Leviitico 10 - Arabela

Nadab Abiuu miishacari sesa Pueyaso niquiara

¹ Aaroon niquiohua Nadab, Abiuunio, nojoriiri pueyacuara secojonaa quiquiaari juhua na queja. Nojoriiri Pueyasora catijianu paniriquiaa juucua shanohua jaanutaja. Naaratej, nojoriiri nishiya pataquiaari mani patatarujinia. Nojoriiri shanohua jaanutaja niaree nishiyajinia. Nojoriiri naa juhuajaniya cuno shanohua jaanutaja catijiariquiaa Pueyasora. Saniniuujia, nojoriiri cuno nishiya pataquiaari tamonu manijiniji, maja noo manijiniji teje Pueyaso sequequiaari nojoricuajani.

² Naa cuno pojori miiniuucuatej, Pueyaso quishaqui quiquiojinijijianaa maniiri nojoriicua rimianacuree. Nojori puecoree tojetaarucuajanaari. Cuno pojoriiri naa cusonuuquee. Cuno querajaa pueyanoori naa cusonuuquiaari Pueyaso tacoji.

³ Naacuatej, Moiseesri Aaroon sequeree: “Pueyasocuajaari naa miiriiqui taa na sequequiaaricuajani. Nojuacuajaari naa sequeja: ‘Cante cucua catecanonu panijiani, janiyari na niishitiniutianiyani janiyari tojetaarucuajanaa sesa miyaquijiani. Naajuhuaj, puetunu pueyajanaari shacantuuca cua cumaaca niquiriquiano.’” Naa Moisees sequenuucua, Aaroonri sanaajequiaari.

⁴ Jiyacaritij Moiseesri Misael piirii, na tarajanu Elzafannio. Nojoriiri Uziel niquiohua quiquiaari. Uzielcuajaari Aaroon cama quiquiaari. Moiseesri nojori sequeree: —Miji pueyanaa. Nia cunaca nia poosee Pueyaso quishaqui quiquiojiniji. Niocua suhuortucuajiniji na poore mij tucuacaanutej.

⁵ Cuno pojoriiri nocua tiuquitiaquiaari. Macunucua pooturee suhuortucuajinijiiri taa nojori quiriquiaacuajani puetunu na toqueyatajanaa, taa Moisees sequequiaari nojoricuajani.

Pueyacuara secojonaa miishocoriquiano sequesano

⁶ Na nuhuaji Moiseesri Aaroon sequeree necohuataja, Eleazar, Itamarnio: —Nia taraajesacari naajaa, niocua nia muecaca canuure. Naajuhuaj, majaari nia toqueya nia sureenujuhuaj. Niaa jaara cua sequesano tojiyaquiri, tama niajaniyajaarijia Pueyaso juaatiniutianiya niaacuara, na puecoonura niajaniyajuhuaj, naajuhuaj, na juaaniuria puetunu pa pueyajanaa. Maninia cutaraari puetunu quiarta Israel pueyajanaa cuaara na nujuquetuura Pueyaso catijianuucua quia niquiohua.

⁷ Majaari quenaaja nia tohuatanu Pueyaso Secojojua tohuateyaji niaa mariqui cusonuuqueeri. Niaacuajaari pueyacuara secojonaara jiyatesaacanu cua taroosacari Pueyaso riuriotaca shiyocua nia nacaacoji.