Taatu Rutjiniji Pohuatasano 2 - Arabela

Rut poonijiosacari Booz cuhuariquiajinia

¹ Noemiiri jiyanoraca quijia. Na shaajasano neyaca Elimeelec cuna quijiaari. Cuno pueyano sesaari Booz quijia. Jiyanohua queraatia casamiriaca quijiaari. Tojishano pueyano quijiajaariuhuaj.

² Tamonu juuca Rutri Noemii sequeree: —Nio juuca quiarijia cua caretere. Pueya sharta cebada carajotanuucua quiojiyacuaa. Nojori nuhuaji reratejotacoorajataj, jaara cua juaatiuyaquiri nojori nuhuaji tatuhuojotaano. Noemiiri na riucuaree: —Quia quiaare sanaunaa.

³ Rutri cuno juuca quiaaree cuhuariquiajinia. Mueruuta cebada jiyonee pajama piyotanaa nuhuajiquiaariiri. Cuno pojori totinijiatasano reratejotariquiaariiri. Cuno cuhuariquia Rut tii poonijioriquiaani, cunoori namitia Booz cuhuariquia quiriquiaa. Boozri mashiquio Noemii niyaca cuna quijia. Majaari Rut niishiniu quiriquiaa cuno.

⁴ Naa nojori poonijiosacaritij, Boozri Beleen tiacajiniji jiyacari nojoriicuaa tiuquishii. Naa nojori saruhuataseeri: —Pueyaso cuaara niaata quiiria, pueyanaa. Nera poonijionaa pueyari naa na riucuaturee saniniuujia: —Quiajaniya sajara, Pueyaso cuaara quia shuquiritiiria.

⁵ Jiyacaritij, Boozri nera poonijionaa nujuanuna nequesotaree: —¿Cana niyatuteja cuno niyacooni?

⁶ Nera poonijionaa nujuanunaari na riucuaree: —Nojuacuaja taaturuhuate. Noemiitia tiuquiniohua Moab jiyajinijinio.

⁷ Nojuajaari cua sequereecuaja maja cua juaaniuria nojuaja, poonijionaa totinijiatasano na tatuhuatasacari nojori nuhuaji. ¿Casaate nocua jatareeni? Poonijioreeno, pananuuri na taqueejotamaa. Shusha samaatehuanocuara. Nocua sanehuajaariuhuaj.

⁸ Boozri jiyacari Rut sequeree: —Cua tojiri quiarijia, sanaunaa. Quiaari niya maninia poonijiyacuaja. Majaari tamasaca cuhuariquiajinia quianu poonijionuucua. Niyaja quia poonijiore cua cuhuariquiajiniani. Quiocua quiarta maajipohua cojirijia, niya cua seyani.

⁹ Maja taacanuunu. Quiocua poonijionuyano nuhuaji canujuucojoreja nojori totinijiatasano quia tatuhuatanura. Janiyacuaja niya quiria poonijionaa pueya sequeree tarini, maja nojori taajetenura quiajaniya. Quiaa jaara jiyamuere, mohuacacuajaari cajitiacoya, quiria poonijionaa taquirioosanoni. Quiocua tiji ratucooquia.

¹⁰ Naa Rut tojishacari Booz sequesano nojuajatej, na timitiareeri. Naacua jiyocuara jacamareeri na jiuujiaashaanuucua. Naacuatej, Rutri Booz nequesotaree: —¿Casaara naa quia jiyanooriicuaa janiyani? Quiaari maninia rupaajinia cua sequeree. Janiyari taatu quiarani.

¹¹ Boozri Rut riucuaree: —Janiyacuajaari niishiyani quia niyaca quia shaajanu nuhuaji, quiaari maninia miiquianu quia niyaca nucua. Janiyari niishiyajaniuhuaj, canaari quia niishishoo pueyani. Naajaa, quiaari quia que, quia nucua, quia jiya tiujiaarucuaa niyara quia pacusacari canaata quia quiniuria, quia niishishoo pueyaniqui.

¹² Naa quia miiniuucuatej, Pueyaso cuaara maninia miiria quiajaniya. Nojuajaari Camarnujuanaa, Israel pueya Pueyasojaariuhuaj. Nojuaja, quiaa quia jiyanora na jiyatecanuni. Nojuaja cuaara maninia miiria quiajaniya puetunu maninia quia miiniuucuajanaa.

