Nuumero 22 - Arabela

Madiaan camarnu Balac jiiquiootesacari shimiacu Balaam

¹ Israel pueyari na quitiushaquiji quiojoquiaari. Moab jiya jamatujinia na quitiujiara na suhuorotaqueya nujuatejotaseeriuhuaj. Cunoori Jordaan moojiniji pananu muetasamajiria quiriquiase, jiyareta Jericoo tiaca taquijiria.

² Zipor niyanu Balacjanaari niquiquiaari taa Israel pueya miiriucuaa taucuaca Amorreocuacacuaani. Nojuajaari Moab jiya camarnu quijia.

³ Naajuhuaj, narta Moab jiyajinijinio taucuacaari jiyanohua pueretuquiaari jiyanohua queraraqui Israel pueya quiniuucua.

⁴ Naacuatej, Moab jiyajinijinio taucuacaari Madiaan jiyajinijinio narta taucuaca jiyaniijianucua sequequiaari naatej: —Cuno pueyari pa jiya riutiocojosee pocuajiijia. Pa jiya tucuatanutaniya camaruuniu socuaari naatej taa juunu puecojoquiaa jiyasocua miaquejonu cuhuariquiajiniacuaanij. Jiyacaritij, Balac jiyanishanoori Moab jiya camarnu quiriquiase.

⁵ Naacuatej, Balacri Beor niyanu Balaamcua na rupaa jiyaroquiaari. Balaamri jiyacari Petor tiacajinia quijia, Eufrate moo casaqueeji Amav jiyajinia. Balacri nio na rupaa jiyaroquiaari Balaamcua na pueyata. Naa Balaam sequequiaariiri: —Quiaj, Egipto jiyajinijinio quiano pueyari puetunu nio canaa jiyajiniajanaa paaquejerecuaa. Naacuatej, nojoriiri quiarijia niya tari canaa tiaca taquijiria quishii.

⁶ Miji ritia quia niyare Balaamnaa. Cuno pojori quiria quia shimiojoquee. Nojori cutaraari socua cumaacaraca canaajiniji. Quiaa jaara naa shimiojoquee quiria nojoritij, cua naata jiyoteeri naacua nojori mashiquiniu canaa jiyajiniji cutaratej. Janiyacuajaari seetanujuanaa niishiyani, quiaa jaara maninia rupaajinia casaa sequere, quiaa jaara shimiojorejuhuaj, puetunu cunojuanaari tohuatequiaa.

⁷ Naacuatej, Moab, Madiaan jiyajinijinio jiyaniijianucuaari na cumaneeca patootaquiaari Balaam na niquitiotusocoriquiano jaara Israel pueya shimiojore nojoriria. Cuno pojori jaara tiuquiijioseequiaari Balaamcua, nojoriiri Balac sequesano caminiujiuquiaari Balaamra.

⁸ Balaamri nojori sequeree: —Nia maquerejaara niya nio niucua. Janiyacua tariqui nia sequeseequiani janiyatee niaata quianutaniyani maja soj. Coteenu Israel pueya Pueyaso shanacureera cucua, taa na sequenutaniya janiyani. Moab jiyajinijinio jiyaniijianucuaari tiijia maquetiuyaree cuno niucua Balaam tiajiniani.

⁹ Cuno niucuajani, Pueyasoori Balaamcua muetaquiaari. Naa na nequesotareeri: —¿Balaamnaa, canapueteja nio pueyani niya quia tiajinia quiyani?

¹⁰ Balaamri Pueyaso riucuaree: —Moab jiyajinijinio, Zipor niyanu camarnu Balaccuaja cua numootenuucua niya cucua na pueya jiyaroreeno.

