Jueces 7 - Arabela

Gedeoon shocotasacari na paraa Madianita taucuaca

¹ Gedeoonri Jerobaalta jiyaniquishaaquiaarijuhuaj. Noo narta pueya Gedeoon cojitiuquiaari na naacuturiquiano na paraa miaquejonutej, puetunu nojorijianaari shusha juhuaquesacari quiojomaa. Nojoriiri Harod jiyanishano samo naca pacaretacojuajinia tiuquishii, tii suhuoronuuseeri. Nojori quishaquiji, pananu muetasamaji miaquetajaacuara quitiuriquiaari nojoritia miaquetoojoriquiano Madiaan jiyajinijinio taucuaca. Cunoori Moree jiyanishano jiyaconaja tuhuananu pajama quiriquiase na jamatujinia.

² Pueyasoori jiyacari Gedeoon sequereequij: —Quiaaruhua puera queraatia pueya jiyataa quia paraa miaquejonuucua. Puetunu quiata quiniaa Israel pueya jaara shocotare miaquejonu Madiaan jiyajinijinio nojori paraa, tama nojorijaarijia naa sequetunutaniyaquij: “Tama canaajaarijia canaa paraa miaquejorucuaani.”

³ Naacuatej, quiarijia quia numootere pueya, teyano nojorijinijinioteja miaquetoojonu puereyani, cuno pojori cuaara quiojohuara na tiajiniohua. Gedeoon numootesacari Pueyaso sequesano nojuaja, veintidos mil pueyari quiojorohua. Nojori nuhuaji cureequeeri saaja diez mil.

⁴ Pueyasoori Gedeoon camiriohua naa sequenuhuaj: —Juhuanojuaja puera queraraquijia cuno quiata quiniaa pueyani. Quiarijianij, mohuaca ratunuucua nojori quia puetaare. Janiyari tii nojori niatanutaniyani teyano nojorijinijinioteja quiata quiojoriquianoni. Janiyajanaacuajaari quia sequeriquianoni teyano quia saquiriojonutaniya quia cojiriquianoni, naajuhuaj teyano pojoritijia cureenutaniyani.

⁵ Gedeoonri mohuaca ratunuucua pueya jiyataquee. Pueyasoori jiyacari na sequeree: —Quiarijia cutara, noo pojori quia saquiriojore quia cojiriquiano na nujuanuta mohuaca tamueree na juaashiquiajiniji juhua saretej. Noo pojori saniniuujia, mohuaca na ratunura shiitiaree na mojoquetaconutatej, puetunu nojorijianaa cuaara quiojohuara.

⁶ Noo pojori mohuaca tamuetuquiaari na juaashiquiacajiniji juhua sareyatej, nojoriiri secaja quiriquiaa, nareja tresciento. Nojori maanu saniniuujia, puetunujuanaari na ratunura mojoquetacoquiaari.

⁷ Pueyasoori naacua Gedeoon sequereequij: —Cuno tresciento pueyani, janiyari Madiaan jiyajinijinio cuno nia paraa nia miaquejotenutaniyaquinioj. Niaari naacua panaatia quiniutianiya na nuhuaji. Nia maanu saniniuujia, nojori cuaara quiojohuara puetunujuanaa.

⁸ Jiyacaritij, Gedeoonri nojoritia quiojiyaquiriquiano narta pueya sequeree: —Puetunu niajaniyajanaa, nia suhuortucuajinia nia quiojorohua. Cuno pojori quiojiyaquishacarijia, Gedeoonri nojorijiniji nojori pataco masejoree, na jonenesocoriquiano borreeco caya nacajajaajanio. Jiyacaritij, Gedeoonri cuno tresciento saquiriojosano pueyata quiriquiaa tuhuananuucua catecanaataja nojori paraa quijiajiniji. Nojori paraari cuno tuhuananu pajama quitiuriquiaa na jamatujinia.

