Nuumero 16 - Arabela

Coree ruuretasacari Moisees Aaroonnio

¹ Jiyacari supuetana Levii niquiohuacuajinio pueyano quijiaari Coree, Coat niquiohuacuajinio pueyano. Nojuajaari Izhar niyanu quiriquiase. Socua quiriquiaajaariuhuaj jiuujianraca canuu. Caapiqui nojorijinijinioori quiriquiaa Eliab niquiohua, supuetana Rubeen niquiohuacuajinio pueya. Nioori nojori sesaca: Datan, Abiramnio. Quiriquiaajaariuhuaj On jiyanishano Pelet niyanu.

² Cuno pojoriiri Moiseescuara tonujutooquiaari, maja socua camarnu Moisees Aaroon quiniuria. Socua nojori cojiquiaariiri dosciento cincuenta narta Israel pueya. Cuno pueyari narta pueya tojishano pueya quijia; narta pueya nacasunaajuhuaj. Nojoriiri naacua niishishano pueya quiquiaari.

³ Puetunu cuno pojorijianaari rerejoquiaari Moiseesta, Aaroonta nojori juayonuutanura. Naacuatej, nojoriiri naa Moisees Aaroon sequetuquiaari: —Maja socua canaa cushutiojonu. Pueyasocuajaari tari puetunu pajaniyajanaa jiyateno juhua sesa miyaquijiacara pa quiniuria na niquiara. Pueyasocuajaari niya quiya puetunu pajaniyatajanaa. ¿Casaara Pueyaso saquiriojosano pueya camarucuara nia jiyatecanu tama nia cuaqueyajaajani, nia cumaaca nia tojitionura puetunu canaajanaani?

⁸ Moiseesri jiyacari naa Coree sequereequij: —Quiarijia cua tojitiuri, supuetana Leviicuajinio caneno pueyanaa:

⁹ ¿Niaatee nia poonijiosano samiritiaa, naajaa puetunu parta Israel pueyajinijinio Pueyaso saquiriojosano nia quiniuucua cuno poonijiosano nia miiniuria, catecaji na shuriucua nia quiniuria na secojojua tiajiniani? ¿Majateeri nia maniniucuanujuhuaj Pueyaso secojojuajinia nia poonijionura naa nia naacunura niarta pueyatej?

¹⁰ Pueyasojuanaacuajaari naa nia panitiano cuno poonijiosano miijiaca nia quiniuriatej, Leviicuajinio caneno pueyanaa, catecaji nia quiniuria na shuriucua pueyaracaanu nera nia cojesacari na quijia suhuortu cari. ¿Niaateeri seetanujuanaa pueyacuara secojonaa camarucua quiniu paniyajuhuaj?

¹¹ Coreenaa, quiartucuanaajaajanio, maninia nio nia niishiri cutara, pueyanaa. Naa sacuaraatia nia rimiaaquenuucua Aarooncuaratej, tama niajaniyajaarijia Pueyasoocuara quejaree juaaniu.

¹⁹ Tariquia saniniuujia, Moiseesta na juayonuutanura socuani, Coreeri tariucua puetunu narta pueyajanaa rerejoteno quiriquiaa Pueyaso secojojua suhuortu tacoji. Jiyacaritij, Pueyaso shacantuuca cumaacaari canashiyaquiji nojoriicua muetaquiaari. Puetunu pueyajanaari na niquirii.

²⁰ Pueyasoori naa sequeree Moiseestej, Aaroonjaajanio:

²⁴ —Puetunu Israel pueyajanaa nia numootejore nojori cuaara netecuatuura cuno suhuortujiniji tee Coree, Datan Abiram quiyacuajani.

²⁷ Puetunu pueyajanaari ritia shiriquirii cuno suhuortujiniji tee Coree, Datan, Abiram quiriquiaacuajani. Puetunu cuno pojorijianaari jiyacari juhuajaniya na suhuortucua nacaacuma nujuaturiquiaa necocohuataja, necohuatajaajanio.

²⁸ Maatia narta pueya niishiniuria, Moiseesri naa sequeree puetunu pueyajanaatej: —Quiarijia niocua niishiri Pueyasojuanaacuajaari puetunu nio cua miijiosanojanaa cua seeratano. Majaari janiya tama cua panishanojaaja miijioyani.

²⁹ Naacuatej, nio sesa miijiaca pueya jaara tama na saaquianoshishacarijiaaja shaajeconu taa puetunu pueyajanaa shaajecoquiaacuaani, niocua naacua niishiri maja seetanujuanaa Pueyaso cua seeratano niajaniya.

³⁰ Saniniuujia, Pueyaso jaara na cumaacata nocuaji jiuujiatesano casaa miiri quiarijia, jiya jaara canashiyaquiji jiaquequee jiaquesaaquiji, cuno sesa miijiaca pueya jaara jiya jiaqueyama totere saminiucuaja puetunu nojori jiitiasano casamitiajanaa, naa jiya mianuucua nojoritij, niaari naacua niishiniutianiya cutaratej cuno sesa miijiaca pueyaquiiri seetanujuanaa Pueyaso samiritiarucuaa.