¹¹ Egipto jiyajiniji mashinio queraraqui pueyana tiuquiriucuaa. Cuno pojoriniaari quiarijia puetunu nojori jiyajiniajanaa niyaquejerucuaa. Balacri paniya ritia nocua cua quianura quiarijia, na miaquejosocoriquiano nera cuno pueya cua shimiojonura. Jaara na naata quiri cuno pueya miaquejonu, nojuajaari na jiyajiniji cuno pueya taanuunu paniya.

¹² Pueyasoori saaja naa Balaam sequereequij: —Cua tojiri. Maja cuno pojoritia quianu cuno pueya sesacanura. Cuno pueya quiaa na sesacanura masuushiyani, cuno pueyacuajaari tariucua maninia rupaajinia cua sequesano pueya.

¹³ Jaara juhuaquequiaari, Balaamri na riniuucua nocua Balac jiyaramiquishano jiyaniijianucua sequequiaari naatej: —Nia jiyacua nia riujiuuriohua. Maja Pueyaso paniniu cua quianura niaatani.

¹⁴ Moab jiyajinijinio jiyaniijianucuaari riujiuuquiaariuhua nojori camarnu Balaccua. Naa na sequetusuhuari: —Maja Balaam niniu paniniu quiriucuaa canaatani, na niquiniuucua quiajaniya.

¹⁵ Balacri socua jiyaramiquiquiaari jiyaniijianucuara na jiyatesano na pueya. Coteenu na jiyaramiquishanojinijini, nojoriiri socua queraraqui na pueya quiriquiaa, socua tojishano na pueyajuhuaj.

¹⁸ Balaamcua nojori tiuquishacari, Balaamri saaja naa cuno pueya sequequiaaritij: —Balac jaara cua niquitiore na tia mishaja oro platajaajanio, naajaa majaari na panishano cua miiniu quiniutianiya. Na panishano jaara quiri secaja, queraatia soj, majaari cua Pueyaso sequesano cua shocotenu quiniutianiya Balac panishano cua miiniuria.

¹⁹ Naajaa, niyaja nia maquesee. Israel pueya Pueyaso shanacureera cucua, casaa na sequenutaniya quiarijia janiyanij.

²⁰ Pueyasoori cuno niucua Balaamcua muetaquiaari. Naa na sequereeri: —Cuno pueya jaara quia riniuucua niya tiuquirii, nojoritia quia quiaarequi. Quiocua saa cua sequesanojua miishii.

Balaam burro niquishacari Pueyaso

²¹ Balaamri socua naacua sanequiaaritij. Na cajijiara na burro nijinia casaa moroquiaariiri. Cuno Moab jiyajinijinio jiyaniijianucuata quiaqueeri.

²² Balaamri na burro nijinia cajiriquiaa na quiasacari. Querajaa na jiyaraajiaari nata quiariquiaajuhuaj. Pueyasoori juaariquiaacujua Balaam tojiniuucua nocua nijiono pueya, nocua nijiono pueyata na quianuucuajuhuaj. Naacuatej, Pueyasoori nocuaji cutequiaari na nuujinia, na tenujunura juucua.

²³ Burro jaara niquiquiaari Pueyaso na nijiniaquetucuaja mueruu muetuyano nuu jiuujiajinia, nuujiniji tunequeeri. Cuhuariquiaaco tamoco na camaru neretariquiaari. Balaamri jiyacari na burro pirii, nuujiniara burro tacatenuhuara.

²⁴ Na nuhuaji, Pueyasoori nuu secanesaqui nujuaquiaari nojoriicuaji. Nuuri saatiuniu quiriquiase; uva cuhuariquiaca tajiniaaco neteriquiaseeri. Naacuatej, miaquetajara, muenecarajuhuaj, cuhuariquiaca casacacaari saitia matacojosano quiriquiase.

²⁵ Burro jaara Pueyaso niquiquiaari, saitia nuu casaca matacaacuara pojoqueeri. Jiyacari na camaru Balaam cashacu tanureeri. Balaamri jiyacari na seru camiriohua piquiniuhuaj.