⁹ Cuno niucuajanij, Camarnu Pueyasoori naa sequeree Gedeoontej: —¡Quia sanere taa quia miyanij! Jiyacarijia Madiaan jiyajinijinio quia paraa quia saniri miaquejonu. Cua cojiniuucuajanaa niajaniya, quiaacuajaari nojori moquiriquiano.

¹⁰ Quiaa jaara puerereja nojori miaquejonu, nio tuhuananuujiniji quia rosetaare quia seru Puraa.

¹¹ Quiocua nojori tojishiijia casaa na pocoojiyajanojoni. Na nuhuaji, quiaari jiyacari shusha nojori miaquejonu paniniutianiya cutara. Naacuatej, Gedeoonri tuhuananuhuacoji na seru Puraata rosetaquiaari catecaji na paraa suhuortucuajinia na shanacunura.

¹² Cuno jiya jamatujiniani, tii quitiuriquiaari Madiaan jiyajinijinio taucuaca, Amalecita jiyanishano taucuacajuhuaj, puetunu pananu muetasamaji quijiaca taucuacajanaanio. Cuno taucuacaari cuno jiya jamatuhuoco puetunu tiquiyocua cunoco niquiriquiaajanaa. Juhua sequeruuri muera mariquiaa puetunu cuno jiya jamatuhuacojanaa. Naajuhuaj, nojoriiri queraatia camellohuaraca quiriquiaa, juhua shoniniacu caminia shuriquioco paaquiojua jaaquia.

¹³ Tari Gedeoon tiuquishacari na paraa suhuortucuajinia, niquiriyatu nojori paraajinijinioori jiyacari narta soldado pohuatariquiaa na maquiyojosanojiniji. Naa na pohuatariquiaari: —Cua maquenujinia, janiyari cebada cashojuajiniji majeetesano pan niquirii tuhuananuhuacoji pocua saquitiyanoni. Cua niquiaraja suhuortuucua cuteseeri. Suhuorotuuri titiaquee.

¹⁴ Narta soldadoori na riucuaree: —Tuma tamonu casaa jiyaninioj. Quiaaqui tama pocuaranojaaja maquiyojoree Gedeoon nijiniaquetucuaja mueruu. Gedeoonri Joaas niyanucuaja, supuetana Israel niquiohuacuajinio caneno pueyano niyanu. Nojori Pueyasoqui niya quiarijia pa miaquejotenutaniya Gedeoon puetunu niya quiniaa Madiaan jiyajinijinio pajaniyajanaa.

¹⁵ Naa Gedeoon tojiniuucua cuno tahue pohuatasano na maquenujinia na niquishanotej, naajuhuaj tama nojorijiaarijia na niishiriijuhuaj casaara naa na maquiyojoreenij. Gedeoonri naacua Pueyaso maniniuhuaqueetaree jiyanohua na timiniutia. Gedeoonri tiji quiacuhua ritia, jatij narta Israel pueyacuohuatej. Naa nojori sequesuhuari: —¡Nia sanetare! ¡Pueyasocuaja quiarijia Madiaan jiyajinijinio pa paraa pa miaquejotenutaniya!

¹⁶ Gedeoonri jiyacarijia ritia cuno na jiitiasano tresciento pueya raquiriojotaree jiuujianaraca maanura. Puetunu nojorijianaa serotaree borreeco nacajaari, patacocuajaajanio mii na niojotatujuara tariucua noshitijiosano samari.

¹⁷ Gedeoonri naa nojori sequereejuhuaj: —Janiya jaara pa paraa quijia taquijiria tari quishiicuaani, niocua cua niquirijia taa cua miiniutianiyacuaanij. Niocua juhua cua miiniu miirijuhuaj.

¹⁸ Janiya jaara cuata quiniaata borreeco nacaja jonenerecuaani, niocua puetunu pa paraa shocua nia nujuatusaquiji nia muetujusano borreeco nacaja jonenenuurejuhuaj. Niocua jiyacari naa jiyanohua nia rupaa paaretarejuhuaj. Niocua naa sequere: “¡Nioori Pueyasora, Gedeoonranio!”