³¹ Naa Moisees tucuatasacari sequenutej, jiyari cuno sesa miijiaca pueya suhuortucua cariquimiaji jiaquequee.

³² Jiyari naa miaquiaari puetunu cuno canuujuanaatej, teyano pojoritiucuaja Coree cojitiuquiaari jaarajaaja timia Moisees juaaniuni, puetunu nojori niquiocohuatajanaa, puetunu necohuajuhuaj, puetunu nojori jiitiasano casamijiaajanio.

³³ Cuno pueyari saminiucuaja jiya jiaqueya puequeetujinia totequiaari puetunu nojori jiitiasano casamitiajanaa. Na nuhuaji, jiyari juhua juhuanoraja mishiquiiquiaariuhua nojori nuhuaji. Cuno pojoriiri naa shaajasaaquiaari narta Israel pueya tajinijitij. Sanaajequeeri.

³⁴ Cuno pojori suhuortucua shocua quijiaca tojishacari jiya jiaqueyama toteyano sariyocuatunutej, narta pueyari ritia netecuaturee naa na sequenuta: —¡Ritia nia netucuature! Jiyaniquijia pa miareejaniuhuaj taa nia niquiyacuajanij.

³⁵ Jiyacarijuhuaj, Pueyasoori mani tinirii noo 250 pueya puecoonura teyonu pojoritiucuaja shanohua jaanutaja catijiaturiquiaa Pueyasora juhua pueyacuara secojonaajani.

⁴¹ Naa Pueyaso miiniu nuhuaji, cuno tariqui saniniuujia, puetunu cuno Israel pueyajanaari naa juaatiuquiaari Moiseestej, tarajanu Aaroonjaajanio: —¿Casaara naa nia miiriicuani? ¡Niaa Pueyaso saquiriojosano pueya puecooreecujua!

⁴² Puetunu cuno pueyajanaari Moisees, Aaroon shocua camarucutariquiaa. Moiseesri jiyacari tarajanu Aaroonta Pueyaso secojojua suhuortujinia quiaquee. Tari tii nojori quishacari, cohuaja najacaari suhuortuucua cajiquiaari. Pueyaso shacantuuca cumaacaari jiyacari niquishaaree.

⁴³ Moiseesri jiyacari tarajanu Aaroonta Pueyaso secojojua suhuortu tacoji nujuatuquiaari.

⁴⁴ Pueyasoori jiyacari naa Moisees sequereequij:

⁴⁵ —¡Nio pueya shuriucuaji ritia niiquiji nia shiriquiri! Janiyari quiarijiaja nojori puecoonutaniya ritiani. Moiseesri tarajanu Aaroonta jiyocuara jacamaturee narta pueyacuara Pueyaso na masetunura, maja Pueyaso puecoonura nojori.

⁴⁶ Moiseesri Aaroon seuqeree: —Miji quia riri quia shanohua jaanujua casaa quia catijiaja. Quiocua juhuacutujiniji naata catiyano nishiya niojore tii. Quiocua tii jatarohua cuno shanohua jaanujua joocua. Naa quia miiniu nuhuajitij, quiocua ritia quiaare pueyacua tee nojori quiyacuajani. Quiocua Pueyaso masere nojoriicuara Pueyaso jiyanooniuria nojori. Pueyacuajaari tama nojoriicuarajaaja Pueyaso najiquitirii. ¿Taa quiarijia Pueyaso pa shiniajaacuaanij? Pueyasocuajaari nojoriicua jiyaroree ritia pacujua cusonu. Pueyari naacua tari coteeree cusonuunutej.

⁴⁷ Aaroonri naa miiriiquij taa Moisees sequeree nojuacuajani. Ritia netequee pueyacuaari tee cuniqui nojori mariquiaa jatiquicuajanij. Pueyaso jiyarosano ritia pacujua cusonuni, queraatia pueyari jiyacari tari na cusonuutariquiaacuaa. Aaroonri shanohua jaanujua casaa niojoquiaari cateriquiano. Jiyacari Pueyaso maseree na jiyanooniuria puetunu sesa Israel pueya miishanoocuarajanaari.

⁴⁸ Queraatia pueyari tariucua macunucua pojocoriquiaacuaa. Tamasacari saminiucuaja nujuaturiquiaacujua. Aaroonri ritia nojori tajiniocoma nujuaree shanohua jaanujua casaata. Nojori cusojuaniuyano cusonuuri jiyacari pueyajequee.

⁴⁹ Cuno juucani, catorce mil seteciento pueyari cusonuuquiaari. Majaari noo pueya serojosaanu cutara, jiya nojori cojiritiaquiaari mianu Coreetajatej.

⁵⁰ Naa pueya cusojuaniuyano cusonu pueyajesacaritij, Aaroonri Pueyaso secojojua suhuortujinia riujiuuquiaariuhuaj Moisees na coquenuhuara tii.