Leviitico 6 - Arabela

Nohuasejojuatucua taa miiriquiani jaara nohuasere

¹ Na nuhuaji Pueyasoori Moisees sequeree:

² “Pueyano jaara sesa miiri narta pueyano, nojuajaari Pueyaso tojiyaquiya. Puetunu nio miishanojanaari sesa quiya Pueyaso niquiara: pueyano jaara sapojonuta tacatoyaquiri narta pueyano niquitiosano nareja na cojuasocoriquiano; pueyano jaara narta pueyano casaa nohuasere; pueyano jaara narta pueyano casaa jaariutiare;

³ naajuhuaj, pueyano jaara seetare na riuriatasacari narta pueyano casaa. Puetunu jiyano miishanojanaari sesa miishano.

⁴ Jiyano pueyanotej, puetunu naa na miishanojanaari nocua tiuutiashiya jaara niishishano quiri. Naacuatej, cuno pueyano cuaara tacatohuara na nohuasesano casaa, na sapojonuta na nohuasesano casaanio, nata na camaru tiujiasano casaa nareja na cojuasocoriquianojuhuaj, narta pueyano casaa na riuriatasanonio.

⁵ Naa cuaara tacatohuara puetunu Pueyaso niquiara na sapojonuta na masesano casaajanaa. Naa miijia pueyanoniquitij, nojuaja cuaara na camaru tacatohuara puetunujuanaa, socua queraatia naata na nohuasesanojiniji. Cuno pueyano cuaara na camaru niquitiojohuara cuno casami cuno juucaja taacari na seru moshiya Pueyasora sesa na miishanojiniji na jiyanooshaanuracuajani.

⁶ Sesa miijia cuaara na seru jiyataare pueyacuara secojonaacua Pueyaso niquiara mosocoriquiano. Cuno seru cuaara quiiria tojetaarucuajanaa borreeco caya maniniu, tama na seyajinijiniojaaja. Na seru cuaara quiiria seru maniniu taa na nohuasesano casami quiriquiaa casami maniniucuaani.

⁷ Naacuatej, pueyacuara secojonaari Pueyaso jiyanootiniutianiya puetunu sesa cuno pueyano miishanojinijijanaa.”