maseriquianocuaja, na camajanaa quia quiniuucua. Saniniuujia, quiaa jaara na maseyaquiri, quiarijia cua tore. Quiaa jaara na maseyaquiri, quia niti saniniuujia janiyari cuno jiya maseriquianoni. Noemii shaajasano camaari naa Booz riucuareequij: —Jaa, na masenutaniyanijia.

⁵ Jiyacaritij, Boozri maatia na sequeree: —Maninia cua tojiri. Quiaa jaara Noemii cuhuariquia masere quiara, quiocua neyanu mashiquio Rut camirijuhuaj. Cuno niyacoori Moab jiyajinijinio taatucuaja. Quiaa jaara naa miiritij, na shaajasano neyacaari maja na niyajetasaanu quiniutianiya na cuhuariquia cojuasaanuucua juhua na camaru quishacarijia.

⁶ Noemii shaajasano cama tojishacari naa Booz sequesanotej, nojuajaari jiyacari naa sequeree Booztej: —Jaara naa quiritij, maja cua masenu quiniutianiya cuno cuhuariquia, janiya mariqui quiquiohuarano cua jiitiasano cua cuhuariquiaca cushitioreni. Naacuatej, nojuajaari naa Booz sequereequij: —Maja cua masenu quiniutianiyaquinioj. Janiyajanaacuajaari quiarijia quia sequeyani, quia masere cutaranoj.

⁷ Jiyacaritij, Israel jiyajinia quijiacaari tamaatia miiniu niishijiaca quijia. Nojoriiri naa miijiacatej; catecaji na jiyano jaara masenu paniyaquiquiaari noquiyara casaa mashiquiojiniji, tamasaca na jiyopueeri na maseja cutara. Jaara naa miiritij, na maseyaquiriquianoori na sapatu taco jocuaja. Noquiyara maseriquiano na niquitioriiri. Naa miitiujiacajaariuhuaj, pueyano jaara casaa niquitioree tamonu pueyano, puetunu pueyajanaa niishiniuria sapatu niquitiosanoori seetanujuanaa cuno casaa camaru quiniutianiya.

⁸ Naa miiniu niishijiaca nojori quiniuucuatej, Noemii shaajasano camaari jiyacari na sapatu taco jocuaree. Booz na niquitioreeri. Jiyacari naa na sequereeri: —Janiyajanaacuaja quia panitiaa mashiquio Noemii cuhuariquia masenuni.

⁹ Naacuatej, Boozri jiyacari naa sequeree tii nojori tojitiaano tiacajinijinio jiyaniijianucua, puetunu tii quiniaa pueyajanaanio. Naa nojori sequereeri: —Cuarta pueyanaa puetunu niajaniyacuajaari quiarijia nishiya, janiyari Noemiijiniji maseya na cuhuariquiani. Cuno cuhuariquiaari na shaajasano neyaca Elimeelec cuhuariquia quijia, shaajecono necohua Quilioon, Mahloon cuhuariquia quijiajaariuhuaj.

¹⁰ Quiarijianij, puetunu niajaniyajanaari niishiyajuhuaj, janiyari Moab jiyajinijinio taatu Rut riniutianiya cua niquiorani, neyaca shaajeno niti cua mueratenura mueya, cuhuariquia camaru quiriquiano. Cuno cuhuariquia cua masenuucua, Mahloon mashiquio cua caminiuucuajuhuaj, Mahloon sesaari niyajeyaquiriquiano. Na tiacajinijinio pueyari Mahloon niyajetaaquiriquianojuhuaj. Quiarijiani pueyanaa, puetunu niajaniyajanaari nio canaa miishanojiniji niishiya.

¹¹ Jiyacaritij, cuno Beleen tiacajinijinio jiyaniijianucua, tii quiniaa narta pueyajuhuaj, puetunu nojorijianaari naa mariyataa sequetureequij: —Taaquiriirinij, naacuaaquiniatejaj. Pa Pueyaso cuaara maninia miiria cuno maaji, quiaa na riyani. Nojuaja cuaara quiiria quiara juhua pa supuetana Raquelja, juhua Liianio. Puetunu pajaniyajanaanij, paari cuno caapiqui maajipohuacuajinio caneno pueyani. Quiajaniya saniniuujia, Booznaa, canaari quia panitiaacujua parta pueya tojishano pueyano quia quiniuria niya pa Beleen tiacajiniani, Efrata tiacatuhua.

¹² Pa Jiyaniijia Pueyaso cuaara queraatia quia muetuteera cuno maajiicua. Quia niquiohua cuaara quiiria jiyanohua queraraqui, naatej, taa pa supuetana Judaa niyanu Fares muetuquiaari queraatiacuaani. Pueya nucuaari Tamar quijia.

¹³ Boozri naa camiquiaari Ruttej. Na canuquiaariiri. Pueyasoori Rut panitiaquiaari na manajenura. Manajequiaariiri. Cayaniyojua rareeri.

¹⁴ Naacuatej, narta maajipohuari naa sequetujua Noemiitij: —Pa Pueyaso pa timitiare. Nojuacuajaari quia jiyateree jinianuraca quia quiniuria quiarijia. Nojuajaari quia cojuariquiano quia jiyanishishacari. Seetanujuanaa supuetana Israelcuajinio caneno pueya tojishano pueyanora jiyateriquia puera quia jinianunij.

¹⁵ Nojuajaari quioojia cajitiriquiano, quia motajashishacari quia cojuariquianojaariuhuaj. Nojuajaari jiyanohua quia panijia quia niyanu mashiquio muetusano quiara. Quiaa jaara siete niquiohuaraca quiriquia, najaa, quia niyanu mashiquioori jiyanohua socua maninia quiara.

¹⁶ Jiyanohua na timiniutia Noemiiri mueya pasee. Na catucumara na niareeri. Na canashitishocoriquiano na paquiaariiri.

¹⁷ Naa Noemii canashitiniuucua mueyatej, na shuriucua quiniaa narta maajipohuari naacua sequetujua Noemiitij: —Noemiiqui cayaniyojua rarucuaa. Maajipohuari naacua mueya jiyaniquitiuriiquij Obed. Nojuajaari Isaii quecuaja, supuetana David jiyasojuhuaj.

Camarnurano David supuetanaa sesaca

¹⁸ Puetunu nio pojorijianaari supuetana niquiohua Farescuajinio caneno pueya: Faresri Hezroon que quijia.

¹⁹ Hezroonri Ram que quijia. Ramri Aminadab que.

²⁰ Aminadabri Nahasoon que, Nahasoonri Salmoon que.

²¹ Quiarijia saniniuujia Salmoonri Booz que. Boozri Obed que.

²² Obedri Jesee que. Jeseeri supuetana David queja.