¹³ Rutri Booz riucuaree: —Quiaari pueyano maniniu quiria. Maninia rupaajinia quia sequenuucua janiya, quiaari coojia timioree. Quiaari quia paniniutia maninia rupaajinia cua sequeree. Naa quia miiniuucuatej, janiyari maja quenaaja juhua niquiriyatu cuarta maajipohua quia seyajinijinioni.

¹⁴ Panacari miaquenuusacari, Boozri Rut piirii. Naa na sequereeri: —Miji, quia cajishiijia. Pan quia riri. Nio cojitijiosano maneeca jereeca casaajinia quia shiniujiuri. Quia miaquere. Rutri cebada piyotanaa pueya shuriucua cajishii. Boozri shuquijiajau na niquitioree. Rutri maninia miaqueree, tooriiri. Na miaquenu nuhuaji, cureeriquiaajaari na miaquesano.

¹⁵ Na nuhuaji, Rutri poonijionu coteerohuacuhuaj. Poonijionaa nuhuaji tatuhuatariquiaa totetano cebada jaari. Jiyacaritij, Boozri nera poonijionaa pueya sequeree: —Niocua nocuaji curojore quenaajaaja. Maja puera na cariyonunucuaa. Cuno maaji cuaara nia morojotanucuaca tajiniaqueya reratetaara neraaja. Majaari na tenujutunu.

¹⁶ Naajuhuaj, niocua nia morosocoriquiano nia cacanucuajiniji totinijiatare neraaja. Cuaara nera na reratetaaraaja. Majaari na taajetetununoj.

¹⁷ Rutri cebada reratetanuucua niniyaree cuno juuca Booz cuhuariquiajinia. Na reratetasano jocuarohuari. Puetunu cuno juucajanaa na poonijiosanoori nera shanacusaaree. Veinte kilojiniji socua shiitianiyojua quiriquiaari na niiquia.

¹⁸ Rutri na casaa nitiaarohua. Tiacajinia quiaarohuari. Na tiuquishacariuhua tiajinia, neyaca nucua mashiquio niquitirii cuno juuca na reratesano cebadaari. Naajuhuaj, na miaquesanojiniji na racatasano muerajoreejaariuhuaj. Noemii na niquitiojoreeri.

¹⁹ Noemiiri na nequesotaree: —¿Tee quia poonijioriquiaa quiarijiani? ¿Cana cuhuariquiajinia quia tamuetoreecuaa cuno queraatia cebadani? Cuno pueyano naa maninia miirii quiajaniyani, Pueyaso cuaara maninia miiria nojuaja. Rutri jiyacari na quiniaca sequeree cana cuhuariquiajinia na poonijioree cuno juucani. Noemii naa sequeree: —Cuno pueyano, janiya na cuhuariquiajinia poonijioriquiaani, na sesa Booz.

²⁰ Noemiiri na riucuaree: —Pueyaso cuaara maninia miiria cuno pueyano. Nojuajaari capora, naa maninia na miiniuucua pajaniya. Cua niyaca jiiriatasacarijia, quiquiohuajaajanio, nojuajaari naa mininia canaa miijiojuajuhuanajaj. Cuno pueyanoori cua shaajasano cuna, naacuatej nojuajaari pa jiyano. Naa pa jiyano na quiniuucuatej, nojuajaari niishiyacuaja nojuajaari pa cojuana, pocuaji tacunajuhuaj.

²¹ Rutri socua naa Noemii sequereequij: —Cuno pueyanoori naa cua sequereejuhuaj, janiyacuana cuarta maajipohua na seya cojiri poonijionu na cuhuariquiajiniani, cuaara puequeerajaatijia cebada carojotanu.

²² Jiyacaritij, Noemiiri neyanu mashiquio Rut riucuaree: —Sanaunaa, maniniacuajaqui. Quiocuaqui quiarta maajipohua na seya cojirijia quia poonijiosacari. Majaari tamasaca cuhuariquiajinia quianu paniniu poojijionuucua, pueya mariqui quia taajetereeri.

²³ Naacuatej, Rutri narta maajipohua Booz seya cojiquiaari poonijionu, cuaara tucuateequiaarijaatijia cebada, trigo carajotanu puetunujuanaa. Rutri maja na cartenu quijia neyaca nucua. Mashiquiopueeri mariyataa quitiujia.