Taatu Rutjiniji Pohuatasano 1 - Arabela

Noemii niyacajiniji pohuatasano, necohuajinijinio

¹ Nequesoreenaa jiitiasacari narta Israel pueya, camarnu quiyaquishacarijia, jiyacaritij puetunu nojori jiyajinia quijiaca pueyajanaari na miaajaa miiriquiaa.

² Naacuatej, Beleen tiacajinijinio Elimeelec jiyanishano pueyanoori taucuaca jiyajinia pacuquiaari. Moab jiyajinia quishiiquiaari rupaquijiaraari. Nata quiaquiaariiri necocua Noemii, querajaa necohuajaajanio: Mahloon jiyanishano, Quelioonnio. Puetunu nojorijianaari Beleen tiacajiniji quiriquiase, Efrateocuaca. Nojori jaara Moab jiyajinia tiuquishiiquiaari, tii quitiushiiquiaariiri.

³ Na nuhuaji, Noemii niyaca, Elimeelecri saaja shaajeseequiaari cuno taucuaca jiyajinia. Naacuatej, Noemiiri saaja cuno querajaa necohuata cureequiaari.

⁴ Naa cuno Moab jiyajiniaja nojori quishacaritij, Noemii niquiohuari cuno jiyajinijinio taatujuri camiyoquiaari necocuara. Nioori nojori niquio sesaca, Orfaa, Rutnio. Nio pojori camiyonu nuhuaji, saaja diez marijia shocojotequiaariiri.

⁵ Na nuhuaji Mahloonri, tarajanu Quelioonta shaajecoquiaarijuhuaj. Naacuatej, Noemiiri taraajenucujuquiaari jiyopueeju na quiniuucua na mashiyacatenuucua na mueejutenuucuajuhuaj.

Taatu Rutri saaja Noemiicua rupaaquiaari

⁶ Noemii quishacarijia Moab jiyajinia, tamonu juuca nojuajaari tama na jiyajiniji tojiquiaari cuno taucuaca pohuatasano. Cuno taucuacaari niishiquiaari taa Pueyaso taraajerucuaa Judiiocuaca, na pueyacuani, maninia na moritianiniuucua nojori nataacuaca. Naacuatej, Pueyasoori Judiiocuaca miaajenu tajitiquiaari.

⁷ Jiyacaritij, Noemiiri na jiyacua naquerejorohua. Naacuatej, na jiya Canaanjinia tacateyarohuari. Noemiiri naacua nojori quijia tiajiniji quiaarohua necohua taatujuri mashiquiopueta.

⁸ Tari nojori quishacari nucuaco, Noemiiri Orfaa, Rut sequeree: —Sanajooriniaa, nia tiajinia nia quiojorohua nia nuhuocuacaacua. Pueyaso cuaara nia taraajetaara naatej, taa nia taraajecanu cucuacuaani, quiquiohua niquiohuacuajuhuaj.

⁹ Pueyaso cuaara naacuura niajaniya, niaa camiyonuhuara. Naacuatej, niaari juhuajaniya shuquiriaatia quiriquiano. Naa Noemii sequenu nuhuaji cuno taatujuritij, juucua na tiujiasocoriquiano na nuhuajiria nojori nujuunequereeri. Cuno taatujuriiri saa nujuquetureeja nera.

¹⁰ Naa Noemii sequetureeri: —Maja naa canaa miiniuujia. Canaa quia jiyacua quianu paniya quiatajuhuaj.

¹¹ Noemiiri saaja nojori ruuretariquiaa. Naa cuno maajipohua sequereeri: —Sanajooriniaa, juhuajaniya nia quiojorohua. ¿Casaacua cuata nia quianu paniyajaarani? Tuma jiyani juhuari janiya socua mueturiquianoni, quiquiohua camiyonura niajaniya.

^12-13 Juhuajaniya nia tiajinia nia quiojorohua sanajooriniaa. Janiyari niaacuajinio motajacuaani naatej. Majaari socua cua caminiu quiniutianiya. ¿Janiya jaara nio niucuaha camitiasuriquiano quiriquiani, niaatucua pueyaracaanu sashiri cua muetusano maashiniuria nia camiyosocoriquiano? Maja naa miiniutij, sanajooriniaa. Janiyari seetanujuanaa niishiyani Pueyaso cutaraari cua saniitioyani. Naacuatej, majaari cua paniniu nia cojiniuria janiya. Majaari cua paniniu socua nia jiyacatajonura cua taraajenu, janiya jaara nia niquiri jaarajaaja naquiya miiquioyano cuatani.

¹⁴ Cuno taatujuriiri socua pacuterohua nujuquenu. Orfaari socua neyaca nucua mashiquio nujuuree na nuhuajiria. Riujiyarohuari. Rut saniniuujia, nojuajaari saaja neyaca nucua carteyaquiriquiaa.

¹⁵ Jiyacaritij, Noemiiri Rut sequeree: —Quia niquiri. Quia niama tari quiaarohuacuaa na jiyajiniohua, tii na pueyasohua tojijia na quiniuhuara. ¿Casaara quia cureyarijia? Nata quia quiaarohua.

¹⁶ Rutri saaja na riucuaree: —Nareja cua niquiri. Quiaa puera cua shiniujiyacujua cua rupatenura quiocuaji, cua cartenura quiajaniyajuhuaj. Tuma cua jiyani quia carteriquiano. Quia nuhuajiniuuriquianojuhuananijia. Janiyari quia quishaqui quiriquianojaniuhuaj. Quiarta pueyari cua pueyarano. Quia Pueyasoori cua Pueyaso quiriquianojuhuaj.

¹⁷ Naacuatej, quiaa jaara pa puetaarecuaa shaajenu, janiyari tii quia shaajesaqui shaajeriquianojuhuaj. Janiya cuaara tii jamosaariajuhuaj. Maninia cutaraari janiya jaara quia cartequee tama cua shaajesacarijaajani. Saniniuujia, Pueyaso cuaara cua saniitioora cutara, janiya jaara quia cartere tama cua panishacarijaajani.

¹⁸ Noemii niishishacari, Rutri seetanujuanaa nata quianu paniriquiaa, Noemiiri socua na tarinitiareequij.

¹⁹ Nucuaco pacutaareeri, Beleen tiacajinia tiuquitiushiiri. Tari nojori quishacari Beleen tiacajinia, puetunu pueyajanaari jiuujiaatequiaari. Maajipohuari tama nequesoreetoojuajaaja: —Cuno shusha tiuquiyano maajini, ¿majatee Noemiini?

²⁰ Noemiiri saaja naa nojori riuhuaneja: —Maja tari cua jiyaniquitiuniu Noemiitia. Puetunu cumaacaraca quijia Pueyasoori puera cua miitiarucuaacujua. Cunora quiarijia cua jiyaniquitiurijuhuari Mara.

²¹ Niiquiji cua quiasacari, janiyari niyacaraca quianoni, niquiohuaracajuhuaj. Quiarijiaariuhuaj, janiyari juhuasu tiuquiuhuani. Cumaacaraca quijia Pueyaso jiyotucuajaari naa cua panitiano cua quiniuriatej. Naacuatej, ¿casaara nia jiyaniquiya janiya Noemiini? Puetunu cumaacaraca quijia Pueyasocuajaari naa cua panitiaa taraatia cua quiniuriatej.

²² Noemiiri naa tiuquiquiaariuhua Moab jiyajiniji neyanu mashiquio Rutta. Nojoriiri namitia maninia tiuquiquiaari Beleen tiacajinia, shusha pueya coteesacari cebada carojotanu.