¹⁹ Tari cuno na cien pueyata Gedeoon quishacari nojori paraa quijia taquijiria, nojori paraari jiyacari tari quera sanitiriquiaa noo pojori, maquetiuyano nujuanunaatej. Jiyacariiri tari shiyaqueya quiriquiaa. Jiyacaritij, nojoriiri na borreeco nacaja jonenenuuree. Na pootusano patacocua cocuasetureejaariuhuaj.

²⁰ Naacuatej, cuno jiuujianaraca pueya maanuuri nojori nujuatusaquiji mariyataa jatiqui jonenenuuree nojori borreeco nacaja. Jiyacari na pootusano patacocua cocuasetureejaariuhuaj. Puetunu nojorijianaari na muenecaacuara patootariquiaa noshiquioyano samari, na jonenenuusano borreeco nacaja na miaquetajaacuara saniniuujia. Jiyacaritij puetunu nojorijianaari mariyataa jatiqui na paraa jaacataturee naatej: —¡Pa miaquejore! ¡Nioori Pueyasora, Gedeoonranio!

²¹ Israel pueyari na nujuatusaquijia tariniquioquiaari socua. Saniniuujia, cuno Madiaan jiyajinijinio soldadohuari nucuatuquiaari. Ninishiqui sariyocuatureeri. Na mashiyocuatunura netecuatureejaariuhuaj.

²² Cuno tresciento canuuri na borreeco nacajaa jonenenuunu tarnitiaaquiquiaari. Pueyasoori jiyacari cuno Madiaan jiyajinijinio taucuaca tacaresetanirii. Tama nojorijaarijia puecootooreequiaa. Nojori maanuuri socua mashiyocuatuquiaari Bet-sitaa tiacajiniara. Cunoori Sereraa tiacajiniara neteja nucuama. Noojiaqueyari naa tiuquiijiotuseejuhuaj Abel-meholaa jiyanishano jiyajinia. Cunoori Tabat tiaca shuriucua.

²³ Jiyacaritij, Israel pueyari nio narta pueya numootejoquiaari: supuetana Neftaliicuajinio caneno pueya, supuetana Asercuajinio caneno pueyajuhuaj, supuetana Manaseescuajinio caneno pueyanio. Puetunu nio pojorijanaari mashiyocuatuno Madiian jiyajinijinio nojori paraa neteyotaturee.

²⁴ Gedeoon saniniuujia, nojuajaari supuetana Efraiincuajinio caneno pueyacua ritia jiyaramiquiquiaari na pueya. Nojori tuhuananuhuacua jiyacaraca quijia. Nioori nojoriria Gedeoon sequesano quiquiaari: —Cuarta pueyanaa, pa paraa cunocohuate, Jordaan moo jatajajinia nocuaji nia cutesee. Niocua nocuaji cutere Bet-baraa jiyanishanojinia. Cunoori Jordaan moo quejoocuajajinia. Naacuatej, supuetana Efraiincuajinio caneno pueyari naa Gedeoon sequesano miitiuquiaari.

²⁵ Naacuatej nojoriiri Madiaan jiyajinijinio querajaa nojori paraa camarnu quiooree. Cuno querajaa tahueri Oreb jiyanishano quiriquiase, Zeeb jiyanishanojaajanio. Naa nojori paraa na quiootunu nuhuajitij, cuno Oreb jiyanishano motuquiaari puereetuuca saajiaacuaari. Cuno saajiaari naacua naa na sesaatiaajaaquij, Oreb saajia. Nartucuana jaarajaaja Zeeb jiyanishanoni, nojuajaari vinorano uva rapijiojuajinia mosaaquiaarijuhuaj. Na mosaquiiri naa na sesaatiaajuhuaj, Zeeb. Naa supuetana Efraiincuajinio caneno pueya miaquejonu nuhuaji na paraatej, nojoriiri Oreb, Zeeb naca pooquiaariuhua Gedeooncua. Gedeoonri jiyacari nojoriicuaji quiriquiaa Jordaan moo taquijiriaaja.