Taatu Rutjiniji Pohuatasano 3 - Arabela

Booz jiyanooshacari Rutcua

¹ Tamonu juuca Noemiiri Rut sequeree: —Janiya quiara pajenutaniya quia niyacaranoni, juhuajaniya shuquiriaatia quia quiniuria.

² Quiarijia maninia cua tojiri. Pa jiyano Boozni, quiaacuajaari quiarta maajipohua na seyata poonijiorucuaani, nojuajaari quirijia niucua na cuhuariquiajinia quianutaniya carajotasano cebada jocuanuucua tii.

³ Quiarijia quia miiri cua sequesano. Coteenu quia nanare. Quiaari quia shanohua jaanutaja nanarohua. Quiocua quia toque maniniuqui cushirijuhuaj. Naa quia miiniu nuhuajitij, quiocua nocua quiaare. Quiocua coteenu na shanacuseejaara. Majaari senota nocua muetanu. Majaari na niquitionunoj. Quiocua na sashishiijiaara, cuaara miaqueera, cuaara ratuurajuhuaj.

⁴ Quiocua na niquirijuhuaj tee na pojonutaniya na maquenurani. Quiaari jiyacari shusha nocua canujoree cutara. Quiocua na niohuacaacumaji na cuhuajaatiaque riatasee. Quiaari miji niyacurohua. Nojuajaari quia sequenutaniya casaa quia miiniutianiyani.

⁵ Rutri Noemii riucuaree: —Janiyacuaja puetunu quia sequesanojuanaa miiniutianiyani.

⁶ Rutri Booz cuhuariquiajinia quiaquiaari taa na quiniaca sequequiaari nojuacuajani.

⁷ Booz niishiyaquiniuucua, nojuajaari juhuajaniya miaqueree, ratureejaariuhuaj. Shuquiriaatia quiriquiaari. Na nuhuaji, na jocuasano cebada payano shuriucua pojorohuari. Maquequeeri. Na nuhuaji, Rutri nocua canujumaa jacaria. Booz niohuaca riataseeri. Miji niyacurohuari.

⁸ Shiyaqueya saniniuujia, Boozri niucuamaa. Na poonishacari shiriiquiriiri na niquishacari maajiiri na niohuacaacuma niyacuriquiaa.

⁹ Boozri na nequesotaree: —¿Canateja quiajaniyani? Maajiiri na riucuaree: —Janiyacuaja quia seru Rutni. Janiya quiocua niyareeni. Quiaacuajaari niishiya janiyari quia maajini cua shaajasano quiniuucua quia cuna. Naacuatej, quiaari jiyareta cua jiyano. Cua camiri.

¹⁰ Boozri Rut sequeree: —Pueyaso cuaara miiria maninia quiajaniya. Naa quia miiniuucuatej, janiyari quiarijia maatia maninia niishiya cutarani. Cua cuna mashiquio quia quiniuucua, quiaari tojetaarucuajanaa maninia quia cuaqueya cojuarucuaa saa quia jiyanoraja. ¿Canatuma quia tenujucanuni quiaa jaara quiarta mashaja niquiniu paniquianu, casamiijiu, casamiriaca soj, naajaa? Majaari naa quia miiniu quiriucuaquij. Quiaari jiyareta saaja cucua saariucuaajaa rishimiacaniqui.

¹¹ Naa quia miiniuucua quiarijiatej, maja puerenu. Puetunu cua tiacajinia quijiaca pueyajanaari niishiya, quiaari maninia miitiu. Naacuatej, janiyari quiara quia masesano miiniutianiyani.

¹² Seetanujuanaa, janiyari quia shaajasano cunani. Saniniuujia, quiaari socua catecaji quia jiyano jiitiaa. Noojuajaari quia shaajasano cua cuna cama cutara.

¹³ Maja tacaaniu. Niyaja quia juhuaquere. Janiya tariqui pocoojonutaniya quia shaajasano camatani. Nojuaja jaara quia riniu paniri, cuaara quia riiria. Janiyari saniniuujia seetanujuanaa Pueyaso niquiara quia sequeyani, nojuaja jaara quia riniu paniyaquiri, janiyajanaari quia riniutianiya cutarani. Juhuajaniya quia maqueyare cuaara juhuaqueera.

¹⁴ Cuno niucuajani, Rutri Booz niohuacaacuma maqueyaree. Ninishiquijia, Rutri jiyanohua tariquiicuaji saneree na cuhuaretaaquishacarijia. Boozcuajaari Rut sequequiaari, nojuajaari maja na paniniu quiriquiaa pueya niishiniuria Rut cuno niucua nocua quiriquiaa.

¹⁵ Naacuatej, Boozri Rut sequeree: —Quia shiniquiaacuaji quia cuhuajaatiaque quia teetere. Cumaatia na casaca quia quiare. Rutri na toque jequeteree. Cumaatia na toque casaca quiariquiaari. Boozri ritia tii quiyoree socua cuarenta kilo tariucua jocuasano cebada jaa. Na nuhuaji Rut numueecuaji na niatareeri. Rutri tiacajinia na canujutaarohua.

¹⁶ Rut tiuquishacariuhua neyaca nucua Noemiicua, Noemiiri na nequesotaree: —¿Taa quia miishaareeni, sanaunaa? Jiyacaritij, Rutri Noemii pohuataree taa Booz miirii maninia nojuajani.

¹⁷ Rutri Noemii sequereejuhuaj: —Cojuata cua niquitioreeno puetunu nio cebadajanaari. Naa cua sequereeno, “¿Quiaatucua casaara juhuasu riujiyarohuani? Quiocua quenaaja nio tiuquitiasuhua quia quiniacaacua.”

¹⁸ Noemiiri jiyacari naa Rut sequereequij: —Jaara naa quiritij sanaunaa, quiarijia quiocua quia shanacure taa na miiniutianiyajanojoni. Cuno pueyanoori maja na maquenu quiniutianiya cuaara jeecare puetunu na sequesanojaatijia.