²⁶ Pueyasoori jiyacari nojoriicuaji cutesee socua na tacoji jiyanohua nuu secanejesaqui. Majaari quenaaja tii pueyano naata quijia narta pueyanota niyonejetoonu.

²⁷ Naacuatej, burro jaara Pueyaso niquiquiaari, jiyocua jacamaquee nocuajiiri. Balaamri naacua juaariiquij. Macata piquirii na seruuri.

²⁸ Pueyasoori jiyacari burro pohuateree. Naacuatej, burroori naa na camaru Balaam sequereequij: —¿Casaa cua miirii quiajaniyanij? Quiaari tari cua pacutejoree piquiniu jiuujianaraca.

²⁹ Balaamri na seru riucuaree: —Quiaacuarateja cua rerequetereejaj. Cushiishi niariquia cua juaashiquiajinianij, janiya maara quiarijiaja quia morinij.

³⁰ Burroori saaja naa riucuaree Balaam: —Janiyacuajaari noo quia seruni, pueyaracaanu na nijinia quia cajishanotej. Quiaacuajaari maninia niishiya, majaari tari naa cua miiniu quijia quiajaniyatej taa quiarijia cua miiriicuajanij. Balaamri na seru riucuareecujua: —Seetanujuanaa naacuaaquiniatejaj.

³¹ Pueyasoori jiyacari Balaam namijia tojeteree nojuaja na niquiniuria. Pueyasoori jiyacari nuujinia nujuariquiaa. Na nijiniaquetucuaja mueruu cacariquiaari. Balaam niquishacari Pueyaso, jiyocuara jacamareeri; na jiniji rupueteree jiyocuaari.

³² Pueyasoori jiyacari naa Balaam nequesotareequij: —¿Casaara jiuujianaraca tari quia pacutejoree quia seru piquiniunij? Janiyajanaacuajaari quiocua roseyareeni cua cosenura quiajaniya maja quia shoconura. Janiyari juayani quia quianuucua terara quia masuusaarucuaacuajani.

³³ Quia serucuajaari cua niquiriini. Nojuajaari naacua jiuujianaraca cua pacutejoree niyonenu juucua. Quia burro juhua cua niyonujureeni, janiya maara tari quia moreni. Maja cutaraari quia seru cua monu, quia nuhuaji na quiniuria cutara.

³⁴ Balaamri naa Pueyaso riucuaree: —Janiyaqui seetanujuanaa sesa miiriini. Janiyatuma taa niishirini quiaari nuujinia ritiariquiaa cucuaji maja cua shoconura. Jaara quiara quiri sesa naa cua quianuratej, riujiuuriohuaraquij.

³⁵ Pueyasoori saa na riucuareejaa: —Naajaa quia quiaare cuno pueyata. Majaari nio niyajetanu cutara. Quiocua saa cua tosano quiajaniyaja pocuasee. Naacuatej, Balaamri nocua Balac jiyaramiquishano jiyaniijianucuata quiaquiaari.

Balac quiasacari Balaam naacunuucua

³⁶ Balac jaara tosaaquiaari Balaam tari nocua quenaacoriquiano, Balacri na naacunuucua quiaquiaari narta Moab pueya tiacajinia. Cuno tiacaari Arnoon moo shuriuquiumia. Cunoori jiyareta nojori jiya namiquiiquiumia tamasaca taucuaca jiyata. Na naacuneetoosacari, Balacri naa sequeree Balaamtej:

³⁷ —Jiyanohua cua tacaaniuucua, janiyari quiocua pacutejorucuaa cua pueya jiyaramiquiniuni. ¿Casaara quia tarijiorucuaa saajaarani? ¿Quiaateeri jiyaniyaruhua majaari cua naata maninia casaa miiniu quiarani?

⁴¹ Tariqui saniniuujia, Balacri Balaam tacataquiaari Bamot-baal tuhuananuucua. Balaamri tiji niquishii saa Israel pueya suhuortucua casacaja.