Leviitico 11 - Arabela

Miaquesano casaa, pueresano casaanio

¹ Pueyasoori socua sequeree Moisees, Aaroonnio:

² —Puetunu niarta Israel pueyajanaa nia sequere: “Nioori nia miaquesocoriquiano puetunu nio jiyajinia quijia casaajinijiniojuanaa:

³ Nia naatacuajaari miaquenu teetacujua juaashocoraca casaa, nooj jacaria saquejonuujua na jacanojonura na rujoocojosanotej.

⁴ Saniniuujia, maja cutaraari nia miaquenu camello. Cunoori na miaquesano caminiujiutianu saquejojuacuaja, maja cutaraari teetacujua juaashocoraca. Naacuatej cuno casaari sacuaraatia miaquesocoriquiano niaara.

⁷ Cushi naajuhuaj. Cunoori raquitishano juaashocoraca, naacuatej na niohuaca teetacujuacuaja. Saniniuujia majaari na miasano na neejenu quijia na jacanojonuhuara. Naacuatej cushi cuaara quiiria nia pueresano casaa.

⁸ Majaari nia miaquenu paniniu cuno casami shu. Majaari quenaaja tojetaarucuajanaa na macu quianu. Nia jiyatere tojetaarucuajanaa nia soosano.

⁹ Saaja nio sapitiaaja nia miaquere: nooj, juaariocotajaracatej, shiriyaracanio. Naajaa, cuno sapitiaaja cuaara quiiria caminiajinijinio, moojinijijaajanio.

⁴⁵ “Janiyari Camarnujuanaani. Janiyacuajaari nia mashiquiquiaari Egipto jiyajinijini nia Camarnu cua quiniuria. Naarate tojetaarucuajanaa maninia pueya nia quiri taa cua quiya tojetaarucuajanaa maniniacuaani.”