Leviitico 4 - Arabela

Seyari catijiasano quijia Pueyaso jiyanooniuria sesa miijia

¹ Pueyasoori Moisees sequeree:

² “Puetunu Israel pueyajanaa quiria quia numootejore taa nojori miiniutianiyani nojori jiyanooshaanura tamonu nojorijinijinio jaara sesa miiri juhuajaniya na tojiyaquiniuucua cua niishitiojosano.

³ Naajuhuaj, pueyacuara secojona jiyaniijia jaara sesa miiri, sesa na miishano jaara puetunu pueyacuajanaa tiuutiasaare juhuajaniya na tojiyaquiniuucua Pueyaso, cuaara naa miitiuyara: juunu caya maniniu cuaara saquiriojosaaria nia seya tajiniji quiria mosocoriquiano puetunu pueyajanaa jiyanooshaanura.

⁴ Mosocoriquiano juunu cuaara jaatucusaaria Pueyaso secojojua suhuortu tohuateyajiria Pueyaso niquiara. Na monu panishacari juunu, pueyacuara secojona cuaara nia seru nacaacua niaara na juaashiquia. Naa na miiniu nuhuajitij, cuaara Pueyaso niquiara na moora.

⁵ Na nuhuaji, pueyacuara secojonaa jiyaniijia cuaara secaja na nanaca pataara Pueyaso secojojuajinia.

⁶ Pueyaso secojojuajinia na quishacari, nojuaja cuaara cuno nanacajinia pueraara na majiriuutianura mishiquiotaja toque tacoji. Cuno toque tamajiriaari Pueyaso Quishaquijianaa. Nanaca cuaara siete majiriuutianu pacutejoshiyara Pueyaso tacoji.

⁷ Naajuhuaj, secojonaa jiyaniijia cuaara juunu nanaca tuujutaara shanohua jaanutaja catijiaja tuhuajaacua, teyanote Pueyaso quishaqui quiquio tacoji nujuataacuajani, Pueyaso Secojojua suhuortujiniani. Na nuhuaji, cuaara nanaca cureeno totaara seya catijiaja juhuacutu pajama, teyonote Pueyaso Secojojua suhuortu tohuateya tacoji nujuataacuajani.

⁸ Na nuhuaji, cuaara sesa na miishanoocuara na mosano juunu shiyocua rupareetaara puetunu na marecuhuajinijijianaa, noo shiyocuajuhuaj marecuhua mishiquiohuatej.

⁹ Naajuhuaj, cuaara rupareera na querajaa cajiniajajaa, na cajiniajajaa mishiquiojua shiyocuanio, seru nijiniaaco rupaajia shiyocuajuhuaj. Na shiyotoojiaaca na cohuajinia cuaara rupareetashiyarajuhuaj.

¹⁰ Puetunujuanaa cuaara naa rupareetasaariatej taa rupareetasaaquiaa jiyanooniuhuara juunujinijitij. Na nuhuaji pueyacuara secojona cuaara catijiaara puetunu cuno rupareetasano casaajanaa seya catijiaja juhuacutujinia.

¹¹ Saniniuujia, puetunu cuno juunu cureenojuanaa cuaara jiyatashiyara tamaqui; na shoque, puetunu na shujianaa, na naca, na cashacucua, na maraca, na cueacajuhuaj.

¹² Puetunu cunojuanaa cuaara jiyatasaaria tucuacaanu maniniushiqui, tee cuniqui Pueyasora catijiaja juhuacutujiniji juaca taroosaaquiaacuajani. Cuaara juaca paajia caco niojoora mojoco nocua catijiasocoriquiano puetunujuanaa.”